باتا – قازاق حالقىمەن عاسىرلار بويى بىرگە ءومىر ءسۇرىپ كەلە جاتقان قاسيەتىن، قادىرىن جوعالتپاعان.
قايتا جىلدار وتكەن سايىن جاسارىپ، جاڭارىپ، ۇرپاق ساناسىندا جاڭعىرىپ كەلە جاتقان كيەلى ۇعىم. قازاق جاڭا تىرلىك باستاعاندا، ساپارعا شىعارىندا، ءتىپتى، ەل قورعاعان باتىرلاردىڭ ءوزى جورىققا شىعاردا سول ەلدىڭ باتاگوي قاريالارىنان تىزەرلەپ وتىرىپ باتا العان. باتاعا، ارۋاققا تولىق سەنگەن، قاستەرلەگەن، ءپىر تۇتقان، ارداقتاعان حالىقپىز. قانشا قيىندىق كورسە دە، نەبىر قيىن-قىستاۋ جاۋگەرشىلىك قيلى-قيلى زاماندى باسىنان وتكىزسە دە، جەر بەتىنەن جويىلىپ كەتپەگەن. سول باتانىڭ كۇشىمەن وركەن جايعان، ۇرپاق وسىرگەن، بىلەكتىڭ كۇشىمەن، نايزانىڭ ۇشىمەن، استىنداعى باعا جەتپەس بايلىعىمەن وسىنشاما جەردى يەمدەنگەن باتىر حالىقپىز. حالقىمىز «باتامەن ەر كوگەرەدى، جاۋىنمەن جەر كوگەرەدى» دەپ تەگىن ايتپاعان.
باتا – حالقىمىزدىڭ مادەني-رۋحاني مۇراسى، ۇلتتىڭ اسىلى، يگىلىگى، ءومىر ازىعى، ونەگەسى، قوزعاۋشى كۇشى، ۇيىتقىسى، بەرەكەسى، بىرلىگى، ەلىمىزدە اتقارىلىپ جاتقان يگى ىستەردىڭ قۇتتى قادامى.
حالقىمىزدىڭ باتانى ءپىر تۇتقان، قۇرمەتتەگەن، سەنگەن اسىل قاسيەتىن ەلباسىمىز نۇرسۇلتان ءابىشۇلى نازارباەۆ تا جالعاستىرىپ كەلە جاتىر. حالقىمىز «قىرىقتىڭ ءبىرى – قىدىر» دەگەن، پرەزيدەنتىمىز العاشقى سايلاۋالدى ناۋقانى كەزىندە ەلىمىزدىڭ قىرىق دۋالى اۋىز، باتاگوي قاريالارىن جيناپ باتا الۋى، ءوز جۇمىسىن باستاۋى ناعىز كورەگەندىك، اتا سالتىن، عۇرپىن ساقتاۋدىڭ، قۇرمەتتەۋدىڭ ايعاعى ەمەس پە؟!
العاشقى پرەزيدەنتتى ۇلىقتاۋ راسىمىنەن كەيىن ەلىمىزگە تانىمال قوي شارۋاشىلىعىن وركەندەتۋدىڭ مايتالمانى، سوتسياليستىك ەڭبەك ەرى جولسەيىت مولداسانوۆ:
– ءاۋمين دەسەڭ مىنە باتا،
نۇرەكە، دارىسىن باسىڭا قىزىر اتا.
قىزىرىڭ قيالاسىن،
باسىڭا باق-داۋلەت ۇيالاسىن.
ويعا بارساڭ ويدان الىپ،
قىرعا بارساڭ قىردان الىپ.
قازاق حالقىنىڭ اتىن الەمگە تانىت، – دەپ باتا بەرگەنى بەلگىلى.
اقساقالدىڭ سول باتاسى پەرىشتەنىڭ قۇلاعىنا شالىنىپ، مىنە قازاقستاندى باسقارىپ وتىرعان نۇرسۇلتان ءابىشۇلىن دۇنيەجۇزى تانيتىن بولدى. دۇنيەجۇزىندە ابىرويى بار، ۇلكەن بىتىمگەرشىلىك قاسيەتى بار، الىپ تۇلعاعا اينالدى. ەكونوميكامىز قارىشتاپ دامىپ، حالقىمىزدىڭ ءال-اۋقاتى جاقسارىپ، ەكونوميكالىق قيىنشىلىققا ۇشىراتپاي، ءوسىپ-ونگەن، ءال-اۋقاتى مىقتى وتىز ەلدىڭ قاتارىنا قوسىلۋعا تالپىنىپ جاتىرمىز. «ۇلىق بولساڭ، كىشىك بول» دەپ حالقىنان باتا العان ەلباسىمىز جۇمىس ساپارىمەن الماتى وبلىسىنا كەلگەندە ەكى رەت جولسەيىت مولداناسوۆتىڭ ۇيىنە كىرىپ سالەم بەرىپ شىعىپتى. بۇل ەلباسىمىزدىڭ قاراپايىمدىلىعىنىڭ، ءوزى باتاسىن العان ەلدىڭ اقساقالىنا دەگەن قۇرمەتى ەمەس پە! كەيىن نۇرەكەڭنىڭ وتىرعان ورىندىعىنا ەل باسقارىپ جۇرگەن ازاماتتاردىڭ وزدەرى كەلىپ، ارنايى وتىرىپ، كورشى-قولاڭ، اعايىن-تۋىس بالالارىن اكەلىپ وتىرعىزىپ كەتەتىن بولدى، – دەپ ەسكە الادى جولسەيىت مولداسانوۆ اقساقالدىڭ نەمەرە ءىنىسى ءمالي جاپاقۇلى ءوز ەستەلىگىندە.
