6 ساۋىردەن باستاپ ەلىمىزدەگى مەكتەپتەر قاشىقتىقتان ءبىلىم بەرۋ جۇيەسىنە كوشۋى ءتيىس. الايدا بۇل ماسەلە جامبىلدا «جۇگى جەڭىل ەسەكتىڭ» كەرىن كەلتىرىپ تۇرعانداي. سەبەبى اۋدان اكىمدەرى اقپاراتتاعى اقپاراتتى جاتقا سوعىپ، تۇيتكىلدىڭ ءتۇيىنىن تارقاتۋدى ەمەس، قۇمعا باستى تىعۋدى ويلاۋدا. بۇل جايىندا وبلىس اكىمى بەردىبەك ساپارباەۆتىڭ توراعالىعىمەن وتكەن جيىندا باسا ايتىلدى. بۇل تۋرالى "ايقىن.كز" حابارلايدى.
جۋىردا بايزاق اۋدانىنا جۇمىس ساپارىمەن بارعان وبلىس اكىمى جەرگىلىكتى مەكتەپتەردىڭ بىرىنە باس سۇعىپ، بىرقاتار جايتتى بارلاعان. الايدا توزىعى جەتكەن پارتالار مەن تاقتالاردا بالالاردىڭ ءالى كۇنگە ساباق وقىپ جاتقانىنا كوزى جەتكەن ايماق باسشىسى، ينتەرنەت تۋرالى سۇراۋدىڭ وزىنە ۇيالعان. مىنە، وسى جايتتى جيىندا بەردىبەك ماشبەكۇلى سىن تەزىنە الدى.
– كوزبوياۋشىلىقپەن اينالىسۋدى توقتاتىڭىزدار. ناقتى احۋالدى كورسەتىڭىزدەر. ايتپەسە، ءبىز جاعدايدى جاقسارتا المايمىز.
تارازعا ءتيىپ تۇرعان بايزاق اۋدانىنداعى مەكتەپتىڭ جايى وسىنداي بولسا، وندا شالعاي اۋماقتار تۋرالى نە ايتۋعا بولادى؟ مەملەكەت باسشىسىنىڭ قاشىقتىقتان وقىتۋعا كوشۋ تۋرالى تاپسىرماسىن قالاي ىسكە اسىرامىز؟ – دەپ وبلىس اكىمى اشۋعا ءمىندى.
ب. ساپارباەۆتىڭ ايتۋىنشا، ءوڭىردىڭ ءبىلىم ساپاسى سىن كوتەرمەيدى، ال قاشىقتىقتان وقىتۋدى ەنگىزگەننەن كەيىن ونىڭ ءتىپتى تومەن دەڭگەيگە قۇلدىراپ كەتۋ قاۋپى بار.
تالداۋ كورسەتكەندەي، كوپتەگەن اۋدان مەكتەپتەرىندە كومپيۋتەرلەر مەن مونوبلوك جەتىسپەيدى، ال 125 اۋىلدىق ەلدى مەكەن ينتەرنەتپەن قامتاماسىز ەتىلمەگەن.
ساياتحان ساتىلعان،
جامبىل وبلىسى.
