بۇگىندە شەتەلدە ءبىلىم الىپ، عىلىم جولىن قۋالاعان قازاقستاندىقتار كوپ. سونىڭ ءبىرى - مەرۋەرت بيجانوۆا. Oxford University دوكتورانتۋراسىندا ءبىلىم الىپ جۇرگەن جاس عالىم Teaching Fellow اتتى اكادەميالىق لاۋازىمعا يە بولدى.
- اقتاۋدا نازارباەۆ مەكتەبىن تامامداعان ەكەنسىز. اقش-قا ۋنيۆەرسيتەتكە ءتۇسۋدى جوسپارلاپ ءجۇردىڭىز بە؟ اقش-قا كەتۋ جولىڭىزبەن بولىسسەڭىز.
- مەن ماگيستراتۋرانى اقش-تا جالعاستىرۋ تۋرالى شەشىم قابىلداعاندا، باستى ماقساتىم حالىقارالىق دەڭگەيدە مويىندالعان اكادەميالىق ءبىلىم الىپ، جوعارى ءبىلىم بەرۋ سالاسىنداعى زەرتتەۋلەرىمدى تەرەڭدەتۋ بولدى. وسى تۇرعىدا ماعان ەڭ قولايلى اكادەميالىق ورتا رەتىندە پەنسيلۆانيا ۋنيۆەرسيتەتى (University of Pennsylvania, UPenn) ايقىن تاڭداۋ بولدى. UPenn-ءدى تاڭداۋىما بىرنەشە ماڭىزدى سەبەپ اسەر ەتتى. بىرىنشىدەن، بۇل ۋنيۆەرسيتەت ءبىلىم بەرۋ سالاسى بويىنشا الەمدەگى جەتەكشى ورتالىقتاردىڭ ءبىرى سانالادى. اسىرەسە، ءبىلىم بەرۋ ساياساتى (Education Policy), ءبىلىم بەرۋ كوشباسشىلىعى (Educational Leadership) جانە جوعارى ءبىلىمدى باسقارۋ (Higher Education Administration) باعىتتارىنداعى عىلىمي مەكتەپتەرى وتە مىقتى. مەن جوعارى ءبىلىم ساياساتى مەن ۋنيۆەرسيتەتتىك باسقارۋ ماسەلەلەرىن زەرتتەۋگە قىزىقتىم، ال UPenn باعدارلاماسىنىڭ اكادەميالىق باعىتى مەنىڭ عىلىمي مۇددەلەرىممەن تولىق سايكەس كەلدى.
ەكىنشىدەن، ۋنيۆەرسيتەت كاسىبي دامۋعا كەڭ مۇمكىندىكتەر ۇسىندى: زەرتتەۋ جوبالارى، تاعىلىمدامالار، سالالىق ساراپشىلارمەن تىكەلەي جۇمىس ىستەۋ، مانساپتىق قولداۋ. بۇل ماعان تەك تەوريالىق ءبىلىم ەمەس، پراكتيكالىق داعدىلاردى دا جۇيەلى تۇردە مەڭگەرۋگە مۇمكىندىك بەردى. ۇشىنشىدەن، UPenn ليگا پليۋششا قۇرامىنداعى ۋنيۆەرسيتەت. بۇل جوعارى اكادەميالىق ستاندارت، حالىقارالىق بەدەل جانە جاھاندىق تۇلەكتەر جەلىسى ارقىلى اشىلاتىن جاڭا مۇمكىندىكتەر دەگەن ءسوز. وسىنداي ورتادا وقۋ ماعان بۇرىن قولجەتىمسىز بولىپ كورىنگەن اكادەميالىق جانە كاسىبي ەسىكتەردى اشتى.