مىنە، ەلباسى نۇرسۇلتان ءابىشۇلىنىڭ بويىنداعى باتانى، ەلدىڭ ءبىرتۋار ازاماتتارىن، ەلدىڭ اسىلدارىن قۇرمەتتەيتىن قاسيەتىن قىزىلوردا وبلىسىنىڭ اكىمى، ەلباسىنىڭ سەنىمدى سەرىگى قىرىمبەك ەلەۋۇلى كوشەرباەۆ جالعاستىرىپ كەلە جاتىر. ءبىزدىڭ سىر ەلىنىڭ ەل باسقارعان ازاماتتارىنىڭ دارىندى، ەلگە بەلگىلى ازاماتتارى بۇكىل قازاقتىڭ ابىرويىن قارا نارداي ورگە سۇيرەگەن، دالا اكادەميگى اتانعان ەكى مارتە سوتسياليستتىك ەڭبەك ەرى ىبىراي جاقاەۆ اتامىزدان باتا الۋ ءداستۇرىن جالعاستىردى. قىرىمبەك ەلەۋۇلىنىڭ اكەسى ەلەۋ اعامىز دا كوپ جىل ەل باسقارعان، سىردىڭ تەكتى، ابىرويلى ازاماتتارىنىڭ ءبىرى ەدى. قىرىمبەكتىڭ جاس كەزىنەن-اق العىرلىعىن، اقىل-پاراساتىن بايقاپ، ەل ارالاعان كەزىندە وزىمەن بىرگە الىپ ءجۇرىپ، سىر ءوڭىرىنىڭ بەلگىلى ازاماتتارىنا، باتاگوي قاريالارىنا بالاسىنا باتا بەرگىزىپ، ەلدىڭ وت اۋىزدى، وراق ءتىلدى قاريالارىنىڭ اڭگىمەسىن تىڭداتادى ەكەن. قىرىمبەك جوعارعى وقۋ ورنىن ءبىتىرىپ، قىزمەتتى كومسومولدان باستاعان كەزىندە ارنايى كەلىپ، ىبىراي اتاسىنىڭ باتاسىن العان ەكەن. مىنە، بۇگىن اتادان باتا العان قىرىمبەك ەلەۋۇلى ءۇش وبلىستى باسقاردى. سىر بويىنا كەلگەلى ءوزىنىڭ ەل باسقارۋداعى باي تاجىريبەلەرىن، ءبىلىمىن، قابىلەتىن تۋعان ەلىن كوركەيتۋگە، دامىتۋعا ارناپ جاتىر. قىزىلوردا وبلىسى بۇرىنعى جىلدارى ءوزىنىڭ ەكونوميكالىق، الەۋمەتتىك سالالاردىڭ دامۋى بويىنشا رەسپۋبليكادا سوڭعى ورىندا بولسا، قازىرگى تاڭدا كوپ كورسەتكىشتەر جونىنەن الدىڭعى ۇشتىكتەن ورىن الۋدا. سوڭعى ەكى جىلدا قىزىلوردا وبلىسى ادام باسىنا شاققانداعى الەۋمەتتىك سالاعا جۇمسالاتىن شىعىستار كولەمى بويىنشا رەسپۋبليكادا ءبىرىنشى ورىندا. اكىمنىڭ باستاماسىمەن وبلىستا VII رەت بايقوڭىر ينۆەستيتسيالىق فورۋمى وتكىزىلىپ، 333 ملرد تەڭگەنى قۇرايتىن 31 جوبا حالىقارالىق قارجى ۇيىمدارى جانە «مەملەكەتتىك جەكەمەنشىك ارىپتەستىك» نەگىزىندە ىسكە اسىرۋ جوسپارلانىپ وتىر. دۇنيەجۇزىندەگى داعدارىس كەزەڭىنە بايلانىستى رەسپۋبليكادا مۇناي ءوندىرۋ كۇرت تومەندەپ، ونىڭ 2,6 ملن تونناسى قىزىلوردا وبلىسىنىڭ ەنشىسىندە بولعاندىقتان وبلىس اكىمى سىر ءوڭىرىنىڭ بولاشاعى مەتاللۋرگيا ونىمدەرىنە بايلانىستى بولاتىنىن بولجادى. سىر وڭىرىندەگى بالا ساۋىسقاندىقتاعى ۆاننادي وندىرەتىن «بالاۋسا»، پوليمەتالل وندىرەتىن شالقيا كەن ورىندارىن دامىتۋدى ينۆەستورلار ارقىلى قولعا الىپ، كەلەشەكتە سول كەن ورىندارىندا جۇمىس ىستەيتىن ماماندار دايارلاۋعا رەسەيدىڭ موسكۆا جانە سانكت-پەتەربۋرگ قالاسىنىڭ جوعارعى وقۋ ورىندارىندا گرانتپەن 321 سىر ءوڭىرىنىڭ جاستارى ءبىلىم الىپ جاتقاندىعى وبلىس اكىمىنىڭ سىر ەلىنىڭ بولاشاعىنا دەگەن پەرزەنتتىك قامقورلىعى ەمەس پە؟
ءبىر كەزدەرى وبلىستا ىبىراي جاقاەۆتىڭ ورتالىقتا تۇرعان ءمۇسىنى الىنىپ، قالانىڭ ءبىر تۇكپىرىنە اپارىپ قويىلعان بولاتىن. قىرىمبەك ەلەۋۇلى ءوزى كەلىسىمەن ى.جاقاەۆتىڭ ءمۇسىنىن قايتادان ورتالىق الاڭعا اكەلىپ ورناتىپ، ارۋاقتى قاستەرلەيتىن، حالىقتىڭ تاعزىم ەتەتىن قاسيەتتى ورنىنا اينالدىردى. وسى جەردەن «ەڭبەك اللەياسىن» اشتى. شارادان كەيىن اتانىڭ ارۋاعىنا اس بەرىلىپ، قۇران باعىشتالدى. بۇل شارا باتاگوي اتانى قۇرمەتتەۋدىڭ، باتانى ارداقتاۋدىڭ شىنايى كورىنىسى بولدى.
