اقمولا وبلىسىنا قاراستى تسەلينوگراد اۋدانىنىڭ تۇرعىندارى اۋدان اكىمى مالعاجدار ساتتارۇلىمەن جەر ءۇشىن سوتتاسىپ جاتقاندارىنا ءۇش جىلدان اسقان. شاعىمدانۋشىلاردىڭ اۆدوكاتى تۇرسىن تولەگەنوۆانىڭ ايتۋىنشا، اكىم تۇرعىندارعا پاي ەسەبىنەن بەرىلگەن شارۋا ۋچاسكەلەرىن دەپۋتات ۆلاديمير بوجكونىڭ ۇلىنا زاڭسىز بەرىپ وتىرعان كورىنەدى. بۇل تۋرالى "ازاتتىق رۋحى" حابارلايدى.
ورازاق اۋىلىنىڭ تۇرعىندارى 1998 جىلى زاڭعا سايكەس بوس جاتقان شارۋاشىلىق جەرلەرىن پاي رەتىندە العان.
«ورازاق اۋىلىنىڭ تۇرعىندارىنا جان باسىنا 14,5 گەكتار جەردەن تيگەن. سوندا ءبىر وتباسىندا – 100, ەندى ءبىر وتباسىندا – 200 گەكتارعا دەيىن جەر بار. ولار جەر ءۇشىن ادام باسىنا جىلىنا ءبىر رەت ديۆيدەند الىپ وتىرادى. ونىڭ ءوزى 20-30 مىڭ تەڭگەنىڭ كولەمىندە. وسى جەردى تسەلينوگراد اۋدانىنىڭ اكىمى تۇرعىنداردان تارتىپ الىپ، دەپۋتات ۆالديمير بوجكونىڭ ۇلىنا بەرىپ وتىر»، - دەيدى Azattyq Ruhy تىلشىسىنە شاعىمىن ايتقان ادۆوكات.
شارۋالاردىڭ جەرىن العان ماكسيم بوجكو «اقمولا فەنيكس» قۇس فابريكاسىنىڭ باسشىسى. كىشى بوجكونىڭ قۇس فابريكاسىنان بولەك، بىرنەشە كاسىبى بار.
«ماكسيم بوجكو تسەلينوگراد اۋدانىنىڭ اكىمىمەن كەلىسىپ، تۇرعىنداردىڭ پايىنا بەرىلگەن جەردىڭ ءبارىن يەمدەنۋدە. ول جەر ۋچاسكەلەرىن 10 جىلعا جالعا زاڭسىز العانىمەن قويماي، ونى باسقا ادامدارعا جالعا وتكىزىپ، ۇستىنەن تاعى پايدا كورىپ وتىر. بۇل از دەسەڭىز، اتالعان ۋچاسكەلەردى كەپىلدىككە قويىپ، جارتى ميلليارد تەڭگە نەسيە العان»، - دەدى ادۆوكات.
تولەگەنوۆانىڭ سوزىنشە، ازاماتتىق كودەكستە جەر يەلەرى زارداپ شەگەتىن بولسا، وندا جالعا الۋشىلار شارۋا شىعىندارىن تولىقتاي وتەۋى ءتيىس ەكەنى جازىلعان. اكىمنىڭ ۇستىنەن ارىزدانۋشىلاردىڭ ۇزىن سانى 22 ادامدى قۇراپ وتىر.
«ديۆيدەند رەتىندە جەرىنەن ەشتەڭە الا الماي وتىرعان 22 شارۋانىڭ اتىنان سوتقا شاعىم بەردىك. كەلتىرىلگەن شىعىن 4,5 ميلليون تەڭگەنى قۇرايدى. سوتقا اكىم مەن بوجكونىڭ وكىلدەرى قاتىسىپ جاتىر. تسەلينوگراد اۋدانى مەن كوكشەتاۋ وبلىستىق سوتى العاشقىدا اكىمنىڭ پايداسىنا شەشىلدى. كەيىننەن بارىپ سوت ءىسىمىزدى قايتا قارادى»، - دەيدى تولەگەنوۆا.
2017 جىلى شارۋالاردىڭ ادۆوكاتى تۇرسىن تولەگەنوۆا «قازاقستان» تەلەارناسىنا سۋديالار قاتىسقان باعدارلاماعا سپيكەر رەتىندە شاقىرىلىپتى. تەلەارنا ەفيرىن پايدالانعان زاڭگەر ورازاق اۋىلى تۇرعىندارىنىڭ جاي-كۇيىن سۋديالارعا جايىپ سالعان. ەفيردەن ءبىر اي وتكەن سوڭ اقمولا وبلىستىق سوتى شارۋالاردىڭ شاعىمىن قايتا قاراپ، اكىمنىڭ ءىسىن «زاڭسىز» دەپ تانىعان.
«اكىمگە جەردىڭ زاڭسىز بەرىلىپ وتىرعانىن دالەلدەدىك. بىراق ول سوت شەشىمىندە جەردى قايتارۋ تۋرالى ءسوز جازىلماعان دەگەندى العا تارتىپ، جەردى ءالى قايتارماي وتىر. اكىمنىڭ اتا-زاڭدى سىيلاماعانى بىلاي تۇرسىن، ول ءوز حالقىمەن سوتتاسىپ وتىر. مۇندا سىبايلاس جەمقورلىق تا بار. بوجكودان العان اقشاسىن قايتارعىسى كەلمەي وتىرعانى انىق»، - دەپ كۇيىندى اۆدوكات.
ايتا كەتەتىنى، 24-25 اقپاندا تسەلينوگراد اۋدانىندا اتالعان ءىس بويىنشا قوس بىردەي سوت وتىرىسى وتەدى.
ايجان قاليەۆا،
نۇر-سۇلتان
