«وسكار» كينوپرەمياسىنا ۇسىنىلعان قازاقستاندىق «كادەت» ءفيلمى نوميناتسيادان الىنىپ تاستالدى. بۇل تۋرالى تۋىندىنىڭ پروديۋسەرى ەرلان بۇقارباەۆ ايتتى، دەپ حابارلايدى «ادىرنا» ءتىلشىسى.
بۇعان دەيىن رەجيسسەر ءادىلحان ەرجانوۆتىڭ «كادەت» ءفيلمى «ۇزدىك حالىقارالىق تولىقمەتراجدى فيلم» اتالىمىندا باق سىنايتىنى ايتىلعان ەدى.
پروديۋستەردىڭ ايتۋىنشا، ءفيلمدى نوميناتسيادان الىپ تاستاۋ شەشىمىنە قازاقستان كينەماتوگرافيستەر ليگاسىنىڭ رەسمي ءوتىنىشى سەبەپ بولعان. ليگا وكىلدەرى وپەراتور ەركىنبەك پىتىراليەۆ ۇلتتىق ىرىكتەۋ كوميسسياسىنىڭ قۇرامىندا بولعاندىقتان، ءوز فيلمىنە داۋىس بەرۋى مۇمكىن دەگەن ءۋاج ايتقان.
«بۇل شىندىققا جاناسپايدى، ءارى وعان رەسمي دالەل بار. دەگەنمەن، بولار ءىس بولدى. كينەماتوگرافيستەر ليگاسى سونشالىقتى الاڭداعان «رەپۋتاتسيالىق تاۋەكەلدەر» شىن مانىندە ونىڭ باسشىسىنىڭ جەكە كوزقاراسى مەن قاراپايىم وشپەندىلىگىنەن تۋىندادى»،—دەدى ەرلان بۇقارباەۆ.
ال كينەماتوگرافيستەر ليگاسى بۇل مالىمدەمەنى تەرىسكە شىعاردى. ۇيىمنىڭ ايتۋىنشا، جىبەرىلگەن حات ناقتى ءبىر فيلمگە نەمەسە تۇلعاعا باعىتتالماعان، ول تەك ۇلتتىق ىرىكتەۋ كەزىندە اشىقتىق پەن مۇددە قاقتىعىسىن بولدىرماۋ قاعيداتىن ساقتاۋعا شاقىرعان.
ەسكە سالايىق، بۇل ءفيلمدى 2024 جىلى Tiger Film كينوكومپانياسى تۇسىرگەن. ۇلتتىق پرەمەراسى 2025 جىلدىڭ قاڭتارىندا ءوتتى. ال حالىقارالىق كورسەتىلىمى توكيو حالىقارالىق كينوفەستيۆالىندە ۇيىمداستىرىلدى.
