Qazaqstanda koronavırýs tabylmasa da, sheneýnikter onymen kúreske bólingen 2 mıllıard teńgeni jumsap qoıypty. Osyǵan qatysty áleýmettik jelilerde jurt narazylyq bildirip, sheneýnikterden túsinikteme berýdi talap etti. Biraq jýrnalıster áńgimege tartqan laýazymdy sheneýnik aqshanyń qaıda ketkenin aıta almaıtynyn málimdedi.
Densaýlyq saqtaý mınıstri Eljan Birtanov myń da, mıllıon da emes, mıllıardtaǵan bıýdjet qarajatynyń qaıda jumsalyp ketkenin halyqqa aıtýǵa ruqsaty joǵyn jetkizdi.
– Koronavırýspen kúreske aqsha Úkimet qaýlysyna sáıkes bólinýde. Degenmen oǵan qatysty málimet «Qyzmet babynda paıdalaný úshin» degen aqparatqa jatady. Muny Densaýlyq saqtaý mınıstrligi oılap tapqan joq, ol Úkimettiń qaýlysy. Men qýana-qýana aıtyp berer edim, alaıda ondaı quqym joq! – dedi E.Birtanov.
«Jalpy, sol aqshaǵa qorǵanysh quraldary, onyń ishinde medıınalyq maskalar, kostıýmder, kózáınekter, dezınfekııalyq zattar, zerthanalar, dıagnostıkalaýǵa arnalǵan zerthanalyq jabdyqtar, teplovızorlar satyp alyndy. Óıtkeni keń aýqymdy tekserý, dıagnoz qoıý sharalaryn iske asyrý qajet. Quraldar arasynda tek medıına mamandaryna ǵana emes, sondaı-aq shekarashylarǵa arnalǵany da bar bolǵandyqtan, bul endi tek qyzmet babynda paıdalanylatyn jabyq aqparat», – dedi mınıstr E.Birtanov.
Bıliktiń halyq qarjysynyń jumsalýyn halyqtan jasyrǵanyna jýrnalıster shyn keıidi. Osy oraıda, Jambyl oblysynyń jańa ákimi Berdibek Saparbaevtyń aıtqan sózi eleń etkizedi. Óńir Qyrǵyz elimen shektesetini belgili. Onyń tizginin qolyna almas buryn Berdibek Mashbekuly Qordaıdaǵy qaqtyǵystyń mán-jaıyn zerttegen úkimettik komıssııanyń jetekshisi retinde shekaranyń jáne keden beketteriniń beriktigi men bútindigin tekserip qaıtty.
Sonda kedenshiler jańadan satyp alynǵan termoskanerleý qurylǵysyn pash etti. Ol tapanshaǵa uqsas jáne «uńǵysynan» lazerlik sáýle shyǵady. Sony adamnyń mańdaıyna kózdeý arqyly onyń dene temperatýrasy qashyqtyqtan ólshenedi.
– Shekarada baqylaý nashar. Anaý teplovızorlary jumys istemeıdi, ótirik nárse. Adam temperatýrasyn ólshese, onysy 30 gradýsty kórsetedi. Adamda sondaı temperatýra da bola ma eken?! 30 gradýs bolmaıdy ǵoı, eń kem degende 35 bolýy kerek. Endeshe biz koronavırýspen dertti naýqasty shekarada qalaı anyqtaımyz? Onyń ústine adamdar Qyrǵyz elinen beri ótip jatyr. Al Qyrǵyz Respýblıkasynyń Qytaımen shekarasy ortaq. Osyǵan kóńil bólmesek, bolmaıdy», – dedi Jambyl oblysynyń ákimi. B.Saparbaev ákimdik apparatyna jáne jergilikti densaýlyq saqtaý basqarmasyna olqylyqty joıý jóninde tıisti tapsyrmalar berdi.
QHR-men irgeles ózge óńirlerimizdiń ákimderi ázirge tym-tyrys.
aikyn.kz
