تەگەران كوروناۆيرۋستان ولگەندەر كوبەيگەنىن حابارلاعان سوڭ تاجىكستان يرانمەن اۋە قاتىناسىن توقتاتتى.
تاجىكستان ازاماتتىق اۆياتسياسى اگەنتتىگى ديرەكتورىنىڭ ءبىرىنشى ورىنباسارى ءازيز ءنابيزودانىڭ ايتۋىنشا، يرانمەن اۋە قاتىناسى 24 اقپاننان باستاپ توقتاعان. بۇل جونىندە يراننىڭ Varesh Airlines اۋە كومپانياسى مەن تاجىكستاننىڭ Tajik Air جانە Somoni Air اۋە كومپانيالارىنا ەسكەرتىلگەن.
يراننىڭ جارتىلاي مەملەكەتتىك ILNA جاڭالىقتار اگەنتتىگى 24 اقپاندا قۇم قالاسىندا كوروناۆيرۋستان 50 ادام ولگەنىن حابارلاپ، بۇل اقپاراتتى يران دەنساۋلىق ساقتاۋ ءمينيسترىنىڭ ورىنباسارى يرادج حاريرچي تەرىسكە شىعارعان ەدى. حاريرچي ءباسپاسوز جيىنىندا 61 ادام كوروناۆيرۋس جۇقتىرعانىن، ونىڭ 12-ءسى قايتىس بولعانىن حابارلادى.
قىتايدا جىل اياعىندا پايدا بولعان ۆيرۋس ازيانىڭ وزىندە 78 مىڭنان استام ادامعا جۇققان. قىتايدىڭ ۇلتتىق دەنساۋلىق ساقتاۋ كوميسسياسى ىندەتتەن قازا بولعاندار سانى 2500-دەن اسقانىن مالىمدەدى.
سونداي-اق ۆيرۋستىڭ جاڭا ءتۇرى الەمنىڭ كەم دەگەندە 28 ەلىنە تاراپ ۇلگەرگەن. وزگە ەلدەردە تىركەلگەن جاعدايلاردىڭ كوپشىلىگى قىتايدان كەلگەن جولاۋشىلاردان جۇققان بولۋى مۇمكىن دەلىنگەن.
يران، يتاليا جانە وڭتۇستىك كورەيادا ىندەتكە شالدىققاندار سانىنىڭ كۇرت ءوسۋى عالامدىق دەڭگەيدە قاۋىپتىڭ پايدا بولعانىن كورسەتكەندەي. دۇنيەجۇزىلىك دەنساۋلىق ساقتاۋ ۇيىمى ۆيرۋستىڭ يران مەن يتاليادا تارالۋىنا بايلانىستى الاڭداۋلى ەكەندەرىن جەتكىزدى.
سونداي-اق يران بيلىگى ۆيرۋسپەن كۇرەسۋ ماقساتىندا ەلدەگى مەكتەپتەر، جوعارى وقۋ ورىندارى مەن مادەنيەت وشاقتارىن جابۋ تۋرالى شەشىم قابىلداعان.
كورشى ەلدەر يراننان كەلگەن جولاۋشىلاردىڭ اراسىندا ۆيرۋس جۇقتىرعاندار بار ەكەنىن مالىمدەپ، شەكارانى جابۋعا ءماجبۇر بولعان.
كۋۆەيت بۇگىن يراننىڭ مەشحەد قالاسىنان كەلگەن ءۇش ادامنان ۆيرۋس بەلگىلەرىن انىقتادى. 53 جاستاعى كۋۆەيت ازاماتى، 61 جاستاعى ساۋد ارابياسىنىڭ ازاماتى جانە 21 جاستاعى ناۋقاس قازىر كۋۆەيتتە ەمدەلىپ جاتىر.
كانادا، ليۆان، بىرىككەن اراب امىرلىكتەرى مەن باحرەين ەلدەرى دە يراننان كەلگەن جولاۋشىلار اراسىندا ۆيرۋس جۇقتىرعاندار بار ەكەنىن مالىمدەگەن.
"ادىرنا" ۇلتتىق پورتالى
