فوتوكوللاج
الماتى وبلىسىنىڭ شامالعان ستانتسياسىندا بولعان اپاتقا قاتىستى سوت وتىرىسى 5 ايدان سوڭ باستالدى. قاسكەلەڭ قالالىق سوتىندا قارالاتىن شۋلى ىستە ايىپتى رەتىندە تەك ءبىر عانا ادام قاراستىرىلعان، ول – سول كۇنى كەزەكشىلىكتە بولعان ديسپەتچەر دوسباتىر احمەتجانوۆ. ءومىرىنىڭ جارتىسىن تەمىر جول وتكەلىن كۇزەتۋگە ارناعان 60 جاستاعى احمەتجانوۆ وزىنە تاعىلعان ايىپتارمەن مۇلدەم كەلىسپەيدى.
وقيعاعا كۋاگەر رەتىندە 80-نەن استام ادام تارتىلعان. تەك 5 جانە 3 جاستاعى بالالارىمەن بىرگە زارداپ شەككەن ەلميرا جانىبەكوۆا عانا جابىرلەنۋشى رەتىندە تانىلىپ وتىر.
«ءىرى كولەمدە مۇلىكتىك شىعىن اكەلدى. ابايسىزدا ءبىر ادامنىڭ ولىمىنە اكەپ سوقتى. اۋىر جانە ورتاشا زيان كەلتىرەتىن دەنە جاراقاتتارىن تۋدىردى. دوسباتىر احمەتجانوۆ وزىنە جۇكتەلگەن مىندەتتى ءتيىستى دەڭگەيدە ورىنداماي، تەمىر جول قوزعالىسى قاۋىپسىزدىگىنىڭ ەرەجەلەرىن بۇزعان. دەمەك ول قر قك 344-بابىنىڭ 2 بولىگىندە كورسەتىلگەن قىلمىستىق قۇقىق بۇزۋشىلىقتى جاساعان. احمەتجانوۆقا قاتىستى ايىپتاۋ اكتىسىن تولىعىمەن قولدايمىن»، - دەدى جارتى ساعات ايىپتاۋ اكتىسىن وقىعان جەتىسۋ كولىك پروكۋراتۋراسىنىڭ پروكۋرورى ە.ساپاەۆ.
ايىپتاۋ اكتىسىندە اپات سالدارىنان «قازاقستان تەمىر جولى» ۇك» اق قاراستى «جۇك تاسىمالى» كومپانياسى 6 ميلليون 744 مىڭ تەڭگەنىڭ زيانىن شەككەنى كورسەتىلىپتى. سونداي-اق، جۇك پويىزدارى كىدىرىپ، زاڭدى تۇلعالارعا 1 ميلليون 95 مىڭ تەڭگەنىڭ شىعىنى كەلگەن. قاسكەلەڭ اۆتوبۋس پاركى دە 2 ميلليون 431 مىڭ تەڭگە شىعىندى قاراپايىم ديسپەچەردەن ءوندىرىپ الماق. دوسباتىر احمەتجانوۆتىڭ «ارەكەتىنەن» كەلگەن زالالدىڭ جالپى سومماسى 10 ميلليون 316 مىڭ 389 تەڭگەنى قۇرايدى. بۇل ميلليوندارعا مورالدىق شىعىندار ءالى قوسىلماعان.
كۋاگەرلىككە اۆتوبۋس ىشىندەگى جولاۋشىلاردان بولەك، كەپتەلىستە تۇرعان جۇرگىزۋشىلەر دە شاقىرتىلىپتى.