سابەڭ دە باتا العان ەكەن
قازاقتىڭ اتاقتى جازۋشىسى ءسابيت مۇقانوۆ ءوزىنىڭ ى.جاقاەۆ تۋرالى ايگىلى «سىرداريا» رومانىن جازعان كەزدە ءبىر جىلعا جۋىق كوكتەمگى جەر ايداۋ، تىرمالاۋ، كۇرىش سەبۋ، سۋعا باستىرۋ، سۋدا ۇستاۋ مەن سۋدى توقتاتىپ، كۇرىشتىڭ ءپىسۋ داۋىرىندە جانە وراق ناۋقانىن اياقتاپ، سۇدىگەر جىرتۋدى ءوز كوزىمەن كورىپ، بارىپ الماتىعا قايتقان ەكەن. جاقاەۆ اۋىلىنداعى وسى كۇنگى قويشىباي ورازىمبەتوۆ كوشەسىنىڭ اياعىنداعى كولدىڭ جاعاسىنا كولحوز ارنايى قاراشا ءۇي تىگىپ، سوندا دەمالىپ جاتادى ەكەن. بىراق، كۇندە تاڭەرتەڭ تاڭعى شايدى ىبىرايمەن بىرگە ءىشىپ، ول كىسىنىڭ باتاسىن الادى ەكەن، دەپ وقيعانى كوزىمەن كورگەن ىبىرايدىڭ باتاسىن تاڭعى شايدا بىرگە العان بۇرىنعى قىزىلتۋ كولحوزىنىڭ مەحانيزاتورى، قازىرگى تاڭدا بايسىن اۋىلىنىڭ باتاگوي اقساقالى ىسقاق ماقاشەۆ بىلاي ەسكە الادى: – جاس كەزىم، كولحوزدا مەحانيزاتوردىڭ كومەكشىسىمىن. بىردە تاڭەرتەڭ كولحوزعا كەلسەم، جامساپ دەگەن تراكتور بريگاديرىمىز بار بولاتىن. جاستارعا قاراپ – كولحوزعا ءبىراز ۋاقىتتان بەرى قازاقتىڭ اتاقتى جازۋشىسى ءسابيت مۇقانوۆ كەلىپ، ىبەكەڭ تۋرالى كىتاپ جازامىن دەپ ەلمەن، حالىقپەن ارالاسىپ جاتىر. كۇندە تاڭەرتەڭ شايدى ىبەكەڭمەن بىرگە ءىشىپ، باتاسىن الادى ەكەن. سەندەر دە ءجۇرىپ ىبەكەڭنىڭ باتاسىن الىڭدار، ءارى جازۋشىنى كورىپ قايتاسىڭدار دەگەسىن 5-6 جىگىت جامساپقا ەرىپ بارساق، ەكەۋى شايدى ءىشىپ بولۋعا جاقىنداپ قالعان ەكەن. ءبىز نان اۋىز ءتيىپ بولعاسىن ءسابيت مۇقانوۆ: – جاس جىگىتتەر ەكەن، مەن كۇندە تاڭەرتەڭ ىبەكەڭە سالەم بەرىپ، باتاسىن الامىن، سەندەر دە بىرگە قول جايىڭدار، – دەپ ىبەكەڭنەن باتا سۇرادى. جايمەن عانا بەردى. اياق جاعىندا ەلدىڭ الدى بولىڭدار دەگەن جاعىن ەستىپ قالدىم. قۇدايعا شۇكىر جامان بولعانىم جوق. ەلدىڭ الدى بولدىم دەپ تە ايتۋىما بولادى. جاسىم 84-كە كەتىپ بارا جاتىر. بالا-شاعام، باۋ-شارباعىم امان. اتادان باتا العاسىن با، باتانى كوڭىلىمە مەدەت قىلىپ ارداقتاعاسىن با ءومىرىم جامان بولعان جوق. اللاعا شۇكىر دەپ بالا-شاعامنىڭ قىزىعىن كورىپ وتىرعان جايىمىز بار، – دەپ ءسوزىن اياقتادى. سول جىلى قىسقا قاراي ىبەكەڭ جولى ءتۇسىپ الماتىعا بارسا سابەڭ ۇيىنە قوناققا شاقىرىپتى. استان كەيىن ءسابيت ىبەكەڭە بولمەلەرىن ارالاتىپ كورسەتىپتى. ءۇيدىڭ پودۆالى بار ەكەن، وندا قىسقا دايىندالعان سوعىمنىڭ ەتى، ۇيرەك، قاز، قىرعاۋىل، قويان ءبارىنىڭ ەتى بار ەكەن. جوعارىعا شىققاننان كەيىن سابەڭ ىبەكەڭە: – بيىل ءسال قوڭتورعايلاۋمىز. كەلىنىمىز ەكەۋمىز ايىنا 3500 سوم ايلىق الامىز، – دەپتى. سوندا ىبەكەڭ جايمەن عانا كۇلىمسىرەپ: – ءسابيتجان-اۋ، سەن مەن تۋرالى كىتاپ جازام دەگەسىن باتانىڭ شۇرايلى جەرلەرىن شىن كوڭىلمەن بەرگەنمىن-اۋ دەيمىن. تۇرمىسىڭ جامان ەمەس ەكەن عوي، – دەپتى.
اقىن دا باتا العان
بيىلعى جىلى تۋعانىنا 125 جىلدىعىن تويلاعالى جاتقان ىبىراي اتامىز 1947 جىلى 171 تسەنتنەردەن ءونىم الىپ دۇنيەجۇزىلىك رەكورد جاساعان، سول كەزدەگى كۇرىشتىڭ وتانى جاپوندىقتار جاعاسىن ۇستاپ، كارىستەر قايران قالعان ەكەن. ال، ءوزىمىزدىڭ عالىمدار كۇمانمەن قاراپ، جوعارعى جاقتان تەكسەرۋلەر باستالادى. تەكسەرۋلەردەن ابدەن شارشاعان ىبەكەڭ: – باسىمدى قاتىرىپ مەنى نەگە كەڭسەگە شاقىرا بەرەسىڭدەر. جەر انە، سۋ انە، ءونىم انە، تەكسەرە بەرىڭدەر. ال مەن ايمانكۇلدىڭ داۋىسىن، نارتايدىڭ ءانىن ساعىندىم، – دەپ كورشى اۋىلعا كەتىپ قالىپتى. ايمانكۇل – ءابدىلدا تاجىباەۆتىڭ اناسى. ول دا ىبەكەڭ بارعان كەزدە قۇشاعىن جايىپ قارسى الىپ، ولەڭدەرىن ىبەكەڭە داۋىستاپ وقىپ بەرەدى ەكەن. سول كەزدە جاس ءابدىلدا دا ىبەكەڭنىڭ باتاسىن الىپ، اقىندىقتىڭ شىڭىنا ۇمتىلىپتى. امانكۇل دە ىبىرايعا جيەن ەكەن. ءابدىلدا دا ىبەكەڭمەن ءتۇپ ناعاشىم دەپ ازىلدەسۋدى جاقسى كورەدى ەكەن.
تۋعان جەرگە تابانىم تيسە،
قارا شالدى ىزدەپ بارامىن.