- قانداي ماماندىقتى ءتامامداپ، قاي سالادا ساباق بەرەسىز؟
- مەن پەنسيلۆانيا ۋنيۆەرسيتەتىندە Educational Leadership ماماندىعى بويىنشا ءبىلىم الىپ، حالىقارالىق ءبىلىم ساياساتى، جوعارى ءبىلىم جۇيەلەرىن باسقارۋ، زەرتتەۋ ءادىسناماسى جانە كوشباسشىلىق داعدىلاردى تەرەڭ مەڭگەردىم. بۇل تاجىريبە كەيىننەن وكسفورد ۋنيۆەرسيتەتىندەگى دوكتورانتۋراعا دايىندالۋىما بەرىك نەگىز قالادى. ال وكسفوردقا ءتۇسۋىم ءجاي كەزدەيسوقتىق ەمەس، ۇزاق جىلدار بويى ماقساتتى تۇردە جاسالعان ەڭبەك پەن جوسپارلى جۇمىستىڭ ناتيجەسى دەسەم بولادى. ماگيستراتۋرا كەزىندە مەن زەرتتەۋ اسسيستەنتى بولىپ جۇمىس ىستەدىم. شىنىمدى ايتسام، ول ورتادا ءار ستۋدەنت زياتكەرلىك تۇرعىدان مىقتى ءارى امبيتسياسى جوعارى كوشباسشى بولاتىن. وسىنداي ورتادا مەن دە ءوزىمدى كۇن سايىن دالەلدەۋدى، سەنىمدىلىكپەن ويلاۋدى جانە الەمدىك دەڭگەيدە جۇمىس ىستەۋدى ۇيرەنسەم كەرەك.
وعان قوسا، مەن ءۇشىن شەشۋشى ءرول اتقارعان فاكتورلار عىلىمي تاجىريبەم مەن كوشباسشىلىق جەتىستىكتەرىم بولدى. مەن Penn Global Student Citizenship Award ماراپاتىنىڭ العاشقى قازاق ايەل لاۋرەاتىمىن. سونىمەن قاتار The William E. Arnold Award, Dr. Andy Binns Leadership Impact Award, Laurie Wagman Award جانە باسقا دا بەدەلدى ماراپاتتارعا يە بولدىم. بۇل جەتىستىكتەر حالىقارالىق اكادەميالىق ورتادا ءوز ورنىمدى سەزىنۋگە ۇلكەن سەنىم بەردى. وسى جەتىستىكتەردەن كەيىن مەن وكسفوردتا وقۋعا لايىقتى سەزىنە الدىم. الايدا وكسفورد پروفەسسورلارىمەن وتكەن سۇحباتتار وتە كۇردەلى ينتەللەكتۋالدىق سىناق بولدى. بۇل فورمالدى اڭگىمە ەمەس، مەنىڭ عىلىمي الەۋەتىمدى تەرەڭ تەكسەرۋگە باعىتتالعان پروتسەسس ەدى. دەگەنمەن پەنسيلۆانيا ۋنيۆەرسيتەتىندە العان تاجىريبەم ماعان كۇردەلى سۇراقتارعا سەنىمدى ءارى ءدال جاۋاپ بەرۋگە مۇمكىندىك بەردى.
قازىرگى تاڭدا مەن وكسفورد ۋنيۆەرسيتەتىندە وقىتۋشى اسسيستەنت (teaching fellow) رەتىندە دە جۇمىس ىستەيمىن. بۇل مەنىڭ اكادەميالىق جولىمداعى ەڭ ماڭىزدى ءارى ەرەكشە كەزەڭدەردىڭ ءبىرى دەسەم ارتىق ايتپاعان بولار ەدىم. وسى قىزمەتكە تاڭدالعانىمدا ارينە ۇلكەن قۋانىش سەزىندىم. ساباق بەرۋ، ستۋدەنتتەرمەن جۇمىس ىستەۋ جانە حالىقارالىق اكادەميالىق ورتادا تاجىريبە جيناۋ مەن ءۇشىن كاسىبي تۇرعىدان اسا قۇندى ۇلكەن مۇمكىندىك.
