الما سايلاۋقىزى: وقىڭىزدار، توقىڭىزدار، قىزدار، سىڭلىلەرىم!

2906
Adyrna.kz Telegram

كەشەدەن بەرى ءدۇيىم ەلدى دۇرلىكتىرگەن "ماركەر" تاقىرىبىنا نۇكتە قوياتىن كەز كەلگەن سياقتى. Omar Jaleluly اعامىزدى "دۇرىس تۇسىنبەي قالعانىمىزدى" دالەلدەگىسى كەلىپ باققان، تۇيەنى جابۋمەن جاسىرعىسى كەلىپ ابىگەرگە تۇسكەن ساناۋلى جانداردان باسقا، نەگىزگى باسىم كوپشىلىك ونىڭ دورەكى تەڭەۋ جاساعانىن مويىنداپ وتىر. ەڭ قۋانتاتىنى، مەن كورگەن سىني پىكىرلەردىڭ كوبىن ەر ازاماتتارىمىز جازعان ەكەن. ەسەسىنە كەيبىر ايەلدەر ءوز قىزدارىن وزدەرى جەرگە الىپ ۇرىپ، وقىماي-اق بايعا ءتيسىن دەپ وزەۋرەگەنى شوشىتتى... الدىندا عانا "تاۋار" تاقىرىبىنا ەشتەڭە دەمەسەم دە، بۇل جولى ءبىر اۋىز پىكىرىمدى بىلدىرگەندى ءجون كوردىم. ويتكەنى، ءبىر ۇيدە ءبىر ۇل، ءۇش قىز وستىك، ال اسىل اكەمىز ءبىزدى قۋانىشقا، وتباسىنىڭ نۇرىنا، شاتتىعىنا تەڭەيتىن. "قۇداي بەرە سالعان قىزدارىم!" دەپ ەركەلەتەتىن. بارىمىزگە "وقىڭدار، توقىڭدار، سوسىن سۇيگەندەرىڭە قوسىلىڭدار. ەڭ باستىسى، قولىمنان ۇزاتىپ الىپ كەتسە بولعانى", دەيتىن. اللاعا شۇكىر، ءۇش قىز ءۇش ءجۇزدىڭ ازاماتىنا تۇرمىسقا شىعىپ، ءار شاڭىراقتىڭ بەرەكەسىن كىرگىزىپ وتىرمىز.
سونىمەن قاتار، ءوزىم دە كوپبالالى انامىن. ونىڭ ۇشەۋى - قىزدار. كوزىمىزدىڭ نۇرى، اقىل تۇنعان التىندارىمىزدى توبەمىزگە كوتەرەمىز. ويتكەنى قازىردەن وتباسى مەيىرىمى مەن ماحابباتىن سەزىنىپ وسكەن قىز عانا ەرتەڭگى كۇنى بارعان جەرىن باقىتتى ەتە الاتىنىنا بەك سەنىمدىمىز. ۇلتتىڭ كەلەشەك تاربيەسى قىزداردا ەكەنى راس بولسا، ايالى الاقانىمىزداعى گۇلدەرىمىزدى قادىرلەپ، جانىن جارالار ءسوز ايتپاعاندا عانا، كەلەشەكتە وقۋ-بىلىممەن سۋسىنداعان كوزى اشىق قازاق قىزى، اياۋلى انا، يبالى كەلىن ەتىپ تاربيەلەي الامىز.
مەنەن كوپبالالى انا بولا وتىرىپ، جۇمىسىڭا دا ۇلگەرىپ، قوناعىڭدى دا كۇتىپ، تاربيەنى دە بەرىپ، ءوزىڭدى دە دامىتىپ: دوكتورانتۋرانى ءساتتى وقىپ، عىلىم-بىلىمگە قالاي ۋاقىت تاپتىڭ دەپ ءجيى سۇرايدى.
جاۋابىم: اسىل ازاماتىم، جار قادىرىن بىلەتىن وتاعاسىمنىڭ دەمەۋى مەن ۇل-قىزىمنىڭ الدىندا لايىقتى ۇلگى بولايىن دەگەن ەرىك-جىگەرىمنىڭ ارقاسىندا! قازىر كوزى اشىق جىگىتتەرگە دە وزىنە ساي كوزى اشىق قىزدار كەرەك. سوندىقتان، وقىڭىزدار، توقىڭىزدار، قىزدار، سىڭلىلەرىم! اجەلەرىمىزدە تاڭداۋ بولعان جوق، ايتپەسە، ءبارى وقىر ەدى. ەشكىمنىڭ تۇقىرتۋىنا جول بەرمەڭىزدەر! الدىمەن تەك مانساپتى ويلايتىن ەۋروپا ايەلىنە دە ەلىكتەمەڭىزدەر. ون جاستان اسار-اسپاستا اكە-شەشەسى كۇيەۋگە بەرىپ جىبەرەتىن، سوسىن تەك كۇيبەڭ تىرشىلىكتەن كوز اشپاي، ساناسى دامىماعان كۇيدە كۇيبەڭدەپ وتەتىن اراب-ءۇندى-اۋعان مودەلىنە دە قىزىقپاڭىزدار.
ءبىزدىڭ ۇلت (ازىرگە) اسا كوپ بولماسا دا، ساپالى بولۋ كەرەك. ول ءۇشىن ۇلىمەن قاتار قىزى دا ءبىلىمدى، سەنىمدى، كوكىرەگى وياۋ بولۋى كەرەك. ەڭ باستىسى، ۇلتتىق وزەكتەرىڭىزگە ءنار بەرىپ وتىرساڭىزدار، زاماننىڭ كەز كەلگەن تالابىنىڭ ۇدەسىنەن شىعاتىندارىڭىزعا شىن كوڭىلدەن سەنەم!

پىكىرلەر