جاس كەزىمنەن باتاڭدى الىپ،
وسكەن اقىن بالاڭمىن، – دەپ جىرلاۋى دا سول سىيلاستىقتان تۋىنداسا كەرەك. 1971 جىلى 6 ماۋسىمدا 80-گە تولىپ، سوتسياليستىك ەڭبەك ەرىنىڭ ەكىنشى التىن جۇلدىزى بەرىلگەندە ءابدىلدا تاجىباەۆتىڭ اعاسىنىڭ قۋانىشىنا جۇرەگى جارىلىپ، «اعاتاي» دەگەن جۇرەكجاردى لەبىزىندەگى:
سەكسەنگە جەتتىڭ قارتايدىڭ،
سوندا دا كەلگەن جوق ءالى جانتايعىڭ.
باۋىرىم سىمباتىڭ نەتكەن سوم ەدى،
سۇڭقىلداپ تۇرعان سەكىلدى جىرى
نارتايدىڭ،
توپىراقتىڭ، سۋدىڭ، جارىقتىڭ،
سىرىنا قانىق كيەلىم،
مەن دە بۇگىن سەكسەنگە كەلگەن تويىڭدا،
اق قىراۋ باسىپ شارشاعان باسىمدى
الدىڭدا تۇرىپ يەمىن، – دەۋى اعاسىنا دەگەن شەكسىز قۇرمەتتىڭ، سىيلاستىقتىڭ بەلگىسى بولسا كەرەك. بۇل فانيدە سىيلاسىپ وتكەن اقىن جۇرەك پەن قازاقتىڭ ابىرويىن ورگە سۇيرەگەن باتاگوي جۇرەك، ءبىرى اعاتايلاپ، ءبىرى باۋىرىم دەپ جانىنا تارتىپ، قول ۇستاسىپ، بىرگە جۇرگەن شىعار...
باسىنان سيپاعاندار باقىتتى
سىر بويىنىڭ ارداقتى ازاماتى، سەكسەننىڭ سەڭگىرىنە قادام باسىپ، ەلدىڭ باتاگوي قارياسىنا اينالىپ وتىرعان سەيىلبەك شاۋحامانوۆ اعامىز 1989 جىلى 23 تامىزدا شيەلى اۋدانىنا اۋداندىق پارتيا كوميتەتىنىڭ ءبىرىنشى حاتشىسى بولىپ سايلانعاننان كەيىن بيۋرو مۇشەلەرىن الىپ قالىپ، جابىق بيۋرو وتكىزىپ، بيۋرودا: – مەن قىزمەتتى باستاعاندا ىبىرايدىڭ باتاسىن العان اداممىن. سوندىقتان مەنىڭ كابينەتىمدە، جۇمىس ستولىمدا ىبەكەڭنىڭ بەينەسى تۇرۋ ەكەن، – دەپ تاپسىرما بەرەدى. بىراق، وكىنىشكە وراي، بۇكىل شيەلىدەن ىبەكەڭنىڭ بيۋستى تابىلماي كورشىلەس جاڭاقورعان اۋدانىنان تابىلعان ەكەن. سول داۋىردە ءبىزدىڭ اۋداندا ىبەكەڭدى قۇرمەتتەۋدىڭ، ونى ناسيحاتتاۋدىڭ ءوز دارەجەسىندە ەمەس ەكەنىن اتامىزدىڭ 85 جاسقا تولعان تويىندا قازاقتىڭ اقيىق جازۋشىسى ءازىلحان نۇرشايىقوۆ مىنبەردە تۇرىپ، سول كەزدەگى اۋداندىق پارتيا كوميتەتىنىڭ حاتشىسى و.بايىمبەتوۆكە قاراپ: – ورەكە، ءسىزدىڭ اۋداندا ىبىرايدى قۇرمەتتەۋ ءبىزدىڭ جازىلبەكتى قۇرمەتتەۋگە قاراعاندا ناشار ەكەن. سىزدەر بىزدەردەن كوپ قالىپ قويىپسىزدار، – دەپ ءدوپ باسىپ ايتقان ەكەن.
سەيىلبەك شاۋحامانوۆ ءوزىنىڭ باتا العان، وسكەن، ابىروي العان شيەلىنىڭ كيەلى جەرىنە ايانباي قىزمەت جاسادى. شيەلى اۋدانى سول جىلدارى 15000 گا جەرگە كۇرىش ەگىپ، 500 000 تس كۇرىش بەرەتىن ىرگەلى اۋدانعا اينالدى. اتانىڭ باتاسى، ەلدىڭ ىقىلاسى سەيىلبەك اعامىزدى دا بيىكتەتتى. شيەلى اۋدانىنان ورتالىق پارتيا كوميتەتىنە جاۋاپتى ۇيىمداستىرۋشى، تالدىقورعان وبلاتكوم توراعاسى بولىپ، كوپ جىل قىزىلوردا وبلىسىنىڭ اكىمى بولدى. سەيىلبەك اعامىزدىڭ بويىنداعى ءومىرى وزگەرمەيتىن قاسيەتى – ءوزىنىڭ اتاسى مەن اناسىنان كۇندە تاڭەرتەڭ تۇرعاندا، جۇمىسقا كەتىپ بارا جاتقاندا باتا الادى ەكەن. باتامەن جاتىپ، باتامەن تۇرادى ەكەن. باتامەن ءوسىپ، باتانى ارداقتاعان سەيىلبەك اعامىز دا ءوز بويىنداعى بارلىق اسىل قاسيەتتەرىن حالقىنا اياماي بەرىپ كەلە جاتىر. وبلىستىق ارداگەرلەر كەڭەسى باتانى ناسيحاتتاۋعا ءمان بەرىپ، «اق باتا» كىتابىنىڭ ەكى كىتابى جارىق كوردى. «بىلگەنگە – مارجان، بىلمەگەنگە – ارزان» دەگەن ايدارمەن 107 سۇراققا جاۋابى جانە بىرنەشە كىتاپتاردىڭ اۆتورى. ءوزىنىڭ زامانداستارى ەلدىڭ ءبىرتۋار ازاماتتارى جايلى تولعانىستارى حالىق كوڭىلىنەن شىعۋدا. باتانى قۇرمەتتەۋدىڭ، ارداقتاۋدىڭ بيىك شىڭى ۇلگىسىن سەيىلبەك اعامىزدان كورۋگە بولادى.
