الەم جۇرتشىلىعىن الاڭداتقان كوروناۆيرۋسقا قارسى ساقتىق شارالارى شىمكەنت قالاسىندا دا كۇشەيتىلىپ جاتىر. بۇگىنگى تاڭدا جەرگىلىكتى بيلىك قوسىمشا پروفيلاكتيكالىق شارالاردى قولعا الدى. توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ كەزەكتى وتىرىسىندا قر پرەزيدەنتى قاسىم-جومارت توقاەۆ «وڭتۇستىك – حالقى تىعىز ورنالاسقان ءوڭىر. سوندىقتان ىندەتتىڭ تارالۋىن توقتاتپاساق، جاعدايدى ۋشىقتىرىپ الامىز» دەپ، جەرگىلىكتى اتقارۋشى ورگاندارعا كارانتين شارالارىنىڭ ورىندالۋىن قاتاڭ باقىلاۋعا الۋدى تاپسىرعان بولاتىن. وسى ورايدا، ءبىز وڭتۇستىك وڭىردەگى ەڭ ءىرى قالا، ەلىمىزدىڭ ءۇشىنشى مەگاپوليسى – شىمكەنت شاھارىندا مەملەكەت باسشىسىنىڭ اتالعان تاپسىرماسى قالاي ورىندالىپ جاتقانىنا توقتالىپ، 13-19 ءساۋىر ارالىعىندا اتقارىلعان جۇمىستارعا شولۋ جاساپ كورمەكپىز.
شىمكەنتتە 1 مامىرعا دەيىن بىرقاتار شەكتەۋ ەنگىزىلدى
كوروناۆيرۋستىق ينفەكتسيانىڭ (COVID-19) تارالۋىنا جول بەرمەۋ جانە ەپيدەميولوگيالىق جاعدايدىڭ اسقىنۋىنىڭ الدىن الۋ ماقساتىندا شىمكەنت قالاسىنىڭ باس مەملەكەتتىك سانيتاريالىق دارىگەرىنىڭ 2020 جىلعى 18 ساۋىردەگى №11 «كارانتيندىك شارالاردى كۇشەيتۋ تۋرالى» قاۋلىسى شىققان بولاتىن.
شىمكەنت قالاسى اكىمىنىڭ ورىنباسارى ماقسۇت يساحوۆ مالىمدەۋىنشە، اتالعان قاۋلىعا سايكەس، شىمكەنت قالاسىنىڭ بارلىق اۋماعىندا 2020 جىلدىڭ 19 ءساۋىرى ساعات 00:00-دەن باستاپ 01.05.2020 جىلى ساعات 07.00-گە دەيىن بىرقاتار شەكتەۋلەر ەنگىزىلدى.
- اتاپ ايتساق، ايىرباستاۋ پۋنكتتەرىنىڭ، ميكروفينانستىق ۇيىمداردىڭ قىزمەتىن ونلاين جۇمىس رەجيمىنە جانە «كليەنتتەرگە دەيىن جەتكىزۋ» ءپرينتسيپى بويىنشا كوشىرۋ ارقىلى ۋاقىتشا شەكتەلەدى. سونىمەن بىرگە، قالادا قوعامدىق كولىكتەر دە جۇمىسىن توقتاتادى. 65 جاستان اسقان ازاماتتارعا جانە 18 سەگىز جاسقا تولماعان ازاماتتار تۇرعىن ۇيدەن ەرەسەك ادامنىڭ سۇيەمەلدەۋىنسىز شىعۋىنا تىيىم سالىندى. بۇل رەتتە شىمكەنت قالاسىنىڭ پوليتسيا دەپارتامەنتىنىڭ، ىشكى ىستەر مينيسترلىگىنىڭ ۇلتتىق گۆاردياسىنىڭ، قورعانىس مينيسترلىگىنىڭ اسكەري قۇرىلىمدارىنىڭ كۇشتەرىمەن كارانتيندىك اۋماقتى پاترۋلدەۋ تاپسىرىلدى، - دەدى قالا اكىمىنىڭ ورىنباسارى م. يساحوۆ.