«كۇنىنە 1000 ءسوز جاتتاۋدى تالاپ ەتتى»
- شەت ءتىلىن قاي جاسىڭىزدان باستاپ ۇيرەنە باستادىڭىز؟
- مەن اعىلشىن ءتىلىن نازارباەۆ زياتكەرلىك مەكتەبىندە وقي باستاعان كەزىمنەن باستاپ ۇيرەندىم. العاشقى كەزەڭدە ءتىلدى ەركىن مەڭگەرمەگەن ەدىم، الايدا ءبىزدىڭ اعىلشىن ءتىلى مۇعالىمدەرى وتە تالاپشىل بولدى. سول ۋاقىتتان ەرەكشە ەستە قالعانى ءبىر مۇعالىمىمىزدىڭ كۇنىنە 1000 ءسوز جاتتاۋدى تالاپ ەتۋى. بۇل كولەم قازىردىڭ وزىندە دە وتە ۇلكەن دەپ سانايمىن. سوعان قاراماستان، ءبىز جوعارى ىنتا مەن جاۋاپكەرشىلىك تانىتىپ، جۇيەلى تۇردە دايىندالدىق. مەكتەپتىڭ جوعارى سىنىپتارىندا، ءتىپتى 10-سىنىپتان كەيىنگى جازعى ءۇش ايلىق دەمالىس كەزىندە دە، كۇن سايىن اعىلشىن ءتىلىن ۇزدىكسىز وقىدىم. وسى ەڭبەكتىڭ ناتيجەسىندە IELTS ەمتيحانىن ءساتتى تاپسىرىپ، مەكتەپتى وتە جاقسى كورسەتكىشتەرمەن اياقتادىم.
باكالاۆرياتتى نازارباەۆ ۋنيۆەرسيتەتىندە وقىعان كەزەڭدە اعىلشىن ءتىلىن كاسىبي جانە ەركىن دەڭگەيدە قولدانا باستادىم، سەبەبى بارلىق وقۋ ماتەريالدارى مەن اكادەميالىق ورتا تولىقتاي اعىلشىن تىلىندە بولدى. ال كەيىن اقش پەن ۇلىبريتانيادا ءبىلىم الۋ ارقىلى اعىلشىن ءتىلى مەن ءۇشىن كۇندەلىكتى ءارى تابيعي قارىم-قاتىناس تىلىنە اينالدى.
- اتا-اناڭىز ءبىلىمدى شەت ەلدە جالعاستىرۋعا قالاي قارادى؟ قازاقستاننىڭ شەكاراسىنان شىعىپ، ءبىلىم الۋ ءاۋ باستا قيىن بولعان شىعار؟
- كەز كەلگەن اتا-انا سياقتى، مەنىڭ اتا-انام دا باستاپقىدا الاڭدادى. اسىرەسە شەتەل تۋرالى ءتۇرلى جاڭالىقتاردى ەستىپ جۇرگەندىكتەن جانە مەن ول كەزدە نەبارى 22 جاستا، ءارى قىز بالا بولعاندىقتان، ۋايىمداعاندارى تۇسىنىكتى ەدى. دەگەنمەن مەن ولارعا ءوز ماقساتىمدى اشىق ءارى ناقتى تۇسىندىرە الدىم دەپ ويلايمىن: حالىقارالىق دەڭگەيدەگى كوشباسشى بولىپ قالىپتاسۋ ءۇشىن، ءبىلىم كوكجيەگىمدى كەڭەيتىپ، جاڭا دەڭگەيدە باسەكەگە ءتۇسۋ ءۇشىن شەتەلدە وقۋىم قاجەت ەكەنىن ايتتىم. بىراق مەن ءوزىمدى ولاردىڭ الىندا جاۋاپتى، ءتارتىپتى ادام رەتىندە دالەلدەي الدىم دەپ ويلايمىن. اتا-اناما ءار قادامىمنىڭ ويلاستىرىلعانىن، قاۋىپسىزدىك پەن وقۋىمدى ءبىرىنشى ورىنعا قوياتىنىمدى جەتكىزدىم. ۋاقىت وتە كەلە ولار مەنىڭ شەشىمىمە سەنىم ءبىلدىرىپ، تولىق قولداۋ كورسەتتى. بىراق شەتەلدە ءبىلىم الۋ جولى باستاپقىدا وڭاي بولعان جوق، بىراق اتا-انامنىڭ سەنىمى مەن قولداۋى ماعان ۇلكەن كۇش بەردى.
