قازاقستاندا كوروناۆيرۋس تابىلماسا دا، شەنەۋنىكتەر ونىمەن كۇرەسكە بولىنگەن 2 ميلليارد تەڭگەنى جۇمساپ قويىپتى. وسىعان قاتىستى الەۋمەتتىك جەلىلەردە جۇرت نارازىلىق ءبىلدىرىپ، شەنەۋنىكتەردەن تۇسىنىكتەمە بەرۋدى تالاپ ەتتى. بىراق جۋرناليستەر اڭگىمەگە تارتقان لاۋازىمدى شەنەۋنىك اقشانىڭ قايدا كەتكەنىن ايتا المايتىنىن مالىمدەدى.
دەنساۋلىق ساقتاۋ ءمينيسترى ەلجان ءبىرتانوۆ مىڭ دا، ميلليون دا ەمەس، ميللياردتاعان بيۋدجەت قاراجاتىنىڭ قايدا جۇمسالىپ كەتكەنىن حالىققا ايتۋعا رۇقساتى جوعىن جەتكىزدى.
– كوروناۆيرۋسپەن كۇرەسكە اقشا ۇكىمەت قاۋلىسىنا سايكەس بولىنۋدە. دەگەنمەن وعان قاتىستى مالىمەت «قىزمەت بابىندا پايدالانۋ ءۇشىن» دەگەن اقپاراتقا جاتادى. مۇنى دەنساۋلىق ساقتاۋ مينيسترلىگى ويلاپ تاپقان جوق، ول ۇكىمەتتىڭ قاۋلىسى. مەن قۋانا-قۋانا ايتىپ بەرەر ەدىم، الايدا ونداي قۇقىم جوق! – دەدى ە.ءبىرتانوۆ.
«جالپى، سول اقشاعا قورعانىش قۇرالدارى، ونىڭ ىشىندە مەديتسينالىق ماسكالار، كوستيۋمدەر، كوزاينەكتەر، دەزينفەكتسيالىق زاتتار، زەرتحانالار، دياگنوستيكالاۋعا ارنالعان زەرتحانالىق جابدىقتار، تەپلوۆيزورلار ساتىپ الىندى. ويتكەنى كەڭ اۋقىمدى تەكسەرۋ، دياگنوز قويۋ شارالارىن ىسكە اسىرۋ قاجەت. قۇرالدار اراسىندا تەك مەديتسينا ماماندارىنا عانا ەمەس، سونداي-اق شەكاراشىلارعا ارنالعانى دا بار بولعاندىقتان، بۇل ەندى تەك قىزمەت بابىندا پايدالانىلاتىن جابىق اقپارات»، – دەدى مينيستر ە.ءبىرتانوۆ.
بيلىكتىڭ حالىق قارجىسىنىڭ جۇمسالۋىن حالىقتان جاسىرعانىنا جۋرناليستەر شىن كەيىدى. وسى ورايدا، جامبىل وبلىسىنىڭ جاڭا اكىمى بەردىبەك ساپارباەۆتىڭ ايتقان ءسوزى ەلەڭ ەتكىزەدى. ءوڭىر قىرعىز ەلىمەن شەكتەسەتىنى بەلگىلى. ونىڭ تىزگىنىن قولىنا الماس بۇرىن بەردىبەك ماشبەكۇلى قوردايداعى قاقتىعىستىڭ ءمان-جايىن زەرتتەگەن ۇكىمەتتىك كوميسسيانىڭ جەتەكشىسى رەتىندە شەكارانىڭ جانە كەدەن بەكەتتەرىنىڭ بەرىكتىگى مەن بۇتىندىگىن تەكسەرىپ قايتتى.
سوندا كەدەنشىلەر جاڭادان ساتىپ الىنعان تەرموسكانەرلەۋ قۇرىلعىسىن پاش ەتتى. ول تاپانشاعا ۇقساس جانە «ۇڭعىسىنان» لازەرلىك ساۋلە شىعادى. سونى ادامنىڭ ماڭدايىنا كوزدەۋ ارقىلى ونىڭ دەنە تەمپەراتۋراسى قاشىقتىقتان ولشەنەدى.
– شەكارادا باقىلاۋ ناشار. اناۋ تەپلوۆيزورلارى جۇمىس ءىستەمەيدى، وتىرىك نارسە. ادام تەمپەراتۋراسىن ولشەسە، ونىسى 30 گرادۋستى كورسەتەدى. ادامدا سونداي تەمپەراتۋرا دا بولا ما ەكەن؟! 30 گرادۋس بولمايدى عوي، ەڭ كەم دەگەندە 35 بولۋى كەرەك. ەندەشە ءبىز كوروناۆيرۋسپەن دەرتتى ناۋقاستى شەكارادا قالاي انىقتايمىز؟ ونىڭ ۇستىنە ادامدار قىرعىز ەلىنەن بەرى ءوتىپ جاتىر. ال قىرعىز رەسپۋبليكاسىنىڭ قىتايمەن شەكاراسى ورتاق. وسىعان كوڭىل ءبولمەسەك، بولمايدى»، – دەدى جامبىل وبلىسىنىڭ اكىمى. ب.ساپارباەۆ اكىمدىك اپپاراتىنا جانە جەرگىلىكتى دەنساۋلىق ساقتاۋ باسقارماسىنا ولقىلىقتى جويۋ جونىندە ءتيىستى تاپسىرمالار بەردى.
قحر-مەن ىرگەلەس وزگە وڭىرلەرىمىزدىڭ اكىمدەرى ازىرگە تىم-تىرىس.
aikyn.kz