جوعارعى سوت قۋاندىق بيشىمباەۆ پەن باقىتجان بايجانوۆ ءىسى بويىنشا اپەللياتسيالىق سوتىنىڭ ءبىرىنشى وتىرىسىن وتكىزدى. سوتتا ءبىرىنشى بولىپ ق.بيشىمباەۆتىڭ ادۆوكاتى ەرلان عازىمجانوۆ ءسوز سويلەدى، دەپ حابارلايدى “ادىرنا” ۇلتتىق پورتالى.
قورعاۋشى بيشىمباەۆقا شىعارىلعان ۇكىممەن كەلىسپەيتىنىن مالىمدەدى.
«مەن ۇكىمدى زاڭسىز دەپ سانايمىن جانە قىلمىستىق كودەكستىڭ «ابايسىزدا ولىمگە اكەپ سوقتىرعان دەنساۋلىققا اۋىر زيان كەلتىرۋ» بويىنشا 106-بابىنا اۋىستىرىلىپ، جازا ازايتىلۋى قاجەت. ال «ازاپتاۋ» بابى بويىنشا ۇكىمنىڭ كۇشى جويىلىپ، ءىس قايتا قاراۋعا جىبەرىلۋى كەرەك»، - دەدى ە.عازىمجانوۆ.
ونىڭ ايتۋىنشا، ۇكىمدى وزگەرتۋگە جانە جويۋعا بولادى. ويتكەنى قورعاۋشى ءبىرىنشى ساتىداعى سوت جاساعان 20 بۇزۋشىلىقتى انىقتاپ، اپەللياتسيادا كورسەتكەن. ادۆوكات القابيلەر القاسىن قۇرۋ كەزىندە سوتتىڭ كەيبىر كانديداتتارعا قارسىلىق ءبىلدىرۋىن ءبىرىنشى اۋىر قۇقىقبۇزۋشىلىق دەپ اتادى.
«سۋديا ءوز ەركىمەن شەشىم قابىلداپ، قايسىسىنىڭ سوتتالۋشىمەن جاستى بالالارى بار ەكەنىن انىقتاي باستادى جانە 20 ۇمىتكەردىڭ ىشىنەن تورتەۋىن شىعارىپ تاستادى. شىعارىلعان ءۇش ۇمىتكەردىڭ ۇلدارى بار ەدى. وسىلايشا، سۋديا القابيلەر القاسىن قۇرۋ ءتارتىبىن بۇزباعاندا جانە زاڭ بويىنشا ارەكەت ەتكەندە، وسى 4 ۇمىتكەردىڭ ىشىنەن بىرەۋ نەگىزگى قۇرامعا كىرىپ، داۋىس بەرەر ەدى. ۇكىم باسقاشا بولۋى مۇمكىن ەدى»، - دەدى ە.عازىمجانوۆ.
ەسكە سالساق، 2023 جىلى 9 قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ ءوزىنىڭ جۇبايى سالتانات نۇكەنوۆانى سوققىعا جىققان بولاتىن. ايەل جەدەل جاردەم جەتكەنشە كوز جۇمدى.
قۋاندىق بيشىمباەۆ 24 جىلعا سوتتالدى.