«مەكتەپتە التىن بەلگى الا الماعانىم سەنىمدى السىرەتتى»
- ۇلكەن ەلدە دامۋ, ورتا تابۋ قيىن بولدى ما? ءوز تاجىريبەڭىزدەن ستۋدەنتتىك ەستەلىكتەرىڭىزبەن بولىسسەڭىز.
- اكادەميالىق تۇرعىدان العاندا، ەڭ ماڭىزدى بەيىمدەلۋ كوپمادەنيەتتى ورتادا وقۋ قاجەتتىلىگىمەن بايلانىستى ەدى. ساباقتا ءارتۇرلى ەلدەردەن كەلگەن ستۋدەنتتەردىڭ كوزقاراستارى، ومىرلىك تاجىريبەلەرى مەن قۇندىلىقتارى قاتار توعىستى. تالقىلاۋلار تەك ءبىلىم بەرۋ ماسەلەلەرىمەن شەكتەلمەي، ساياسات، الەۋمەتتىك ادىلەتتىلىك، تەڭسىزدىك جانە ءار ەلدىڭ كونتەكستىندەگى جۇيەلىك پروبلەمالاردى قامتىدى. وسىنداي ورتادا شىنايى ءتۇسىنۋ ءۇشىن تەرەڭ تىڭداۋ، سانالى سۇراقتار قويۋ جانە ءوز وي-ءورىسىمدى كەڭەيتۋ قاجەت بولدى.
مەن ءۇشىن ءبىر عانا «ەڭ ۇلكەن قيىندىقتى» ءبولىپ ايتۋ قيىن، سەبەبى ءاربىر تاجىريبە مەنى بەلگىلى ءبىر دەڭگەيدە شىڭدادى. دەگەنمەن، ومىرىمدە ەرەكشە ەستە قالعان ساتتەردىڭ ءبىرى مەكتەپتە التىن مەدال الا الماعانىم. ول كەزدە قاتتى كوڭىلىم قالدى، وزىمە دەگەن سەنىمىم السىرەدى. اتا-انام دا، اينالامداعى ادامدار دا بۇل ناتيجەنى كۇتكەن ەدى، مەن دە سوعان كوپ ەڭبەك ءسىڭىردىم. كەيبىر ماراپاتتاردىڭ ادىلەتسىز بەرىلگەندەي كورىنۋى ىشكى نارازىلىق تۋدىردى. سول ساتتە «وندا نە ءۇشىن تىرىسۋ كەرەك؟» دەگەن وي دا كەلگەنى راس. الايدا ۋاقىت وتە كەلە بۇل كەزەڭگە باسقاشا كوزقاراسپەن قاراي باستادىم. قازىر تۇسىنگەنىم — ناعىز قۇندىلىق ماراپاتتا ەمەس، بىلىمدە، تاباندىلىقتا جانە ءوز كۇشىڭە دەگەن سەنىمدە ەكەن.
