10 قاڭتاردا "ايقاپ" جۋرنالىنىڭ العاشقى سانى جارىق كورگەن، دەپ حابارلايدى "ادىرنا" ءتىلشىسى.
«ايقاپ» جۋرنالى 1910 جىلى مۇحامەتجان سەراليننىڭ وتىنىشىنەن كەيىن پاتشا وكىمەتىنىڭ رۇقساتىمەن شىعىپ، 1911 جىلدىڭ قاڭتارىندا ترويتسك قالاسىندا باسىلىپ شىقتى. بۇل باسىلىم قازاق قوعامىندا وقۋ-اعارتۋ، جەر ماسەلەسى، ايەل تەڭدىگى، وتىرىقشىلىق پەن وركەنيەتكە ۇمتىلۋ سياقتى وزەكتى تاقىرىپتاردى العاشقىلاردىڭ ءبىرى بولىپ كوتەردى.
جۋرنالدىڭ باس رەداكتورى ءارى نەگىزگى ۇيىمداستىرۋشىسى مۇحامەتجان سەرالين بولدى. ونىڭ جەتەكشىلىگىمەن «ايقاپ» قازاق دەموكراتيالىق ينتەلليگەنتسياسىنىڭ مىنبەرىنە اينالدى. باسىلىم بەتتەرىندە سۇلتانماحمۇت تورايعىروۆ، سپانديار كوبەەۆ، ءسابيت دونەنتاەۆ سىندى اقىن-جازۋشىلاردىڭ العاشقى ەڭبەكتەرى جاريالانىپ، ولار وسى جۋرنال ارقىلى ەلگە تانىلدى.
پاتشا وكىمەتىنىڭ قاتاڭ تسەنزۋراسىنا قاراماستان، «ايقاپ» قوعامدىق-ساياسي ويدىڭ دامۋىنا ىقپال ەتىپ، ۇلتتىق سانانىڭ ويانۋىنا سەرپىن بەردى. جۋرنال 1915 جىلدىڭ ەكىنشى جارتىسىندا جابىلعان.
