قر ۇلتتىق مۋزەيىندە ءداستۇرلى كۇيشى جانعالي ءجۇزبايدىڭ ءدارىس-كونتسەرتى ءوتتى، دەپ حابارلايدى مۋزەيدىڭ اقپاراتتىق-يميدجدىك قىزمەتى. شەرتپە كۇيدىڭ شەبەرى جانعالي ءجۇزباي بۇگىنگى تاڭدا قازاقتىڭ ۇلتتىق ونەرىنىڭ دامۋ بارىسىن ءسوز ەتە كەلە، قازاق حالقىنىڭ ومىرىندە دومبىرانىڭ ۇلكەن ءرول اتقاراتىنىنا توقتالىپ ءوتتى.
-قازاق كۇيلەرى ەل تاريحىنىڭ جىلناماسى، شەجىرەسى دەپ جاتامىز. سوندىقتان دا كەتبۇعا، سۇگىر سەكىلدى بابالارىمىزدىڭ مۇراسىن جاڭعىرتا بەرۋىمىز كەرەك. «ۇلتتىق ونەر دامىماي جاتىر» دەگەن سوزدەردى ەستىپ قالىپ جاتامىز. بىراق ولاي ەمەس، جەتىسپەي جاتقانى جارناما عانا. دەسە دە ونەردىڭ جولى، ونىڭ ىشىندە ۇلتتىق ونەردىڭ جولى وتە اۋىر. ونىڭ وزىندىك قيىندىقتارى بار. الايدا قازاقتىڭ ۇلتتىڭ بولمىس-ءبىتىمى، جالپى تابيعاتى وسى كۇي ونەرىندە كورىنىس تاپقان، ساقتالعان. سول سەبەپتى دە كەشەگى ۇلىلاردان قالعان مۋزىكانىڭ ءبىر دىبىسىن دا بۇزباي ويناۋ ۇلكەن جاۋاپكەرشىلىكتى قاجەت ەتەدى، - دەدى ج.ءجۇزباي.
كەشتە جانعالي ءجۇزبايدىڭ ابىلايحان ورمانبەك، تالعار عالىمجان، اقجۋسان يمانعازىقىزى سەكىلدى شاكىرتتەرى تەحنيكالىق تۇرعىدان اسا قيىن كۇيلەردى ورىنداپ، جينالعان قاۋىمدى ەرەكشە كۇيگە بولەدى.
ايتا وتەيىك،«حالىق قازىناسى» عىلىمي-زەرتتەۋ ينستيتۋتىنىڭ قازاق حالقىنىڭ ءداستۇرلى مۋزىكالىق ونەرىن جاڭعىرتۋ مەن ناسيحاتتاۋعا ارنالعان «ءداستۇرلى مۋزىكالىق مۇرا» اتتى باعدارلاماسى اياسىندا وتكەن مۇنداي شارالار الداعى ۋاقىتتا دا جالعاسىن تابادى.
