سەرىك ەلىكباي: وپپوزيتسيونەر قىزدىڭ عاشىعى

764

ول كىشكەنتاي كەزىنەن ەرەگەسىپ ەر جەتتى...
اكەسى شاعىن اۋىلدىڭ مالىن باعاتىن.
"قازاقي تانىستىق" دەگەن وسى اۋىلدا ەدى.
مۇعالىم بىتكەن-اكىمنىڭ، اقشالىلاردىڭ، قىزمەتتەستەرىنىڭ بالالارىنا عانا جاقسى باعا قوياتىن.
بۇل كۇندە ساباققا دايىندالىپ بارادى.
كۇندە تاپ-تازا جۇرەتىن.
كۇندە توزىڭقى كيىمىن ءوزى جۋىپ، جاماپ الادى...
سىرقات شەشەسى قالعان جەتى بالامەن اۋرە.
اكەسىنىڭ تاپقانى، ماردىمسىز اقشاسى جەتپەيدى - كوپ بالالى شاڭىراققا.
وقۋعا تۇسكەنىندە قۇجات قابىلداپ وتىرعان قىز - ءبارى بەس اتتەستاتتىڭ يەسىنىڭ مەدالسىز ەكەنىنە تاڭ قالعان.
سوڭىنان كەلەر اقشاسى جوق گۇلىم-بوس ۋاقىتىندا ەلدىڭ ەدەنىن جۋىپ، كەشكە رەستورانداردا داياشى بولىپ ىستەدى...
وسىلاي جۇرگەنىندە سۇلتاندى كورگەن.
قازاق تىلىندە شەشەن، بيلىككە قارسى سىمباتتى جىگىت باۋراپ الدى جانىن...
بۇل وكىمەت قۇرۋ كەرەك دەيتىن.
ءبىز بيلىككە كەلۋىمىز كەرەك دەيتىن...
دەيتىن...
سۇلتاننىڭ شاقىرعان بار جيىنىنا باردى.
ءوز پىكىرىن، ماقالالارىن بار سايت، الەم جەلىگە جازا باستاعان.
باسىندا بۇعان ۇقك ادامدارى كەلىپ جولىققان، كەيىن دەكانات ەسكەرتتى.
سودان سوڭ ءتۇن تەكتەس كۇندەر باستالدى.
باسىندا ساسىپ قالعان گۇلىمنىڭ قاسىنا سۇلتان كەلىپ، كومەك قولىن سوزعان.
بۇل دا قۇلاي كونگەن...
ءبارى ءبىر وقۋمەن قوش ايتىسۋعا تۋرا كەلگەن.
سوڭىندا سۇلتان دا سۋسىپ، بوي تارتقان...
بۇنىڭ بەتى دە تورالانىپ قالىپتى...
قالتافوننان سارىلىپ، ساعاتتاپ ىزدەپ ارەڭ تاپقان.
جايىن ايتقان...
ءۇنسىز قالدى...
كەلەسى جولىققاندا شىنىن ايتقان.
مەن ۇيلەنگەنمىن!
ءارى ورگاندا ىستەيمىن...
...جۇرەگى اتقاقتاپ سوقتى!
ارى قاراي ەسىن بىلمەيدى...
ءوز-وزىنە كەلگەندە قاراسا قاسىندا سۇلتاننىڭ ءولى دەنەسى جاتىر.
ەگەر بۇل اسىلىپ ولسە-دەنەسىن الۋعا اكەسىنىڭ اقشاسى جوعىن ويلادى...
سىرتتان..."قازاق بولىپ تۋماعاندا نەتەر ەم" دەگەن ءان ەستىلىپ جاتتى.

 

پىكىرلەر
رەداكتسيا تاڭداۋى