1982 جىلدىڭ قوڭىر كۇزى بولۋ كەرەك. مەن ول كەزدە ەڭبەكشى سوۆحوزىندا پارتيا كوميتەتىنىڭ حاتشىسىمىن. سوۆحوز ديرەكتورى جامالحان باەتوۆپەن كورشى تۇرامىز. كەشكىسىن ۇيگە اۋىلدان ماشبەك دەگەن اعامىز كەلىپ ەدى، بىرگە وتىرىپ ءدام تاتىڭىز دەگەسىن باردىم. ماشبەك اقساقال وتە بايىپتى، كورگەن، تۇيگەنى مول ازامات ەكەن. ءتۇننىڭ ءبىر ۋاقىتىنا دەيىن اڭگىمە-دۇكەن قۇردىق. ءسوزدىڭ اراسىندا قاسىندا 5-6 جاسار نۇرلىبەك دەگەن بالاسىنا ىبىرايدىڭ باسىنا تاعزىم ەتىپ، بالامدى اۋناتىپ الايىن دەپ كەلىپ ەدىم، – دەپ ايتىپ قالدى. ۇلكەن بالام بەردىبەك موسكۆادا ديسسەرتاتسيا قورعايىن دەپ جاتىر ەدى، سونى دا مىنا ديرەكتور اعاسىنا ايتايىن دەپ ەدىم، – دەدى. سول اتادان باتا العان بالا نۇرلىبەك بۇل كۇندە قىزىلوردا قالاسىن دوڭگەلەتىپ باسقارىپ وتىر. «قىراننىڭ كوزى قياداعىنى شالادى» دەگەندەي، شيەلى اۋدانىنا اكىم بولىپ كەلىسىمەن ىبىرايدىڭ ەش جەردە ەسكەرتكىش بەينەسى، سىرتتان كەلگەن قوناقتارعا كورسەتەتىن، اتانىڭ ارۋاعىن ارداقتايتىن ەشتەڭە جوق ەكەنىن بايقاپ، بىردەن وبلىس ورتالىعىندا تۇڭعىش پرەزيدەنت اتىنداعى پاركتى ۇيىمداستىرىپ، كوزگە تۇسكەن ەلدىڭ بىلىكتى ازاماتى پەردالى ارقاباەۆتى اۋدانعا الدىرىپ، جاقاەۆ اتىنداعى ساياباقتى جاسادى. ساياباقتىڭ تورىنە ىبىراي جاقاەۆتىڭ بيىكتىگى 3 مەترلىك ەسكەرتكىشىن اكەلىپ ورناتقىزدى. قازىر اتا اتىنداعى ساياباق شيەلىگە كورىك بەرىپ، جاستاردىڭ تاعزىم ەتەتىن، ءتالىم-تاربيە بەرەتىن اۋدانداعى بىردەن-ءبىر تاربيە وشاعىنا اينالدى. بيىلعا كۇرىش ەگۋ الدىندا وبلىس اكىمى قىرىمبەك ەلەۋۇلى كوشەرباەۆ مىرزا بارلىق اۋدان اكىمدەرىن جيناپ، اتا ارۋاعىنا سيىنىپ، قۇران باعىشتاتىپ، اتانىڭ كوزى ءتىرى ءىزباسارى سوتسياليستىك ەڭبەك ەرى 95 جاستاعى شىرىنكۇل قازانباەۆانى الدىرىپ، بۇكىل ديقان قاۋىمىنا باتا بەرگىزىپ، كۇرىش ەگۋدى باستاۋى اتا ارۋاعىن قاستەرلەۋدىڭ، بيىكتەتۋدىڭ ءبىر كورىنىسى بولدى. اتادان باتا العان، باتانى ارداقتاعان، شيەلىدە سايراپ يگىلىكتى ىستەرىنىڭ ءىزى جاتقان، حالىقتىڭ جۇرەگىندە قالعان نۇرلىبەك ءىنىمىزدىڭ اسار اسۋلارى مول بولعاي دەگەن تىلەكتەمىز.
«ايقىن» گازەتىنىڭ ديرەكتورى، باس رەداكتور نۇرتورە ءجۇسىپ قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىنە وقۋعا تۇسكەننەن كەيىن ارنايى الماتىدان ستۋدەنت دوستارى دارحان مىڭباي، ساپارالى بەيبىت بىرگە كەلىپ ىبىرايدان باتا العانىن ءوزى بىلاي ەسكە تۇسىرەدى:
– 1980 جىلدىڭ اقپان ايىندا قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىنىڭ العاشقى كۋرستىڭ ءبىرىنشى جارتىسىن ءبىتىرىپ دەمالىسقا شىقتىق. 90-عا تاياپ قالعان ىبىراي اتامنان كوزى تىرىسىندە باتا السام با دەگەن ويىم بار ەدى. سونى قاسىمداعى بىرگە وقيتىن، بىرگە جۇرەتىن دوستارىم دارحان مىڭباي مەن ساپارالى بەيبىتكە ايتىپ ەدىم، ەكەۋى دە «ءبىز دە بارامىز، بيىلعى دەمالىستى سەنىڭ اۋىلىڭدا وتكىزەمىز» دەدى. سونىمەن ۇشەۋمىز اقپاننىڭ قارلى بورانىندا جاياۋ – جالپى ۆوكزالدان اتامىزدىڭ ۇيىنە كەلدىك. كەلىنى جالعاس ءبىزدى كۇتىپ، اتامىزعا اپارىپ تانىستىرىپ جاتىر. مىنا بالا ءوزىڭىزدىڭ بايتىلەس ءىنىڭىزدىڭ، رابيعا قارىنداسىڭىزدىڭ بالاسى ەكەن. اتى نۇرتورە، قاسىندا دوستارى دارحان، بەيبىت تۋ الماتىدان سىزگە ارنايى باتا الۋعا كەلىپتى دەسە: – تۋ، سوندا الماتىداعى بالالار دا مەنى بىلە مە ەكەن. ويپىرماي، ا؟! – دەدى دە قاسىندا جاقىنداۋ وتىرعان بەيبىتتىڭ يىعىنا قولىن سالىپ، سەن قاي بالاسىڭ، – دەپ جاتىر. بەيبىت: – مەن سەمەيدەن، توبىقتىمىن دەسە، – ءيا، توبىقتى ابايدىڭ ەلى ەمەس پە، ابايدى، قۇنانبايدى كىم بىلمەيدى. بابالاردىڭ ارۋاعى جۇعىستى بولسىن، – دەپ باسىنان سيپادى. دارحاننىڭ قولىنان ۇستاپ وتىرىپ: – دەنەڭ شىمىر، قادامىڭ نىق ەكەن، جامان بولمايسىڭ-اۋ، – دەدى. اراسىندا كەيبىر سوزدەردى ەكى رەت قايتالاپ وتىردى. بىراق، 90-عا جاقىنداعانمەن ءسوزى شيراق، ويى ۇشقىر ەكەن. اراسىندا جالعاس: مىنا نۇرتورە بالاڭىزعا باتا بەرىڭىزشى، – دەپ ەدى: – بۇكىل قازاقتىڭ بالاسى بولسىن، – دەدى. ۇشەۋمىز دە اتانىڭ باتاسى قابىل بولسىن، – دەگەن ىزگى تىلەكپەن، اتادان باتا العانىمىزعا مارقايىپ قايتتىق.