«كەپتەلىس بولعاندا ءبىراز ادام وتكەلگە جەتپەي ءتۇسىپ قالعان. مەن دە بالاممەن بىرگە اۆتوبۋستان شىعىپ، باسقا كولىككە وتىرايىن دەدىم دە، تاكسيگە تاعى 100 تەڭگە شىعىنداپ قايتەم، وتىرا بەرەيىك دەپ ويلادىم. الىستان پويىزدىڭ جارىعى كورىنگەندە اۆتوبۋستاعى ادامدار ەسىككە جۇگىرىپ، ايعايلاي باستادى. اپات الدىندا ديسپەچەردىڭ كەلە جاتقان پويىزدىڭ الدىنا قاراي، سوسىن اۆتوبۋستىڭ الدى-ارتىنا جۇگىرىپ جۇرگەنىن كوردىم. ءبىراز ۋاقىتتان سوڭ عانا ەسىك اشىلىپ، جولاۋشىلاردىڭ ءبارى باسىلىپ-جانشىلىپ سىرتقا ۇمتىلدى. 12 جاستاعى ۇلىم بولعان قاسىمدا. ەلدىڭ سوڭىنا قاراي ۇلىمدى اۆتوبۋستان شىعارىپ ۇلگەرگەنىم سول ەدى، پويىز اۆتوبۋستى كەلىپ سوقتى. ەسىكتەن شىعىپ بارا جاتقاندا جۇرگىزۋشىنىڭ رۋلگە قاتتى جابىسقان قالپىندا باسىن تومەن سالىپ وتىرىپ قالعانىن كوردىم»، - دەدى كۋاگەرلەردىڭ ءبىرى ايگۇل الدابەرگەنوۆا.
قوس پروكۋرور وتكەل كەزەكشىسى دەر كەزىندە ماشينيسكە جىلدامدىقتى تەجەۋ تۋرالى حابارلاماعان، اپاتتى جاعدايدىڭ تۋىنداعانى تۋرالى دابىل كوتەرمەگەن دەپ وتىر. قر قك 344 بابىنىڭ 2-بولىگى (ابايسىزدا ادام ولiمiنە اكەپ سوققان ءدال سول ءىس-ارەكەت) بويىنشا سوتقا تارتىلاتىن احمەتجانوۆتىڭ قىلمىسى دالەلدەنسە 7 جىلعا دەيىن باس بوستاندىعىنان ايرىلۋى مۇمكىن. الايدا، كۇدىكتىنىڭ ادۆوكاتى تەرگەۋ امالدارى بىرجاقتى جۇرگىزىلگەن دەپ سانايدى. ونىڭ پىكىرىنشە، ۇزاق جىل شەشىلمەي كەلە جاتقان تۇيتكىلدى پروبلەمانىڭ اقىرى اپاتقا اكەلۋىن شەندىلەر ءالسىزدى ايىپتى قىلۋ ارقىلى قۇتىلماق.
«جۇرگىزىلگەن تەرگەۋ دۇرىس ەمەس. ايىپتاۋ تەك بىرجاقتى جۇرگىزىلىپ، ءبىزدىڭ دالەلدەرىمىزگە كوڭىل اۋدارعان جوق. قىلمىستىق ءىستى قىسقارتۋ كەرەك ەدى. احمەتجانوۆتىڭ ەش كىناسى جوق. بىزدەگى قۇقىق قورعاۋ ورگاندارىنىڭ قاتەسى – بىرەۋدى كىنالى عىپ شىعارۋ. 60 جاستاعى دوسباتىردىڭ ءومىرى وسى تەمىر جولدا جۇمىس ىستەۋمەن ءوتتى. اپاتقا دەيىن تەك جاقسى قىرىنان تانىلعان. ساراپتاما قورتىندىسىمەن كەلىسپەيمىز، تەرگەۋگە قايتا جىبەرۋ كەرەك»، - دەدى احمەتجانوۆتىڭ ادۆوكاتى شاميان جايىلحانوۆ.
العاشقى سوت وتىرىسىنا قوس سابيىمەن بىرگە اپاتتان اۋىر جاراقات العان جابىرلەنۋشى ەلميرا جانىبەكوۆا مەن مارقۇمنىڭ (جۇرگىزۋشى -اۆت.) جەسىرى لەيلا جارىلعاسوۆا قاتىسقان جوق..
ەسكە سالايىق، بىلتىر 15 قىركۇيەكتە شامالعان ستانتسياسىنداعى تەمىر جول وتكەلىندە پويىز بەن اۆتوبۋستىڭ سوقتىعىسىپ، سالدارىنان اۆتوبۋس جۇرگىزۋشىسى وقيعا ورنىندا قايتىس بولعان ەدى.
ءامىربولات قۇسايىنۇلى، الماتى
"ازاتتىق رۋحى"
