اقمولا وبلىسىنىڭ تۇرعىنى Instagram الەۋمەتتىك جەلىسى ارقىلى زاڭسىز قۇمار ويىندارىن ۇيىمداستىرعانى ءۇشىن 4 جىلعا باس بوستاندىعىنان ايىرىلدى، دەپ حابارلايدى "ادىرنا".
سوت ماتەريالدارىنا سايكەس، ايەل الەۋمەتتىك جەلىدە ارنايى پاراقشا اشىپ، وندا ويىندارعا قاتىسۋعا شاقىراتىن حابارلاندىرۋلار جاريالاعان. ول تىكەلەي ەفير ارقىلى كارتا ويىندارىن وتكىزىپ، ءار ويىنعا ءتورت ادامنان قاتىستىرعان. جەڭىمپاز ەڭ جوعارى كارتا تۇسكەن قاتىسۋشى بولىپ انىقتالعان.
ويىنعا قاتىسۋشىلاردىڭ ءباس تىگەتىن سوماسى 100 تەڭگەدەن 2 100 تەڭگەگە دەيىن بولعان. ال ۇيىمداستىرۋشى جينالعان قاراجاتتىڭ بەلگىلى ءبىر بولىگىن وزىنە الىپ وتىرعان.
تەرگەۋ بارىسىندا ايەلدىڭ وسىنداي جولمەن ءبىر جىل ىشىندە 90,6 ميلليون تەڭگەدەن استام زاڭسىز تابىس تاپقانى انىقتالدى.
سوت ونى قازاقستان رەسپۋبليكاسى قىلمىستىق كودەكسىنىڭ 307-بابى 2-بولىگىنىڭ 3-تارماعىندا كوزدەلگەن، ياعني زاڭسىز ويىن بيزنەسىن ۇيىمداستىرۋ قىلمىسى بويىنشا كىنالى دەپ تانىدى.
سوت ۇكىمىمەن ايەلگە 4 جىل باس بوستاندىعىنان ايىرۋ جازاسى تاعايىندالدى. سونىمەن قاتار پروكۋروردىڭ زاڭسىز جولمەن الىنعان 90,6 ميلليون تەڭگەنى مەملەكەت كىرىسىنە ءوندىرۋ تۋرالى تالابى تولىق كولەمدە قاناعاتتاندىرىلدى.