عۇمىر جاسى ۇزاردى
ىبىراي اتاسى تۋرالى سوتسياليستىك ەڭبەك ەرى 95 جاستاعى شىرىنكۇل قازانباەۆا بىلاي دەپ ەسكە الادى: – ءبىزدىڭ ءومىرىمىزدىڭ ءبىراز ۋاقىتى اتامىزبەن قاتارلاس ءوتتى. ءومىردىڭ كوپ قيىندىعىن، اشارشىلىقتى، ۇلى وتان سوعىسىنىڭ وتتى جىلدارىن بىرگە وتكىزدىك. بىرگە ەڭبەك ەتتىك. ءوزى تۋىس بولعاسىن وڭاشادا تاباعىن الىپ، سالەم جاساپ، «كوپ جاسا» دەگەن باتاسىن تالاي الدىق. سول باتاسىنىڭ بىرەۋى پەرىشتەنىڭ قۇلاعىنا شالىنعان با، قازىر جاسىم 95-كە كەلدى. ءومىردىڭ قىزىعىن كورىپ، تاۋەلسىز ەلىمىزدىڭ تىنىس-تىرشىلىگىنىڭ كۋاسى بولىپ، ەلدىڭ باتاگوي قارياسى بولىپ، جاستاردىڭ تىلەۋىن تىلەپ وتىرمىز. وتكەن جىلى وبلىس اكىمى قىرىمبەك ەلەۋۇلى كەلىپ، جاعدايىما بايلانىستى جاڭادان ءۇي سالىپ بەردى. جاڭا ۇيگە كىرگەندە ءىشىنىڭ ءبارىن اۋدان اكىمى قايراتبەك ءىنىم ەكەۋى جاڭا جيھازدارعا تولتىردى. ۇيدەگى كەلىنىم اپامنىڭ توركىندەرى مىقتى ەكەن، – دەپ ازىلدەيدى. اتامىزدىڭ شاپاعاتىمەن بولعان ءبىر تىرلىكتى ايتىپ كەتسەم ارتىق ەمەس شىعار. مەن ءوزى ەكى قىز بالا تۋدىم دا بالادان توقتاپ قالدىم. ءبىر كۇنى ىبەكەڭ وزىنەن ءوزى: – بالام تارشىلىق جاساما. ءجۇمادىلدانىڭ (كۇيەۋىم) ارتىندا ۇرپاق قالسىن، – دەدى. مەن ونى نەگە ايتقانىن تۇسىنىڭكىرەمەي، كوپكە دەيىن ءوزىم دۇنيەگە تاعى پەرزەنت اكەلەتىن شىعارمىن دەپ كۇتىپ ءجۇردىم. بىردە كەشكىسىن ەڭبەكشىدە ءابدى دەگەن جاقىن قايناعام بار ەدى. سول كىسى كەلىپ: – بالام، مەن ەندى ۇزامايمىن. مىنا ابىسىنىڭ ءالى بالا كوتەرەدى. مىنا ىنىمە كۇلبازاردى امانات ەتەمىن. سەن تارشىلىق جاساما، – دەدى. سول كەزدە بارىپ باياعى ىبەكەڭنىڭ ايتقانى ويىما ساپ ەتە قالدى. تۋ جارىقتىق-اي تەگىن ەمەس ەكەنسىڭ عوي دەپ ويلادىم. سول اعامىز كوپ ۇزاماي قايتىس بولدى. جىلى وتكەسىن كۇيەۋىمدى ءوزىم ەرتىپ بارىپ ابىسىنىما قوستىم. ءبىر جىلدان كەيىن شەكەسى تورسىقتاي ۇل بالا تۋدى. كىندىگىن قانتاي دەگەن ابىسىنىم بار ەدى، وزدەرى سىردا تۇراتىن، ءتۇن ىشىندە اتپەن الدىرىپ، سوعان كەسكىزدىم. اتىن اتا اماناتىمەن ارمانىمىزعا جەتتىك قوي دەپ باقىت قويدىم. جارىقتىق پەيىشتىڭ تورىندە جۇرگەن شىعار، – دەپ ءسوزىن اياقتادى.
