ۇلى دالا تاعامدارى مەن قولونەرى جاڭعىردى

720

زامانا الىسى، ۋاقىتتىڭ تالابى مىڭ قۇبىلعان  جاھاندانۋ داۋىرىندە ءوزىمىزدى ۇلت رەتىندە ساقتاپ قالا الامىز با، جوق الدە بورداي توزامىز با؟ ۋربانيزاتسيا، جاڭا تەحنولوگيالاردىڭ دامۋى عانا ەمەس، ۇلتىمىز بەن مەملەكەتتىلىگىمىزدىڭ تامىرىنا بالتا شاباتىن ءدۇبارا وركەنيەتتەردىڭ ىقپالى ءبىزدىڭ ءومىر ءسۇرۋ ورتامىز بەن تانىم-تۇسىنىگىمىزدىڭ وزگەرۋىنە الىپ كەلدى. باعزىدان كەلە جاتقان سالت-ءداستۇرىمىز بەن جول-جورالعىلارىمىز تۇرماق اتا ءدىنىمىز بەن ءتىلىمىزدىڭ دە كۇيى بەلگىلى.

وسىناۋ الماعايىپ ۋاقىتتا اتا-بابالارىمىزدىڭ مىڭداعان جىلدار سۇزگىدەن وتكەن، ءوزىنىڭ دۇرىستىعىن دالەلدەگەن، قانداي قوعامدا، قانداي زاماندا دا بولماسىن ءومىر سۇرۋگە لايىقتى سالت-ءداستۇرىمىزدى جاڭعىرتۋ بولاشاعىمىزدىڭ كەپىلى. وسىنداي ۇلى مۇرات جولىندا جاسالىپ جاتقان ءىس-شارالاردىڭ ءبىرى ءاز-ناۋرىز مەيرامىنىڭ قارساڭىندا  الماتى قالاسىنداعى «قۋىرداقتىڭ كوكەسى» مەيرامحاناسىندا "ۇلى دالا تاعامدارى جانە قولونەرى" اتتى كەش ءوتتى.

وسى مەيرامحانا  ۇلتتىق تاعامدارىمىزدىڭ ەرەكشە تۇرلەرىن، ۇمىتىلىپ بارا جاتقان تاعام تۇرلەرى مەن دايىنداۋ جولدارىن قايتا جاڭعىرتىپ جاتىر. ادامنىڭ بولمىسىنا ىشكەن اسى مەن سۋسىنىڭ دا اسەرى كوپ. فاسفۋدتار مەن كوپتەگەن ۇلتتاردىڭ ۇلتتىق اسحانالارى ەلگە ءوز اس-سۋلارىن ۇسىنۋ ارقىلى ەكونوميكامىزعا عانا ەمەس مادەنيەتىمىزگە دە ەكسپانتسيا جاساپ وتىر. سوندىقتان ۇلتتىق قۇندىلىقتارىمىزدىڭ ءبىرى ۇلتتىق تاعامدارىمىزدى بارىنشا دارىپتەپ، ءوزىمىزدىڭ كۇندەلىكتى داستارحانىمىزدا تۇراتىن، ءىشىپ-جەم اسىمىزعاي اينالدىرۋىمىز كەرەك.

وسى كەشتە مەيرامحانا قوناقتارىنا قازاقتىڭ شاشىلىعى (قازىر كاۋاپ دەپ اتاپ جۇرگەن) «كومبە» دەپ اتالاتىن ەت تاعامى دايىندالىپ، ۇسىنىلدى. «كومبەنى» ازىرلەۋ جولدارى بەينەبايان تۇرىندە كورسەتىلدى. ودان كەيىن كەش قوناقتارىنىڭ الدىندا قۇرتتىڭ قالاي دايىندالاتىنى كورسەتىلدى. ساباعا قۇيىلعان  ىركىتتى ءپىسىپ، قازانعا قۇيىپ قايناتتى. قۇرت قايناپ جاتقان كەزدە ونىڭ ءتۇبى كۇيىپ كەتپەس ءۇشىن ارناۋلى قۇرت بىلعاۋىشپەن ء السىن-ءالسىن قازاننىڭ ءتۇبىن، ەرنەۋىن قىرىپ ارالاستىرىپ وتىردى.قايناپ جاتقان قۇرتتىڭ كوبىگىن جالاپ، ىستىق قۇرت ىشكەن مەيرامحانا قوناقتارىنا قۇرت جايلى تولىق ماعلۇمات تا ايتىلىپ وتىردى. ءبىر عانا قۇرتتىڭ جاس قۇرت،كوبىك، ىستىق قۇرت، سىقپا قۇرت، مالتا، ەزگەن قۇرت،ۇنتاق قۇرت، قۇرت- ماي، قۇرت-كوجە سىندى تۇرلەرى بارىنان-اق ءبىزدىڭ ۇلتتىق تاعامدارىمىزدىڭ تۇرلەرىنىڭ كوپتىگى مەن قۇنارىن باعامداي بەرسەڭىز بولادى.

قوي سۇتىنەن قورىقتىق ءپىسىرۋ مەن باسقۇر توقۋ سىندى ونەرىمىزدى دە موڭعوليادان كەلگەن قانداسىمىز الما اپايىمىز سول جەردە كورسەتىپ بەردى. كەش كەزىندە ۇلتتىق ءان-كۇيلەرىمىز ورىندالىپ، عاسىرلار قويناۋىنا بارىپ قايتقانداي كۇي كەشكەن اسەرلى كەش بولدى. كەشتى ۇيىمداستىرىپ، جۇرگىزىپ وتىرعان «بيزنەس باستاۋ» كاسىپكەرلەر مەكتەبىنىڭ باسشىسى، كاسىپكەر احمەتبەك نۇرسيلا اعامىزعا مەيماندار العىستارىن ءبىلدىردى. ۇلتتىق قۇندىلىقتارىمىزدى  زامانعا لايىقتاپ ەلگە ۇسىنۋ مەن كاسىپ كوزىنە اينالدىرا ءبىلۋى، سۇرانىسقا يە بولۋى قانداي ونەرىمىزدىڭ بولماسىن دارىپتەلۋىنىڭ، ۇمىتىلماي جالعاسىن تابۋىنىڭ بىردەن-ءبىر جولى.


 ارداق بەركىمباي

 

پىكىرلەر