6 sáýirden bastap elimizdegi mektepter qashyqtyqtan bilim berý júıesine kóshýi tıis. Alaıda bul másele Jambylda «júgi jeńil esektiń» kerin keltirip turǵandaı. Sebebi aýdan ákimderi aqparattaǵy aqparatty jatqa soǵyp, túıtkildiń túıinin tarqatýdy emes, qumǵa basty tyǵýdy oılaýda. Bul jaıynda oblys ákimi Berdibek Saparbaevtyń tóraǵalyǵymen ótken jıynda basa aıtyldy. Bul týraly "Aıqyn.kz" habarlaıdy.
Jýyrda Baızaq aýdanyna jumys saparymen barǵan oblys ákimi jergilikti mektepterdiń birine bas suǵyp, birqatar jaıtty barlaǵan. Alaıda tozyǵy jetken partalar men taqtalarda balalardyń áli kúnge sabaq oqyp jatqanyna kózi jetken aımaq basshysy, ınternet týraly suraýdyń ózine uıalǵan. Mine, osy jaıtty jıynda Berdibek Mashbekuly syn tezine aldy.
– Kózboıaýshylyqpen aınalysýdy toqtatyńyzdar. Naqty ahýaldy kórsetińizder. Áıtpese, biz jaǵdaıdy jaqsarta almaımyz.
Tarazǵa tıip turǵan Baızaq aýdanyndaǵy mekteptiń jaıy osyndaı bolsa, onda shalǵaı aýmaqtar týraly ne aıtýǵa bolady? Memleket basshysynyń qashyqtyqtan oqytýǵa kóshý týraly tapsyrmasyn qalaı iske asyramyz? – dep oblys ákimi ashýǵa mindi.
B. Saparbaevtyń aıtýynsha, óńirdiń bilim sapasy syn kótermeıdi, al qashyqtyqtan oqytýdy engizgennen keıin onyń tipti tómen deńgeıge quldyrap ketý qaýpi bar.
Taldaý kórsetkendeı, kóptegen aýdan mektepterinde kompıýterler men monoblok jetispeıdi, al 125 aýyldyq eldi meken ınternetpen qamtamasyz etilmegen.
Saıathan Satylǵan,
Jambyl oblysy.