شىنىندا شىرىنكۇلدىڭ دە كوپ تىرلىگى ەر ازاماتتىڭ تىرلىگىندەي عوي. اللا تاعالا بويىنداعى جاقسى قاسيەتتەرىنە بولا سونشا جاستى، باق-داۋلەتتى، ابىرويدى بەكەر بەرمەگەن عوي. جار توسەگىن قىزعانباي، قورلانباي، ءوز قولىمەن كۇيەۋىن بىرەۋگە اپارىپ بەرۋ ەكىنىڭ ءبىرىنىڭ قولىنان كەلە بەرمەيتىن، سۋرەتتەۋگە ءتىل جەتپەيتىن، تەك شىرىنكۇلدەي التىنداردىڭ عانا قولىنان كەلەتىن، ۇرپاققا ۇلگى، ونەگە بولاتىن عاجايىپ تىرلىك ەمەس پە؟
اتاسىنان باتا العان اتامىزدىڭ كەلىندەرىنىڭ كوبىسى عاسىرعا جۋىق ءومىر ءسۇرىپ وتىر. اتاسىنان باتا العان تالاي جىلدار اۋداندا باسشىلىق قىزمەتتە بولعان اۋداننىڭ «ءبيبىپاتىماسى» اتانعان ۇلمان مامىرەەۆا 94 جاستا، ىبىرايدىڭ جاقىن كەلىنى، تالاي «كوپ جاسا» دەگەن باتاسىن العان ءبيبىحان 96 جاستا، ءومىر بويى ىبىرايدىڭ بريگاديرى بولعان قويشىباي ورازىمبەتوۆتىڭ ايەلى كۇلمارال 93 جاستا، قارىنداسى ابۋقىزى كۇلاجار 90 جاستا. ىبىراي اعاسى تۋرالى نۇرتورە ءجۇسىپتىڭ اناسى رابيعا بايدىلداقىزى بىلاي ەسكە الادى:
– مەن تۋىستىق جاعىنان ىبەكەڭە جاقىن بولعانمەن سولاردىڭ اۋلەتىنە بوقاەۆ ءابۋ اعامىزدىڭ ۇيىنە كەلىن بولىپ ءتۇستىم. سەبەبى، مەنىڭ كۇيەۋىم اتا-اناسىنان جاستاي جەتىم قالىپ، بوقاەۆ ءابۋ اعامىزدىڭ ۇيىندە ەكەن. ءابۋ اعامىزدىڭ ايەلى نارجانوۆا نازگۇل كۇيەۋىمنىڭ اكەسىنىڭ تۋعان اپاسى. ول كەز قيىن زامان عوي. مەن بىردەن ىبىراي اعامىزدىڭ زۆەنوسىنا سۋشى بولىپ جۇمىسقا ءتۇستىم. جاس كەزىمىز عوي، قايراتتىمىز. مەنىڭ جۇمىسقا ىقىلاسىم، كۇش-قايراتىم، ىنتا-جىگەرىم اعاما ۇناعان بولۋ كەرەك. ءومىرى «بالام باقىتتى بول، كوپ جاسا» دەيتىن. مەنىڭ ءومىرىمنىڭ ۇزاق بولعانى، بالا-شاعامنىڭ قىزىعىن كورىپ وتىرعانىم ءبىرىنشى اللادان شىعار، بىراق اعامنىڭ ىقىلاسىنان، باتاسىنان بولدى-اۋ دەپ ويلايمىن. قۇدايعا شۇكىر، الماتى مەن شيەلىنىڭ اراسىن جول قىلىپ، نەمەرەلەردىڭ، بالالاردىڭ، شوبەرەلەردىڭ قىزىعىن كورىپ وتىرمىن. الماتىعا بارسام نۇرتورەم، اۋىلعا كەلسەم بەكتورەم كۇتىپ الادى. كەلىندەردىڭ ايالى الاقانىن كورىپ، اتالارىنىڭ اماناتىن ارقالاپ وتىرمىن. نۇرتورەمنىڭ باعى باسىنان كەتپەسىن، باۋ-شارباعىم امان بولسىن دەپ حاقتان تىلەيمىن، – دەپ ءسوزىن اياقتادى.
1964 جىلى وبلىستا سول كەزدەگى وبلىستىق پارتيا كوميتەتىنىڭ يدەولوگيا جونىندەگى حاتشىسى ق.جارقىنبەكوۆتىڭ، وبلىستىق كومسومول كوميتەتىنىڭ ءبىرىنشى حاتشىسى ا.ايدوسوۆتىڭ باسشىلىعىمەن وبلىستا جاقاەۆشىلار قوزعالىسى بەلەڭ الدى. جاستار مەكتەپ بىتىرىسىمەن كۇرىش ەگۋگە كومسومولدىق جولدامامەن كەتىپ جاتتى. ولاردىڭ بارلىق جەردە ىبىراي اتاسىنان باتا الۋ ءداستۇرى جالعاسىپ جاتتى. جاستاردىڭ اراسىندا ەڭبەككە دەگەن جاڭاشا كوزقاراس، ىنتا-ىقىلاس پايدا بولدى. دۇنيەگە «جاقاەۆشىلار مارشى» ءانى كەلىپ، ول جاستاردىڭ ءسۇيىپ ايتاتىن انىنە اينالدى. وبلىستا پايدا بولعان جاقاەۆشىلار قوزعالىسىنىڭ ناتيجەسىندە ديقان اتاسىنان باتا العان اۋدانىمىزدا ەڭبەك وزاتتارىنىڭ ۇلكەن شوعىرى پايدا بولدى. سەرىكباي بەگاليەۆ، داريحا سەيىتوۆا، كۇنىمحان بايجىگىتوۆا، زۋحرا ساعىندىقوۆا، شاركۇل ءمۇسىلىموۆا، تسوي ماگەلس، زاكيرا ەرجانوۆا، شارانبەك ورىنباەۆ باسقاراتىن كومسومول جاستار بريگاداسى، بەرىكقارا ءابجاپباروۆ، باعلان اشىربەكوۆ، رىسباي ماۋلەنوۆتەر ەل قۇرمەتىنە بولەندى.
