Reseı AQSh-taǵy saılaýaldy naýqanǵa aralasyp, prezıdent Donald Tramptyń saılaý kampanııasyna qoldaý kórsetýge tyrysyp jatyr. AQSh barlaý qyzmetiniń resmı ókilderi osylaı dep málimdep, zań shyǵarý organdaryn eskertti. Bul aqparatty derekkózge súıengen The New York Times basylymy habarlady dep jazady centralasian.org.
Basylym dereginshe, zań shyǵarý organdaryna esepti tanystyrǵan ulttyq barlaý qyzmetiniń ókili Shelbı Pırsonnyń sózine Donald Tramp narazy bolyp, bul derekti qarsylas-demokrattar ózine qarsy paıdalanýy múmkin dep qynjylǵan.
AQSh barlaý qyzmetiniń dereginshe, Reseı hakerleri bul joly kıberoperaııaǵa "erterek" kirisken. Olar AQSh aýmaǵynda ornalasqan serverler arqyly ǵana jumys istep, áleýmettik jelilerde jalǵan paraqshalar ashpaı, saqtyq tanytqan. Olar Amerıkanyń saılaýshylaryna basqa amaldar arqyly yqpal etýge tyrysyp jatyr.
Barlaý qyzmetiniń brıfıngi kezinde birneshe respýblıkashyl Reseı Donald Trampqa kómektesýge tyrysyp jatyr degen derekke kúmán keltirip, Tramptyń áreketi men saıasatynan Kreml edáýir zardap shekti dep daýlasqan. Tramp ákimshiliginiń Ýkraınaǵa áskerı kómek taǵaıyndaýy jáne Máskeý odaqtasy Iran rejımin alshaqtatqanyn mysal retinde keltirgen.
AQSh barlaý qyzmeti sarapshylarynyń aıtýynsha, Kremldiń basty maqsaty - AQSh-taǵy saılaý naýqany kezinde ábigerlik týǵyzyp, saılaý qorytyndysyna senimsizdik týǵyzý.