ەكىنشى اۋىر سىناق پاندەميا كەزەڭىمەن تۇسپا-تۇس كەلدى. باكالاۆرياتتا وقىپ ءجۇرىپ، جازعى كۋرستاردى اياقتاعان ساتتە اتا-انام مەن وتباسىمنىڭ دەنساۋلىعىنا قاتىستى الاڭداۋشىلىقتار بولدى. ۇيقىسىز تۇندەر، ەمتيحاندار، كىنا مەن السىزدىك سەزىمى بۇل كەزەڭدى ەموتسيونالدىق تۇرعىدان وتە اۋىر ەتتى. كەيىن اقش-تا جالعىز ءوزىم جاڭا ەلگە كوشۋ، باسپانا ىزدەۋ، تۇرمىستىق ماسەلەلەردى شەشۋ، جاڭا اكادەميالىق جۇيە مەن مادەنيەتكە بەيىمدەلۋ دە وڭاي بولعان جوق. العاشىندا جالعىزدىق پەن ىشكى كۇيزەلىس سەزىلدى، الايدا ۋاقىت وتە كەلە بۇل قيىندىقتاردى ءوسۋ مەن تاۋەلسىزدىككە اپارار مۇمكىندىك رەتىندە قابىلداۋدى ۇيرەندىم. اكادەميالىق ورتادا، اسىرەسە پەنسيلۆانيا ۋنيۆەرسيتەتىندە وقىعان كەزدە، وزىمە قوياتىن ىشكى تالاپ وتە جوعارى بولدى. قازاقستاندا العان ءبىلىمىمنىڭ گارۆارد، پرينستون نەمەسە وكسفورد سياقتى جەتەكشى ۋنيۆەرسيتەتتەردەن شىققان تۇلەكتەردىڭ بىلىمىنەن كەم ەمەس ەكەنىن ۇنەمى دالەلدەپ وتىرۋ قاجەتتىلىگى مەنى ودان ءارى ەڭبەك ەتۋگە، ءوزىمدى مىقتى ورتادا سىناۋدان قورىقپاۋعا يتەرمەلەدى.
تاعى ءبىر اۋىر كەزەڭ اقش-تا وقىپ جۇرگەندە اجەمنەن ايىرىلۋىم بولدى. سول ساتتە جاقىندارىمنىڭ جانىندا بولا الماۋ ەموتسيونالدىق سالماقتى ەسەلەپ ارتتىردى. بىراق ءومىردىڭ ءوزى ءمىنسىز ەمەس، ونىڭ ءمانى دە وسىندا دەپ ويلايمىن. ماڭىزدىسى — قۇلاۋ ەمەس، قايتا تۇرا ءبىلۋ. وسىنداي تاجىريبەلەر مەنى شىڭداپ، قيىندىقتاردى ءومىردىڭ تابيعي بولىگى رەتىندە قابىلداۋعا ۇيرەتتى.
«تابىستىڭ قۇپيا فورمۋلاسى جوق»
- مۇنداي جەتىستىككە جەتۋدە نەنى ەسكەرۋ كەرەك؟ ءسىزدىڭ جەتىستىگىڭىزدىڭ سىرى نەدە؟
- مەنىڭ ويىمشا، تابىستىڭ قۇپيا فورمۋلاسى جوق. بارلىعىنىڭ نەگىزىندە تەك ەڭبەك، ەڭبەك جانە تاعى دا ەڭبەك جاتىر. مەن ومىرىمدە ەڭبەكسىز ۇلكەن جەتىستىككە جەتكەن ادامدى كورگەن ەمەسپىن. سونىمەن قاتار، باستاۋدىڭ ەشقاشان كەشى دە، ەرتە دە بولمايتىنىنا سەنەمىن. دۇرىس ۋاقىت، دۇرىس مۇمكىندىك جانە دۇرىس ءسات مىندەتتى تۇردە كەلەدى، ەڭ باستىسى سوعان دايىن بولۋ. ەكىنشى ماڭىزدى نارسە ءار قادامىڭدى جوسپارلى ءارى سانالى تۇردە جاساۋ. كەزدەيسوق شەشىمدەردەن گورى، ۇزاق مەرزىمدى ماقساتقا باعىتتالعان ارەكەتتەر ءاردايىم ناتيجەلى بولادى. سونىمەن بىرگە اينالاڭداعى ءارتۇرلى ادامداردان شابىت الىپ، ۇزدىكسىز دامۋعا ۇمتىلۋ وتە ماڭىزدى. الەمدە نە بولىپ جاتقانىنان حاباردار بولىپ، ءوزىڭنىڭ ومىرلىك قۇندىلىقتارىڭ مەن شىنايى ماقساتىڭدى انىق تۇسىنۋگە تىرىسۋ كەرەك.
