رەسەي اقش-تاعى سايلاۋالدى ناۋقانعا ارالاسىپ، پرەزيدەنت دونالد ترامپتىڭ سايلاۋ كامپانياسىنا قولداۋ كورسەتۋگە تىرىسىپ جاتىر. اقش بارلاۋ قىزمەتىنىڭ رەسمي وكىلدەرى وسىلاي دەپ مالىمدەپ، زاڭ شىعارۋ ورگاندارىن ەسكەرتتى. بۇل اقپاراتتى دەرەككوزگە سۇيەنگەن The New York Times باسىلىمى حابارلادى دەپ جازادى centralasian.org.
باسىلىم دەرەگىنشە، زاڭ شىعارۋ ورگاندارىنا ەسەپتى تانىستىرعان ۇلتتىق بارلاۋ قىزمەتىنىڭ وكىلى شەلبي پيرسوننىڭ سوزىنە دونالد ترامپ نارازى بولىپ، بۇل دەرەكتى قارسىلاس-دەموكراتتار وزىنە قارسى پايدالانۋى مۇمكىن دەپ قىنجىلعان.
اقش بارلاۋ قىزمەتىنىڭ دەرەگىنشە، رەسەي حاكەرلەرى بۇل جولى كيبەروپەراتسياعا "ەرتەرەك" كىرىسكەن. ولار اقش اۋماعىندا ورنالاسقان سەرۆەرلەر ارقىلى عانا جۇمىس ىستەپ، الەۋمەتتىك جەلىلەردە جالعان پاراقشالار اشپاي، ساقتىق تانىتقان. ولار امەريكانىڭ سايلاۋشىلارىنا باسقا امالدار ارقىلى ىقپال ەتۋگە تىرىسىپ جاتىر.
بارلاۋ قىزمەتىنىڭ بريفينگى كەزىندە بىرنەشە رەسپۋبليكاشىل رەسەي دونالد ترامپقا كومەكتەسۋگە تىرىسىپ جاتىر دەگەن دەرەككە كۇمان كەلتىرىپ، ترامپتىڭ ارەكەتى مەن ساياساتىنان كرەمل ەداۋىر زارداپ شەكتى دەپ داۋلاسقان. ترامپ اكىمشىلىگىنىڭ ۋكرايناعا اسكەري كومەك تاعايىنداۋى جانە ماسكەۋ وداقتاسى يران رەجيمىن الشاقتاتقانىن مىسال رەتىندە كەلتىرگەن.
اقش بارلاۋ قىزمەتى ساراپشىلارىنىڭ ايتۋىنشا، كرەملدىڭ باستى ماقساتى - اقش-تاعى سايلاۋ ناۋقانى كەزىندە ابىگەرلىك تۋعىزىپ، سايلاۋ قورىتىندىسىنا سەنىمسىزدىك تۋعىزۋ.
