«ادىرنا» ۇلتتىق-ەتنوگرافيالىق بىرلەستىگى» قوعامدىق قورى الماتىداعى ع.مۇسىرەپوۆ اتىنداعى بالالارمەن جاسوسپىرىمدەر تەاترىندا بەلگىلى ءانشى-كومپوزيتور بالۋان-شولاق بايمىرزاۇلىنىڭ جەكە شىعارماشىلىعىنان ءداستۇرلى ءان كەشىن وتكىزدى. اتالعان ءان كەشى ءتۇرلى ۇلتتىق اسپاپتاردان تۇراتىن «ارناۋ» فولكلورلىق انسامبلمەن اشىلدى.
«ادىرنا» ۇلتتىق-ەتنوگرافيالىق بىرلەستىگى» قوعامدىق قورى 2010 جىلدان بەرى ءداستۇرلى ءان-كۇي كەشتەرىن ۇيىمداستىرىپ كەلەدى. اتاپ ايتساق، ءبىرجان سال (2010), اقان سەرى (2010), مۇحيت (2011), ۇكىلى ىبىراي (2012), جاياۋ مۇسا (2013), ءساكەن سەيفۋللين (2014) اندەرىنەن جەكە-جەكە كونتسەرتتەر، تاۋەلسىزدىك جولىندا قۇربان بولعان كومپوزيتورلار شىعارماشىلىعى بويىنشا «ازات رۋحتىڭ الداسپاندارى» (2012) كونتسەرتى، جىلقى تۋرالى اندەر مەن كۇيلەرگە نەگىزدەلگەن «ءدۇلدۇل ءان مەن پىراق كۇي» (2014) اتتى كونتسەرتىن ۇيىمداستىرعان ەدى. اتاۋلى شارالار «ۇلى دالا داۋىلپازدارى» جوباسىنىڭ اياسىندا وتكەن بولاتىن. وسى جولعى كونتسەرتتىڭ باستىەرەكشەلىگى–بالۋانشولاق بابامىزدىڭ مۇلدە بەيمالىم اندەرى تۇڭعىش رەت ۇلكەن ساحنادا ورىندالدى. بۇعان دەيىن ونەرپازدار قاۋىمىنا بالۋان شولاقتىڭ 7-8 ءانى عانا بەلگىلى بولىپ كەلسە، وسى جولعى كونتسەرتتە ۇلى كومپوزيتوردىڭ 20-دان استام اندەرى ساحناعا جول تارتتى. بۇگىنگە دەيىن بالۋان شولاقتىڭ «عاليا»، «سەنتيابر»، «كارون بالۋان»، «جاستىق»، «دۇنيە»، «دىكىلدەك» ءتارىزدى تانىمال اندەرىن رامازان ستامعازيۆ، ەرلان تولەۋتاي، ەركىن شۇكىمانوۆ، جاسۇلان ساقاەۆ، ازات دۋلاتۇلى، تىلەۋباي ءاناپيا، ت.ب. انشىلەر ورىندادى. بالۋان شولاقتىڭ بەيمالىم اندەرى «داۋىساشار»، «شولاق باياۋ»، «كوپ بالاپان-كوكشەتاۋ»، «عاليانىڭ» IV-ءىنشى ءتۇرى، «جەلىپ-جەلىپ…»، «قۇلان كىسىنەس»، «سۇرشا قىز» II-ءشى ءتۇرى، «شولاقتىڭ جەلدىرمەسى»، «كەنجەقوڭىر»، «مايداقوڭىر»، «مەنى قوي-اۋ»، «بالۋان شولاقتىڭ جەتىسۋمەن قوشتاسۋى»، «بالۋان شولاقتىڭ ەلىمەن قوشتاسۋى»، «سارىن» جانە تاعى باسقا اندەرى تۇڭعىش رەت ۇلكەن ساحناعا شىقتى.
جەزقازعاننان ارنايى كەلگەن عاجايىپ ونەرپاز عالىم مۇحامەدين، قاراعاندى وبلىسىنىڭ شەت اۋدانىنان ات ارىلتىپ جەتكەن تالانتتى جاس ءانشى ارداق مۇقىشەۆ، استانا قالاسىنان كەلگەن بەلگىلى ونەر مايتالمانى ەرلان قۇجيمانوۆ، شىعىس قازاقستان وبلىسىنىڭ اباي اۋدانىنان كەلگەن ونەر ساڭلاعى قايرات قابىشەۆ، شىعىس قازاقستاننىڭ تارباعاتاي اۋدانىنان جەتكەن ەلامان قۇجيمانوۆ، الماتىلىق ەركىن نۇرحانوۆ، تالعات ابۋعازى، سايان بودەسوۆتەر بالۋان شولاقتىڭ بەيمالىم اندەرىن ورىنداپ، حالىقتىڭ كوزايىمىنا اينالا ءبىلدى. بالۋان شولاقتىڭ ەل بىلە بەرمەيتىن اندەرى جولامان قۇجيمانوۆتىڭ نوتادان قالپىنا كەلتىرىپ، جاستارعا ۇيرەتۋى نەگىزىندە قايتا تۇلەپ، ونەر ولكەسىنە جول تارتىپ، جىل قۇسىنداي جاڭالىق بولىپ قوسىلعاندىعىن ايتا كەتۋ كەرەك.
دەگەنمەن، عالىم مۇحامەدين («بالۋان شولاقتىڭ قوشتاسۋى»), تىلەۋلەس قۇرمانعاليەۆ («قۇلان كىسىنەس»), ەرلان قۇجيمانوۆ («مەنى قوي-اۋ») ورىنداۋىنداعى اندەر انشىلەردىڭ وزدەرى ەل ىشىنەن تاپقان التىنعا پارا-پار ولجالارى ەكەندىگىن ايتا كەتكەن ءجون. شىعىس وڭىرىنەن كەلگەن قايرات قابىشەۆتىڭ ونەرىن كورەرمەن قاۋىم ۇلكەن قوشەمەتپەن قارسى الدى. ءتىپتى ول ونەردى سىن كوزبەن سارالاي بىلەتىن ساحنا شەبەرلەرىنىڭ دە ىقىلاس-ءىلتيپاتىنا بولەندى. حالىقتىڭ سۇراۋى بويىنشا بۇلبۇل ءانشى قايرات قابىشەۆ تاعى ءبىر ءان ورىندادى. كەشتى عاجايىپ ءانشى، تەرەڭ ءبىلىم يەسى، ونەرتانۋشى ەرلان تولەۋتاي جۇرگىزىپ، بالۋان شولاقتىڭ ءومىرى مەن شىعارماشىلىعى تۋرالى كورەرمەن قاۋىمدى قىزىقتى ماعلۇماتتارعا قانىقتىردى. ايتا كەتۋ كەرەك، «ادىرنا» قورى بولاشاقتا بالۋان شولاق اندەرىنەن استانا، كوكشەتاۋ، تاراز قالالارىندا ءان كەشىن وتكىزۋدى جوسپارلار وتىر.
ارمان اۋباكىر،
«ادىرنا» ۇلتتىق-ەتنوگرافيالىق بىرلەستىگى» قوعامدىق قورىنىڭ جەتەكشىسى
