22 اقپاندا ازاماتتاردى "زاڭسىز ميتينگىگە" شىقپاۋعا شاقىرىپ، ەسكەرتۋ جاساعان قازاقستان باس پروكۋراتۋراسى جۇما كۇنى تاعى مالىمدەمە جاسادى. وندا ۆەدومستۆو شەتەلدە تۇراتىن وپپوزيتسيالىق ساياساتكەر مۇحتار ءابليازوۆتى قارالاپ، ول شاقىرعان ميتينگىگە قاتىسپاۋعا كەڭەس بەرگەن.
مالىمدەمەدە باس پروكۋراتۋرا ءابليازوۆتى "قوعامعا ىرىتكى سالىپ جۇرگەن قىلمىسكەر", "ەلدەگى ءىرى وقيعالاردى جەكە مۇددەسىنە پايدالانعىسى كەلەتىن قىلمىستىق جاۋاپكەرشىلىكتەن قاشىپ جۇرگەن" ادام رەتىندە سيپاتتايدى. ۆەدومستۆو ادامداردى "ارانداتۋعا ىلىگىپ كەتپەي، زاڭسىز اكتسيالارعا قاتىسۋدان باس تارتۋعا" شاقىرادى.
قازاقستان بيلىگىن سىناۋشى، شەتەلدە تۇراتىن وپپوزيتسيالىق ساياساتكەر مۇحتار ءابليازوۆ جاقتاستارىن ميتينگىگە شاقىرعان سايىن باس پروكۋراتۋرا ازاماتتارعا ەسكەرتۋ جاساپ، "زاڭسىز ميتينگىگە قاتىسقاندار" اكىمشىلىك جازاعا تارتىلادى دەپ مالىمدەۋمەن كەلەدى. ءابليازوۆ قۇرعان "قازاقستاننىڭ دەموكراتيالىق تاڭداۋى" قوزعالىسى 2018 جىلى ەلدە "ەكسترەميستىك ۇيىم" دەپ تانىلىپ، قىزمەتىنە تىيىم سالىنعان. ال ءابليازوۆ قازاقستان سوتىنىڭ شەشىمىمەن كەلىسپەيدى. ەۋروپارلامەنت 2019 جىلعى ناۋرىزداعى رەزوليۋتسياسىندا قدت-نى "بەيبىت وپپوزيتسيالىق قوزعالىس" دەپ اتاعان.
كەيبىر قۇقىق قورعاۋشىلاردىڭ ايتۋىنشا، ىقتيمال ميتينگ قارساڭىندا قازاقستاندا بەلسەندىلەردىڭ قامالىپ، ميتينگ بولادى دەپ بەلگىلەنگەن ورىنداردىڭ قورشاۋعا الىناتىنى ادەتكە اينالعان. بۇل جولى دا قازاقستاننىڭ ءتۇرلى ايماعىندا جيىرمادان استام بەلسەندى (كەيبىر بەلسەندىلەر بۇدان دا كوپ بولۋى مۇمكىن دەيدى) قامالدى.
مۇحتار ابليازوۆقا قازاقستاندا "اقشا جىمقىرۋ", "قىلمىستىق توپ قۇرۋ", "ادام ءولتىرۋدى ۇيىمداستىرۋ" سياقتى بىرنەشە اۋىر باپتار بويىنشا ايىپ تاعىلىپ، ەكى رەت سىرتتاي سوتتالدى. ءابليازوۆ قازاقستان بيلىگى تاققان ايىپتىڭ ءبارىن جوققا شىعارىپ، "بيلىككە وپپوزيتسيا بولعانىم ءۇشىن ءوش العىسى كەلەدى" دەپ سيپاتتايدى.
وقي وتىرىڭىز: سىرتتاي سوتتاۋدىڭ قازاقستاندىق ء"داستۇرى"
قازاقستاندا حالىق قانداي دا ءبىر بەيبىت شەرۋ، ميتينگىگە شىعاتىن بولسا، جەرگىلىكتى اكىمدىكتەن الدىن الا رۇقسات الۋى ءتيىس. بيلىك رۇقسات بەرىلمەگەن ميتينگىنىڭ ءبارىن "زاڭسىز" دەپ تاۋىپ، قاتىسۋشىلارىن ۇستايدى جانە جاۋاپقا تارتادى.
حالىقارالىق قاۋىمداستىق قازاقستان بيلىگىنەن "بەيبىت ميتينگ زاڭىن" قايتا قاراپ، حالىققا ءوز ويىن ەركىن ايتۋعا كەدەرگى كەلتىرمەۋدى تالاپ ەتىپ كەلەدى.
"ازاتتىق" راديوسى
