استانادا ءوتىپ جاتقان ەكس-مينيستر قۋاندىق بيشىمباەۆتىڭ ىسىنە قاتىستى سوت وتىرىسىنا جۋرناليستەر قايتادان تىكەلەي قاتىسا الادى. بۇل تۋرالى بۇگىنگى سوت بارىسىندا ايتىلدى، دەپ حابارلايدى “ادىرنا” ۇلتتىق پورتالى.
«القا بيلەردى سوت وتىرىسى زالىنا شاقىرماس بۇرىن، تەكسەرۋ ناتيجەسىندە انىقتالعانداي ولاردىڭ فوتولارى مەن ۆيدەوسىن باق-تا جاريالاعان كتك ارناسىنىڭ وكىلدەرى اكىمشىلىك جاۋاپكەرشىلىككە تارتىلدى. اكىمشىلىك جازا ەسكەرتۋ تۇرىندە قولدانىلدى»، - دەدى سۋديا ايجان قۇلباەۆا.
سونداي-اق، سۋديا جۋرناليستەردى سوت زالىنا كىرگىزۋگە رۇقساتتى داۋىسقا سالدى، ق. بيشىمباەۆ پەن ونىڭ قورعاۋشىلارى قارسى شىقتى، قالعان جاق قارسىلىق تانىتپادى. وسىلايشا سۋديا 10 مينۋتقا ءۇزىلىس جاريالادى.
«سوت پروتسەسىنىڭ اشىق ءوتىپ جاتقانىن ەسكەرە وتىرىپ، قىلمىستىق ءىس جۇرگىزۋ كودەكسىنىڭ 29-بابىندا بەكىتىلگەن ءىس جۇرگىزۋ سوتىنىڭ جاريالىلىق قاعيداتىن قامتاماسىز ەتۋ جانە ءادىل سوت تالقىلاۋى ماقساتىندا سوت بۇقارالىق اقپارات قۇرالدارىنىڭ وكىلدەرىن سوت زالىنا كىرۋىنە رۇقسات بەرۋ قاجەت دەپ سانايدى. سونداي-اق، كتك ارناسى دا سوت زالىنا جول بەرىلەدى، ويتكەنى بۇعان دەيىن ولارعا قاتىستى اكىمشىلىك جاۋاپكەرشىلىك قولدانىلدى»، - دەيدى سۋديا.
ەسكە سالايىق، سوتتىڭ تىيىم سالۋىنا قاراماستان، باق-تا جانە الەۋمەتتىك جەلىلەردە القا بيلەردىڭ بەت-الپەتى بەينەلەنگەن ۆيدەو پايدا بولعان ەدى. سودان كەيىن سوت باق وكىلدەرىن سوت زالىنا كىرگىزبەۋ تۋرالى شەشىم قابىلدادى.
