شىمكەنتتە كارانتين شارالارى كۇشەيتىلدى
بۇل تۋرالى اقپاراتتىق-كوممۋنيكاتسيالىق ورتالىقتا وتكەن بريفينگتە شىمكەنت قالاسى اكىمىنىڭ ورىنباسارى ماقسۇت يساحوۆ ءمالىم ەتتى.
ماقسۇت پەرنەبايۇلىنىڭ ايتۋىنشا، كوروناۆيرۋستىق ينفەكتسيانىڭ (COVID-19) تارالۋىنا جول بەرمەۋ جانە ەپيدەميولوگيالىق جاعدايدىڭ اسقىنۋىنىڭ الدىن الۋ ماقساتىندا شىمكەنت قالاسىنىڭ باس مەملەكەتتىك سانيتاريالىق دارىگەرىنىڭ 2020 جىلعى 18 ساۋىردەگى №11 «كارانتيندىك شارالاردى كۇشەيتۋ تۋرالى» قاۋلىسى شىقتى. بۇل شىمكەنت قالاسى بويىنشا توتەنشە جاعداي رەجيمىن قامتاماسىز ەتۋ جونىندەگى وڭىرلىك كوميسسيانىڭ 17.04.2020 جىلعى №12 حاتتاماسىنا سايكەس ازاماتتاردىڭ ءومىرى مەن دەنساۋلىعىن قورعاۋعا باعىتتالىپ وتىر.
- وزدەرىڭىز بىلەسىزدەر، قالامىزدا ءبىر كۇندە 12 ادام كوروناۆيرۋس جۇقتىردى. وسىعان وراي، ىندەتتىڭ تارالۋ قاۋپىنە بايلانىستى قالامىزدا ساقتىق شارالارى كۇشەيتىلدى. قاۋلىعا سايكەس، شىمكەنت قالاسىنىڭ بارلىق اۋماعىندا 2020 جىلدىڭ 19 ءساۋىرى ساعات 00:00-دەن باستاپ 01.05.2020 جىلى ساعات 07.00-گە دەيىن بىرقاتار شەكتەۋلەر ەنگىزىلىپ وتىر. اتاپ ايتساق، ايىرباستاۋ پۋنكتتەرىنىڭ، ميكروفينانستىق ۇيىمداردىڭ قىزمەتىن ونلاين جۇمىس رەجيمىنە جانە «كليەنتتەرگە دەيىن جەتكىزۋ» ءپرينتسيپى بويىنشا كوشىرۋ ارقىلى ۋاقىتشا شەكتەلەدى. سونىمەن بىرگە، قالادا قوعامدىق كولىكتەر دە جۇمىسىن توقتاتادى. قوعامدىق كولىكتەر توقتاعانىمەن قالادا ارنايى تىركەلگەن 11 تاكسي كومپانياسى جۇمىسىن جالعاستىرا بەرەدى. ولاردا 2 ادامنان ارتىق جولاۋشى الۋعا بولمايدى. تىركەلمەگەن تاكسيلەرگە رۇقسات جوق. 65 جاستان اسقان ازاماتتارعا جانە 18 سەگىز جاسقا تولماعان ازاماتتار تۇرعىن ۇيدەن ەرەسەك ادامنىڭ سۇيەمەلدەۋىنسىز شىعۋىنا تىيىم سالىندى. بۇل رەتتە شىمكەنت قالاسىنىڭ پوليتسيا دەپارتامەنتىنىڭ، ىشكى ىستەر مينيسترلىگىنىڭ ۇلتتىق گۆاردياسىنىڭ، قورعانىس مينيسترلىگىنىڭ اسكەري قۇرىلىمدارىنىڭ كۇشتەرىمەن كارانتيندىك اۋماقتى پاترۋلدەۋ تاپسىرىلدى، - دەدى قالا اكىمىنىڭ ورىنباسارى م. يساحوۆ.
سونداي-اق، بريفينگتە ءسوز العان شىمكەنت قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى المات قوساليەۆ قالا تۇرعىندارىنا كارانتين تالاپتارىن ورىنداپ، ماماندار ۇسىنعان نۇسقاۋلىقتارعا ءجىتى قۇلاق اسۋعا كەڭەس بەردى.
– تۇرعىندارعا ايتارىمىز، ۇيدەن شىقپاي، سابىرلىق ساقتاپ، تۇسىنىستىكپەن قاراپ، شەكتەۋلەردى مۇلتىكسىز ورىنداۋعا سىزدەردى شاقىرامىن، - دەدى ول ءوز سوزىندە.
شىمكەنت
