قازاق ويۋلارىنىڭ تاريحى تەرەڭدە

3100
Adyrna.kz Telegram

الماتىداعى «تەمىرقازىق» باسپا ۇيىندە تۇرىكتانۋ سەمينارىندا سۋرەتشى، قازاق ويۋ-ورنەكتەرىن زەرتتەۋشى ەرلان قوجاباەۆپەن كەزدەسۋ بولدى. ەكى اپتادا ءبىر ءوتىپ تۇراتىن تۇرىكتانۋ سەمينار تۇرىكتانۋشى عالىمدار حاكىم ومار مەن ەربول قۇرمانباەۆتىڭ، كاسىپكەر ساكەن ورىنبەكۇلى سەيفۋلليننىڭ باستاماسىمەن جۇزەگە اسقان ەدى. بۇگىندە وندا تۇرىكتانۋ تاقىرىبى بويىنشا ءتۇرلى سالا ماماندارىنا ورىن بەرىلىپ، تاريح-ەتنوگرافيا ماسەلەلەرى توڭىرەگىندە اشىق پىكىر-تالاس الاڭىنا اينالدىپ وتىر.    

سەميناردىڭ كەيىنگى كەزدەسۋىندە سۋرەتشى ەرلان قوجاباەۆ ءوزىنىڭ «قازاق ويۋلارى» («قازاق ويۋلارى تاڭىرشىلدىك مادەنيەتىنىڭ پيكتوگراممالارى... ») اتتى تاقىرىپتاعى ءدارىسى وتە قىزىقتى ءوتتى. قازاق ويۋلارىنىڭ شۋمەرلەر مادەنيەتىمەن، ساق، عۇن، كونە تۇرىك قولونەرىمەن تىكەلەي استاسىپ، ساباقتاسىپ جاتقاندىعى ءسوز بولدى. سۋرەتشى 1940-شى جىلعا دەيىن ويۋ-ورنەكتەردىڭ ءوزىنىڭ تابيعي بولمىسىن ساقتاپ كەلسە، 1950-60 جىلداردان باستاپ بايىرعى قالىپتاسقان ۇلگىسىن، ءتول بولمىسىن جويا باستاعاندىعىن ءسوز ەتتى. ەرلان قوجاباەۆ قازاق ويۋلارىن مۇراعاتتاردان، مۋزەيلەردەن، تاريحي ورتا عاسىرلىق كەشەندەردەن (قاراحان بابا، ايشا ءبيبى، قوجا احمەت ياساۋي كەسەنەلەرى) الىپ، قالپىن بۇزباي قايتا جاڭعىرتىپ، ءوز قولىمەن سالىپ، بۇگىنگى سۋرەتشى-ديزاينەرلەرگە قالاي قولدانۋ كەرەكتىگىن كورسەتۋگە تىرىسقان.  سۋرەتشىنىڭ الماتىداعى «مەكتەپ» باسپاسىنان البوم كىتابى 7 000 تەڭگە تۇرادى. ءاربىر تاريحي فوتو مەن پايدالانىلعان ماتەريالدارعا اۆتور سىلتەمە جاساعان. كىتاپتىڭ عىلىمي-سيپاتتامالىق، مازمۇندىق-سەمانيتكالىق جاعىنا ونەرتانۋشى بەك ىبىراەۆ، تۇرىكتانۋشى ءناپىل بازىلحان ءتارىزدى عالىمدار كوپ كومەگىن كورسەتكەن.


ارمان سەرىكۇلى   

 

پىكىرلەر