كيريلل كلەيمەنوۆ - ءجاي جازىپ بەرگەندى سۋدىرتىپ وقىپ بەرەتىن قاۋعاباس ديكتور ەمەس، ول رەسەيدىڭ بىلدەي ءبىر باستى تەلەارناسىنىڭ باسشىسىنىڭ ورىنباسارى.
پۋتين بيلەگەن رەسەيدىڭ بەلدى پروپاگانديستەرىنىڭ ءبىرى.
سول كەشە ءبىزدى مەڭزەي وتىرىپ ايتاتىنىن ايتىپ تاستادى. رەسەيدىڭ ميلليونداعان كورەرمەنى تاماشالايتىن اۋقىمدى جانە ازۋلى ارنادان ايتتى.
"قازاقتى كەزىندە عارىش كەمەسىنە وتىرعىزدىق تا كوككە ۇشىردىق", دەدى، " سوسىن وعان عارىش كەمەسىندە ونىڭ ەشنارسەنى شۇقىلاماي تىپ تىنىش وتىرۋىن تاپسىردىق. ء("بارىبىر ەشتەڭەگە ميىڭ جەتپەيدى قۇيرىعىڭدى قىسىپ كوككە ۇشىپ بارىپ كەل، سول اتاق تا جەتەدى سەندەرگە" دەگەنى).
مەنى بۇرىن مىناداي سۇراق مازالايتىن:
بايقوڭىر عارىش ايلاعى قازاق جەرىندە. ودان 1961 جىلدان بەرى عارىشقا پالەن مارتە قانشاما عارىشكەر ۇشتى.
سوۆەت زامانىندا ودان يت تە ۇشتى، دوياركا قاتىن دا ۇشتى، ورىس، ۋكراين، بەلورۋستان پالەن عارىشكەرلەر، ءتىپتى ايدالاداعى گرۋزين مەن ءازىربايجاننان دا عارىشكەرلەر ۇشىپتى.
سوندا ءوز جەرىندە كوسمودروم ورنالاسقان قازاقتان نەگە عارىشكەر ۇشپاعان؟
توقتار اۋباكىروۆ عارىشقا 1991 جىلدىڭ قازان ايىندا عانا ۇشىپتى.
گاگاريننەن كەيىن تۋرا وتىز جىل وتكەن سوڭ.
ونىڭ وزىندە، وسى 1991 جىلدىڭ قازانى دەگەنىمىز سوۆەت ۇكىمەتىنىڭ ولگەن كەزى. ونى ءولتىرىپ كەتكەن 1990 جىلدارى - اق ول وداقتان شىعىپ كەتكەن بالتىق جاعالاۋىنىڭ ەلدەرى بولاتىن. سوۆەت بۇل كەزدە ءبىر اياعىمەن كوردە تۇرعان.
اۋباكىروۆ سول كەزدە عارىشقا ۇشتى.
وعان شەيىن وتىز جىل بويى بايقوڭىردان بىردە ءبىر قازاق ۇشپاپتى.
وسى جايت مەنى بۇرىن قاتتى ويلانتىپ قوياتىن.
"سوندا نەلىكتەن قازاق عارىشقا ۇشپاعان، ول بايعۇس ءوز جەرىندەگى، قوي قوراسىنىڭ توبەسىنە قۇلاپ جاتقان گەپتيل مەن راكەتا كاپسۋلاسىن تاڭىرقاي تاماشالاپ قانا قوي - ەشكىسىن باعىپ جۇرە بەرگەن بە" دەپ قىنجىلاتىن ەدىم.
بۇنىڭ جاۋابىن ورىستىڭ شوۆينيستەرى كەشە وسى كلەيمەنوۆتىڭ اۋىزىمەن بەردى. راقمەت ساعان شوۆينيست كلەيمەنوۆ، شىندىعىڭ ءۇشىن راقمەت.
ولجاس ءابىل