ال ەڭ باستىسى - ادام بولىپ قالۋ. قانداي بيىك جەتىستىككە جەتسەڭ دە، ەڭ اسىل قاسيەت جان دۇنيەڭدەگى مەيىرىمدىلىك. بۇگىنگى الەمگە تەك اقىلدى نەمەسە تابىستى ادامدار عانا ەمەس، اقىلدى ءارى مەيىرىمدى، جاۋاپكەرشىلىگى جوعارى كوشباسشىلار قاجەت دەپ ويلايمىن.
- الداعى ۋاقىتتا قازاقستانعا كەلۋ جوسپارى بار ما؟
- ءيا، مەنىڭ الداعى ماقساتتارىم قازاقستانمەن جانە وڭىردەگى جوعارى ءبىلىم بەرۋ جۇيەسىمەن تىعىز بايلانىستى. مەن العان ءبىلىمىم مەن عىلىمي تاجىريبەمدى قازاقستان جانە پوستكەڭەستىك كەڭىستىكتەگى ۋنيۆەرسيتەتتەردى زەرتتەۋ ۋنيۆەرسيتەتتەرىنە اينالدىرۋ جولىندا ناقتى قولداۋ قۇرالى رەتىندە قاراستىرامىن. ءداستۇرلى تۇردە كوپتەگەن ۋنيۆەرسيتەتتەردىڭ نەگىزگى ميسسياسى وقىتۋعا باعىتتالعان بولسا، بۇگىنگى تاڭدا ولار ءۇش ماڭىزدى مىندەتتى قاتار اتقارۋى ءتيىس: ساپالى ءبىلىم بەرۋ، جوعارى دەڭگەيلى عىلىمي زەرتتەۋلەر جۇرگىزۋ جانە قوعامعا قىزمەت ەتۋ. مەنىڭ دوكتورانتۋراداعى زەرتتەۋىمنىڭ باستى ماقساتى ۋنيۆەرسيتەتتەرگە عىلىمي زەرتتەۋدى نەگىزگى ينستيتۋتسيونالدىق ميسسياعا ءتيىمدى ەنگىزۋگە كومەكتەسەتىن ستراتەگيالار مەن پراكتيكالىق ۇسىنىستار ازىرلەۋ. بۇل اكادەميالىق جۇمىستىڭ ساپاسىن ارتتىرۋعا، تۇراقتى زەرتتەۋ ەكوجۇيەسىن قالىپتاستىرۋعا جانە وقىتۋ مەن زەرتتەۋ اراسىنداعى تەپە-تەڭدىكتى ساقتاۋعا مۇمكىندىك بەرەدى. مۇنداي ناتيجەلەر تەك قازاقستان ءۇشىن عانا ەمەس، ءدال وسىنداي ترانسفورماتسيا كەزەڭىنەن ءوتىپ جاتقان وڭىردەگى جانە حالىقارالىق دەڭگەيدەگى ۋنيۆەرسيتەتتەر ءۇشىن دە وزەكتى.