وسى ەڭبەك وزاتتارىنىڭ اراسىنان قازىرگى زامان اعىمىنا ىلەسىپ، اۋداندا ۇلكەن ابىرويعا بولەنىپ وتىرعان باعلان اشىربەكوۆ جايلى ايتساق ارتىق بولماس دەپ ويلايمىن. باعلان كەڭەس ۇكىمەتىنىڭ كەزىندە وزات كۇرىششى رەتىندە بلقجو-نىڭ ءحVىىى-ءحىح سەزدەرىنە دەلەگات بولىپ قاتىستى. 1980-84 ج.ج. ارالىعىندا پلەنۋم مۇشەسى بولدى. گاۆانادا وتكەن ستۋدەنتتەر مەن جاستاردىڭ بۇكىلدۇنيەجۇزىلىك فەستيۆالىنە قاتىسقان، «قۇرمەت بەلگىسى» وردەنىڭ يەگەرى. 1988 جىلدان بەرى «اشىربەكوۆ» شارۋا قوجالىعىن باسقارادى. قازىرگى تاڭدا قوجالىق 700 گا كۇرىش، 250 گا جوڭىشقا، 120 گا بيداي، 15 گا ماقسارى ەگەدى. سوڭعى ءۇش جىلدا جىل قورىتىندىسىمەن وزاتتارعا ءبىر «نيۆا»، ەكى «دجيپ» ماشيناسىن بەرگەن. ءوزىنىڭ قاراماعىنداعى جەتى ادامعا ءۇي سالىپ بەرگەن. اۋدانداعى بارلىق ءىس-شارالارعا، تۇرمىسى تومەن وتباسىلارىنا دەمەۋشىلىك جاساپ كەلەدى. 2015 جىل قورىتىندىسى بويىنشا اۋداننىڭ «ۇزدىك مەتسەناتى» ديپلومىمەن ماراپاتتالدى. ال، سول كەزدەگى جاقاەۆشىلار قوزعالىسىنىڭ بەلسەندى مۇشەسى، بلقجو-نىڭ سەزىنە دەلەگات بولىپ قاتىسقان، «ەڭبەكتەگى ەرلىگى ءۇشىن» مەدالىنىڭ يەگەرى، كوپ جىل باسشىلىق قىزمەتتە بولعان، قازىرگى تاڭدا اۋىل ارداگەرلەر كەڭەسىنىڭ توراعاسى بەرىكقارا ءابجاپباروۆ ءوز ەستەلىگىن بىلاي ايتادى:
– ىبىرايدىڭ باتاسىن العان سول كەزدەگى كوپ كۇرىششىلەردىڭ ءبىرىمىن. مەكتەپ بىتىرگەن كەزدە تۇگەل سىنىپ بولىپ ۇندەۋ قابىلداپ، كۇرىش ەگۋگە قالدىق. ىبىراي اتامىزدىڭ قولىنان ەڭبەك اتتەستاتىن الىپ، باتاسىن الدىق. كۇرىش ەككەننەن جاقسى ءونىم الىپ، ماسكەۋگە بلقجو-نىڭ سەزىنە دەلەگات بولىپ قاتىستىم. قازاقستان دەلەگاتسياسىنىڭ اتىنان سويلەيتىن بولىپ، مىنبەرگە شىقتىم. ءبىزدى زالعا قاراپ سويلەيسىڭدەر دەپ ۇيرەتكەن. مىنبەرگە شىعىپ زالعا قاراپ ەدىم، زالداعى ادامداردىڭ كوزى اقبوكەننىڭ كوزىندەي بولىپ سامساپ، كوزىمدى شاعىستىرىپ، قايتىپ قاعازعا قاراعاندا دىم كورىنبەي، الدىمداعى جازۋدىڭ ءبارى اعارىپ كەتتى. شامالىدان كەيىن بارىپ ءارىپ كورىنە باستادى. تەزدەتىپ وقىپ شىعىپ تۇسە باستادىم، مەنىڭ باعىما مەنەن كەيىن رسفسر-ءدىڭ دەلەگاتى سويلەيتىن بولىپ ورنىنان تۇرا بەرىپ ەدى، دەرەۋ سونىڭ ورنىنا وتىرىپ الىپ، شامالى دەمالىپ، تىنىستاپ، وزىمە-ءوزىم كەلگەننەن كەيىن ءوز ورنىما وتىردىم. مەنى قاراپايىم قازاقتىڭ قارا بالاسىن ماسكەۋدىڭ تورىندە سويلەتكەن، ماسكەۋگە تابانىمنىڭ تيگەنى ەڭبەكتىڭ قۇدىرەتى. ىبىراي قولىمىزعا ۇستاتقان ەڭبەك اتەستاتىنىڭ، اتامىزدىڭ باتاسىنىڭ قۇدىرەتى دەپ بىلەمىن، – دەپ ءسوزىن اياقتادى.
«باتا العان ازبايدى دا توزبايدى» دەپ حالقىمىز ايتقانداي، ءتاڭىرىمىز اقىردىڭ پايعامبارىن جاراتقاننان كەيىن دۇنيەگە، حالقىنا دەمەۋ، قولداۋ بولسىن دەپ ىبىراي سياقتى عاسىرلاردا ءبىر تۋاتىن، ءسوزى دۋالى، بولمىسى عاجاپ تۇلعالاردى دۇنيەگە كەلتىرگەن. ولاردىڭ باتاسى قابىل بولعان، سولار ارقىلى جاراتۋشى جەردەگى پەندەلەرىنە بەرەكە، بىرلىك، باق، داۋلەت سىيلاعان.
وسى سوزدەرىمىزدىڭ دالەلى رەتىندە جاقاەۆقا ەكىنشى مارتە التىن جۇلدىزبەن ماراپاتتاۋعا ارنالىپ، كولحوزدا وتكەن سالتاناتتى جينالىستا داڭعايىر ديقان بەگاليەۆ سەرىكبايدىڭ: – بۇرىنعى زاماندا اناداي اۋليە، مىناداي اۋليە ءوتىپتى دەپ سيىنىپ جاتامىز، وسى زاماننىڭ ناعىز اۋليەسى، ناعىز ارۋاعى ءبىزدىڭ ىبەكەڭ عوي، – دەگەن ءسوزىن كەلتىرسەك ارتىق بولماس.
ىبىراي اتامىزدىڭ دۇنيەدەن وزعانىنا وتىز جىلدان اسا ۋاقىت بولسا دا كۇننەن كۇنگە ابىرويى اسقاقتاي، حالقىنىڭ ساناسىندا جاڭارىپ، جاسارىپ، رۋحى اسپانداپ بيىكتەي تۇسۋدە. اۋداندا اتامىزدىڭ تۋعانىنا 125 جىل تولۋ مەرەكەسىن قارسى الۋعا دايىندىق جۇمىستارى قىزۋ جۇرگىزىلۋدە. ارنايى كوميسسيا قۇرىلىپ، ونى اۋدان اكىمى قايراتبەك اۋباكىرۇلى سارسەمباەۆتىڭ ءوزى باسقارىپ، وتكىزىلەتىن ءىس-شارالار ناقتىلاندى. بيىلعى جىل شيەلىلىكتەر ءۇشىن جىلدىڭ باسىندا ىبىراي جىلى بولىپ بەلگىلەندى. ىبىرايدى قۇرمەتتەۋ ەلباسىمىز كوتەرىپ وتىرعان ماڭگىلىك ەل يدەياسىنىڭ ىسكە اسۋى، قۇرمەتتەلۋى، ال باتا – ماڭگىلىك ەلدىڭ يدەولوگياسى، ءتۇپ قازىعى، قوزعاۋشى كۇشى، بەت-بەينەسى. باتانى ارداقتاۋ ماڭگىلىك ەل ازاماتتارىنىڭ مىندەتى، ابىرويى، ماقساتى. باتا العان، ونى ارداقتاعان، ءومىرىنىڭ قوزعاۋشى كۇشىنە اينالدىرعان ازاماتتاردىڭ ءومىرى، ابىرويى، شىققان بيىگى – توقسان اۋىز ءسوزدىڭ توبىقتاي ءتۇيىنى.
ەسىركەپ شادىبەكوۆ،
زەينەتكەر،
قىزىلوردا وبلىسى،
شيەلى اۋدانى
"ايقىن"