ونلاين رەجيمىندە دەرەكتى فيلمدەر كورۋگە مۇمكىندىك بار

2942
Adyrna.kz Telegram

پاندەمياعا بايلانىستى ءبىراز ەلدە كارانتين جاريالانعانى بەلگىلى. قاۋىپتى دەرتتىڭ ءورشۋى سالدارىنان ەلىمىزدەگى توتەنشە جاعداي رەجيمى ۇزارتىلدى. ۆيرۋستى جەڭۋ ءۇشىن ارقايسىسىمىز جوعارى جاۋاپكەرشىلىكپەن ساقتىق شارالارىن بۇلجىتپاي ورىنداپ، ۇيدەن شىقپاۋىمىز كەرەك. كارانتين كەزىندە ۋاقىتتى ءتيىمدى وتكىزىپ، رۋحاني ازىق بولار تىڭ دۇنيەلەردى تاماشالاۋعا، تانىم كوكجيەگىڭىزدى كەڭەيتۋگە، ءوزىڭىزدى دامىتۋعا مۇمكىندىك بار. ماسەلەن قر مادەنيەت جانە سپورت مينيسترلىگىنە قاراستى ورتالىق مەملەكەتتىك كينو-فوتوقۇجاتتار مەن دىبىس جازبالار ءارحيۆىنىڭ www.kfdz.kz  سايتىنا كىرىپ، ءارحيۆتىڭ «التىن قورىنان» تاڭداۋلى دەرەكتى فيلمدەردى كورۋلەرىڭىزگە بولادى. http://kfdz.kz/Film_Online سىلتەمەسىن باسىپ، بەلگىلى رەجيسسەرلاردىڭ بىرەگەي تۋىندىلارىن كورۋگە شاقىرامىز.

نازارلارىڭىزعا ۇسىنىلاتىن فيلمدەر ءتىزىمى.

  1. "تۇركسىب", 1929 ج. تۇسىرىلگەن، رەج. ۆ. تۋرين، "ۆوستوككينو" الماتى وندىرىستىك بىرلەستىگى. دەرەكتى فيلمدە تۇركىستان-ءسىبىر تەمىر جولىنىڭ قۇرىلىسى تۋرالى باياندالادى.

 

  1. " نا بوەۆوە دەجۋرستۆو زاستۋپيت ", 2007 ج.، رەج. ن. رايسوۆ، "NIC" ستۋدياسى. قازاقستان رەسپۋبليكاسىنىڭ قارۋلى كۇشتەرى، قازاقستان رەسپۋبليكاسى ارمياسىنىڭ قۇرىلۋ تاريحى تۋرالى دەرەكتى فيلم.

 

  1. "بورىش، ابىروي، ەرلىك", 2015 ج.، رەج. ن. رايسوۆ، "NIC" ستۋدياسى. دەرەكتى فيلم تاۋەلسىز قازاقستان رەسپۋبليكاسىنىڭ ءبىرىنشى قورعانىس ءمينيسترى، كەڭەس وداعىنىڭ باتىرى، حالىق قاھارمانى، قازاقستان رەسپۋبليكاسىنىڭ ارميا گەنەرالى ساعادات قوجاحمەتۇلى نۇرماعامبەتوۆكە ارنالعان.

 

  1. "ۇلىتاۋ: عاسىرلار جاڭعىرىعى", 1991 ج .، رەج. ا. قاراباەۆ، "قازاقتەفيلم"كينوستۋدياسى تۇسىرگەن. «ۇلىتاۋ» قورىعى تابيعاتىنىڭ سۇلۋلىعى تۋرالى دەرەكتى فيلم.

 

  1. " پريكوسنوۆەنيە ك ۆەچنوستي ", 1966 ج.، رەج. ا. ماشانوۆ، "قازاقفيلم" كينوستۋدياسى تۇسىرگەن. دەرەكتى فيلم 95 جاستاعى ءمۇسىنشى يسااك يتكيندتىڭ شىعارماشىلىعىنا ارنالعان.

 

  1. "التىن ادام", 2010 ج.، رەج. ي. رۋداكوۆا، ەۋرازيا ءبىرىنشى ارناسى. دەرەكتى فيلم ەسىك قورعانىنداعى "التىن ادامعا" ارنالعان.

 

  1. "ساكەن سەيفۋللين", 1964 ج.، رەج. ا. نۇعمانوۆ، "قازاقفيلم" كينوستۋدياسى تۇسىرگەن.

دەرەكتى فيلم جازۋشى ساكەن سەيفۋللينگە ارنالعان.

 

  1. " ساموە دوروگوە ", 1942 ج.، رەج. ا. وۆانەسوۆا، الماتى كينوحرونيكا ستۋدياسى. ۇلى وتان سوعىسى جىلدارىندا ۋكراينادان، بەلورۋسسيادان، رەسەيدەن كەلگەن بالالاردى اسىراپ الىپ، ءوز وتباسىنا قابىلداعاندار تۋرالى دەرەكتى فيلم.

 

9."تەبە، فرونت!", 1942 ج .، رەج.دزيگا ۆەرتوۆ، الماتى كينوحرونيكا ستۋدياسى. ۇلى وتان سوعىسى جىلدارىنداعى قازاقستاندىقتاردىڭ ەرلىگى تۋرالى كينووچەرك.

 

سايتتاعى فيلمدەر ەكى كۇن سايىن جاڭارىپ وتىرادى. قازىرگى تاڭدا ارحيۆ قىزمەتكەرلەرى ەلدەگى جاعدايعا بايلانىستى قاشىقتىقتان جۇمىس ىستەۋگە كوشكەن، ءوز جۇمىسىن ۇيدە وتىرىپ ونلاين تۇردە جالعاستىرۋدا. بىرلىگى جاراسقان ارحيۆ ۇجىمى مادەنيەت جانە سپورت مينيسترلىگى باستاعان #ونلايندابول، #بىزبىرگەمىز، #ونەرونلاين اكتسيالارىنا قاتىسىپ، جالپى يگى ىسكە ءوز ۇلەستەرىن قوسىپ كەلەدى.

جۇدىرىق بولىپ جۇمىلا بىلسەك، بارلىق قيىندىقتاردى جەڭەتىنىمىز انىق. ءبىز بىرگەمىز!

 

 

سالتانات سمايلوۆا،

وم كفقدج ا-ءنىڭ ءباسپاسوز حاتشىسى

 

پىكىرلەر