25 اقپانداعى جاعداي بويىنشا، كوروناۆيرۋس شۆەيتساريا مەن الجيردە انىقتالدى، - دەپ حابارلايدى ريا نوۆوستي.
"كوروناۆيرۋستىڭ العاشقى بەلگىلەرى راستالدى", - دەپ مالىمدەدى شۆەيتساريالىق دەنساۋلىق ساقتاۋ مينيسترلىگى Twitter جەلىسىندەگى پاراقشاسىندا. Blick باسىلىمىنىڭ مالىمەتىنشە، ناۋقاس يتاليامەن شەكارالاس ورنالاسقان تيچينو ايماعىندا انىقتالعان.
COVID-19 تىركەلگەنى تۋرالى ءالجيردىڭ دەنساۋلىق ساقتاۋ ءمينيسترى ابدۋرراحمان بەن بۋزەيد حابارلاعان. ونىڭ سوزىنشە، كوروناۆيرۋس 17 اقپاندا ەلگە كەلگەن يتاليا ازاماتىنان انىقتالعان.
"ناۋقاسقا مەديتسينالىق كومەك كورسەتىلىپ جاتىر، ول كارانتينگە جاتقىزىلدى", - دەدى مينيستر.
سونداي-اق، ۆيرۋس گەرمانيادا دا انىقتالعان. گەرمانيادا كوروناۆيرۋس جۇقتىرعانداردىڭ جالپى سانى - 18. ال يتاليادا كوروناۆيرۋستان قايتىس بولعانداردىڭ سانى 10-عا جەتىپ، 322 ادام اۋرۋحاناعا جاتقىزىلعان. ۆيرۋس كوبىنە لومبارديا وبلىسىندا انىقتالعان. كوروناۆيرۋستان قايتىس بولعانداردىڭ كوبى ەگدە جاستاعى ادامدار.
سوڭعى مالىمەتتەر بويىنشا، وڭتۇستىك كورەيادا تاعى 169 ادام كوروناۆيرۋس جۇقتىرىپ، ءبىر ادام قايتىس بولعان. ەلدە ۆيرۋس جۇقتىرعانداردىڭ جالپى سانى - 1149 بولسا، قايتىس بولعانداردىڭ سانى - 11.
