Tegeran koronavırýstan ólgender kóbeıgenin habarlaǵan soń Tájikstan Iranmen áýe qatynasyn toqtatty.
Tájikstan azamattyq avıaııasy agenttigi dırektorynyń birinshi orynbasary Ázız Nábızodanyń aıtýynsha, Iranmen áýe qatynasy 24 aqpannan bastap toqtaǵan. Bul jóninde Irannyń Varesh Airlines áýe kompanııasy men Tájikstannyń Tajik Air jáne Somoni Air áýe kompanııalaryna eskertilgen.
Irannyń jartylaı memlekettik ILNA jańalyqtar agenttigi 24 aqpanda Qum qalasynda koronavırýstan 50 adam ólgenin habarlap, bul aqparatty Iran densaýlyq saqtaý mınıstriniń orynbasary Iradj Harırchı teriske shyǵarǵan edi. Harırchı baspasóz jıynynda 61 adam koronavırýs juqtyrǵanyn, onyń 12-si qaıtys bolǵanyn habarlady.
Qytaıda jyl aıaǵynda paıda bolǵan vırýs Azııanyń ózinde 78 myńnan astam adamǵa juqqan. Qytaıdyń ulttyq densaýlyq saqtaý komıssııasy indetten qaza bolǵandar sany 2500-den asqanyn málimdedi.
Sondaı-aq vırýstyń jańa túri álemniń kem degende 28 eline tarap úlgergen. Ózge elderde tirkelgen jaǵdaılardyń kópshiligi Qytaıdan kelgen jolaýshylardan juqqan bolýy múmkin delingen.
Iran, Italııa jáne Ońtústik Koreıada indetke shaldyqqandar sanynyń kúrt ósýi ǵalamdyq deńgeıde qaýiptiń paıda bolǵanyn kórsetkendeı. Dúnıejúzilik densaýlyq saqtaý uıymy vırýstyń Iran men Italııada taralýyna baılanysty alańdaýly ekenderin jetkizdi.
Sondaı-aq Iran bıligi vırýspen kúresý maqsatynda eldegi mektepter, joǵary oqý oryndary men mádenıet oshaqtaryn jabý týraly sheshim qabyldaǵan.
Kórshi elder Irannan kelgen jolaýshylardyń arasynda vırýs juqtyrǵandar bar ekenin málimdep, shekarany jabýǵa májbúr bolǵan.
Kýveıt búgin Irannyń Meshhed qalasynan kelgen úsh adamnan vırýs belgilerin anyqtady. 53 jastaǵy Kýveıt azamaty, 61 jastaǵy Saýd Arabııasynyń azamaty jáne 21 jastaǵy naýqas qazir Kýveıtte emdelip jatyr.
Kanada, Lıvan, Birikken Arab Ámirlikteri men Bahreın elderi de Irannan kelgen jolaýshylar arasynda vırýs juqtyrǵandar bar ekenin málimdegen.
"Adyrna" ulttyq portaly