جەكە ماقساتتارىما كەلەر بولسام، مەن ءوزىمدى ۇلكەن جاۋاپكەرشىلىك جۇگىن ارقالاپ جۇرگەندەي سەزىنەمىن. الەمدىك دەڭگەيدە تانىلعان زەرتتەۋشى ءارى پروفەسسور بولۋدى ارماندايمىن. شەتەلدە وقىپ، جۇمىس ىستەي ءجۇرىپ ءتۇرلى ستەرەوتيپتەر مەن كەدەرگىلەرگە تاپ بولدىم، بىراق بۇل تاجىريبەلەر مەنى كەرىسىنشە شىڭداپ، كوشباسشىلىق قاسيەتتەرىمدى نىعايتتى جانە قازاقستاننىڭ اتىن حالىقارالىق اكادەميالىق كەڭىستىكتە تانىتۋعا دەگەن ۇمتىلىسىمدى ارتتىردى. قازىرگى تاڭدا مەنىڭ باستى ماقساتىم العان ءبىلىمىم مەن عىلىمي زەرتتەۋلەرىمدى قازاقستان مەن ءوڭىر ۋنيۆەرسيتەتتەرىنىڭ الەمدىك دەڭگەيدەگى ەڭ مىقتى زەرتتەۋ ۋنيۆەرسيتەتتەرىنە اينالۋىنا ۇلەس قوسۋ ءۇشىن پايدالانۋ. بۇگىندە ۋنيۆەرسيتەتتەردىڭ ميسسياسى تەك وقىتۋمەن شەكتەلمەيدى، ولار جوعارى دەڭگەيلى زەرتتەۋلەر جۇرگىزىپ، قوعامنىڭ دامۋىنا ناقتى اسەر ەتۋى ءتيىس. مەن زەرتتەۋ مەن وقىتۋدىڭ تەپە-تەڭدىگىن ساقتاي وتىرىپ، تۇراقتى عىلىمي ەكوجۇيە قۇرۋعا باعىتتالعان ناقتى ستراتەگيالار مەن ۇسىنىستار ازىرلەۋدى كوزدەيمىن. وسى ارقىلى حالىقارالىق اكادەميالىق ىنتىماقتاستىقتى دامىتۋعا، قازاقستان ۋنيۆەرسيتەتتەرىنىڭ جاھاندىق باسەكەگە قابىلەتتىلىگىن ارتتىرۋعا شىن جۇرەكتەن ۇلەس قوسقىم كەلەدى. مەنىڭ جولىم عىلىم مەن ءبىلىم ارقىلى ەلىمنىڭ بولاشاعىن جاقسارتۋ. قانداي جەتىستىككە جەتسەم دە، ول تەك جەكە ماقسات ەمەس، ادامزاتقا تيتتەي بولسا دا وڭ وزگەرىس اكەلۋگە قىزمەت ەتسە دەپ ارماندايمىن.
«جاستارعا شابىت بەرگىم كەلەدى»
- مەنىڭ وكسفوردقا ءتۇسۋىم جەكە جەتىستىك قانا ەمەس، سونىمەن قاتار قازاقستان اكادەمياسى ءۇشىن دە ماڭىزدى قادام دەپ ويلايمىن. ءوز جولىم ارقىلى قازاقستاندىق جاستارعا وزىنە سەنۋگە جانە الەمدىك دەڭگەيدەگى ماقساتتاردان قورىقپاۋعا شابىت بەرگىم كەلەدى. وكسفوردقا قابىلدانعانىمدى ەستىگەن ساتتەگى سەزىمىمدى سوزبەن جەتكىزۋ قيىن.وڭ جاۋاپتى ەستىگەندە، شەكسىز قۋانىش پەن شىنايى ماقتانىش سەزىندىم. بۇل بالا كەزدەن بەرگى ارمانىمنىڭ ورىندالۋى بولدى. دوستارىم دا قاتتى قۋانىپ، قالاي تۇسۋگە بولاتىنىن سۇراي باستاعانى ءالى ەسىمدە. بۇل جاڭالىقتى الەۋمەتتىك جەلىدە بولىسكەنىمدە، قازاقستانداعى كوپتەگەن ادامدار جىلى قابىلداپ، بىردەن تاراتىپ، بۇل ءساتتى مەن ءۇشىن ودان دا ءارى ەرەكشە ەتتى.
- سۇحباتىڭىزعا كوپ راقمەت!
سىمبات ناۋحان
«ادىرنا» ۇلتتىق پورتالى
