Fotokollaj
Almaty oblysynyń Shamalǵan stanııasynda bolǵan apatqa qatysty sot otyrysy 5 aıdan soń bastaldy. Qaskeleń qalalyq sotynda qaralatyn shýly iste aıypty retinde tek bir ǵana adam qarastyrylǵan, ol – sol kúni kezekshilikte bolǵan dıspetcher Dosbatyr Ahmetjanov. Ómiriniń jartysyn temir jol ótkelin kúzetýge arnaǵan 60 jastaǵy Ahmetjanov ózine taǵylǵan aıyptarmen múldem kelispeıdi.
Oqıǵaǵa kýáger retinde 80-nen astam adam tartylǵan. Tek 5 jáne 3 jastaǵy balalarymen birge zardap shekken Elmıra Janybekova ǵana jábirlenýshi retinde tanylyp otyr.
«Iri kólemde múliktik shyǵyn ákeldi. Abaısyzda bir adamnyń ólimine ákep soqty. Aýyr jáne ortasha zııan keltiretin dene jaraqattaryn týdyrdy. Dosbatyr Ahmetjanov ózine júktelgen mindetti tıisti deńgeıde oryndamaı, temir jol qozǵalysy qaýipsizdiginiń erejelerin buzǵan. Demek ol QR QK 344-babynyń 2 bóliginde kórsetilgen qylmystyq quqyq buzýshylyqty jasaǵan. Ahmetjanovqa qatysty aıyptaý aktisin tolyǵymen qoldaımyn», - dedi jarty saǵat aıyptaý aktisin oqyǵan Jetisý kólik prokýratýrasynyń prokýrory E.Sapaev.
Aıyptaý aktisinde apat saldarynan «Qazaqstan temir joly» UK» AQ qarasty «Júk tasymaly» kompanııasy 6 mıllıon 744 myń teńgeniń zııanyn shekkeni kórsetilipti. Sondaı-aq, júk poıyzdary kidirip, zańdy tulǵalarǵa 1 mıllıon 95 myń teńgeniń shyǵyny kelgen. Qaskeleń avtobýs parki de 2 mıllıon 431 myń teńge shyǵyndy qarapaıym dıspecherden óndirip almaq. Dosbatyr Ahmetjanovtyń «áreketinen» kelgen zalaldyń jalpy sommasy 10 mıllıon 316 myń 389 teńgeni quraıdy. Bul mıllıondarǵa moraldyq shyǵyndar áli qosylmaǵan.
Kýágerlikke avtobýs ishindegi jolaýshylardan bólek, kepteliste turǵan júrgizýshiler de shaqyrtylypty.
«Keptelis bolǵanda biraz adam ótkelge jetpeı túsip qalǵan. Men de balammen birge avtobýstan shyǵyp, basqa kólikke otyraıyn dedim de, taksıge taǵy 100 teńge shyǵyndap qaıtem, otyra bereıik dep oıladym. Alystan poıyzdyń jaryǵy kóringende avtobýstaǵy adamdar esikke júgirip, aıǵaılaı bastady. Apat aldynda dıspecherdiń kele jatqan poıyzdyń aldyna qaraı, sosyn avtobýstyń aldy-artyna júgirip júrgenin kórdim. Biraz ýaqyttan soń ǵana esik ashylyp, jolaýshylardyń bári basylyp-janshylyp syrtqa umtyldy. 12 jastaǵy ulym bolǵan qasymda. Eldiń sońyna qaraı ulymdy avtobýstan shyǵaryp úlgergenim sol edi, poıyz avtobýsty kelip soqty. Esikten shyǵyp bara jatqanda júrgizýshiniń rýlge qatty jabysqan qalpynda basyn tómen salyp otyryp qalǵanyn kórdim», - dedi kýágerlerdiń biri Aıgúl Aldabergenova.
Qos prokýror ótkel kezekshisi der kezinde mashınıske jyldamdyqty tejeý týraly habarlamaǵan, apatty jaǵdaıdyń týyndaǵany týraly dabyl kótermegen dep otyr. QR QK 344 babynyń 2-bóligi (Abaısyzda adam ólimine ákep soqqan dál sol is-áreket) boıynsha sotqa tartylatyn Ahmetjanovtyń qylmysy dáleldense 7 jylǵa deıin bas bostandyǵynan aırylýy múmkin. Alaıda, kúdiktiniń advokaty tergeý amaldary birjaqty júrgizilgen dep sanaıdy. Onyń pikirinshe, uzaq jyl sheshilmeı kele jatqan túıtkildi problemanyń aqyry apatqa ákelýin shendiler álsizdi aıypty qylý arqyly qutylmaq.
«Júrgizilgen tergeý durys emes. Aıyptaý tek birjaqty júrgizilip, bizdiń dálelderimizge kóńil aýdarǵan joq. Qylmystyq isti qysqartý kerek edi. Ahmetjanovtyń esh kinási joq. Bizdegi quqyq qorǵaý organdarynyń qatesi – bireýdi kináli ǵyp shyǵarý. 60 jastaǵy Dosbatyrdyń ómiri osy temir jolda jumys isteýmen ótti. Apatqa deıin tek jaqsy qyrynan tanylǵan. Saraptama qortyndysymen kelispeımiz, tergeýge qaıta jiberý kerek», - dedi Ahmetjanovtyń advokaty Shamııan Jaıylhanov.
Alǵashqy sot otyrysyna qos sábıimen birge apattan aýyr jaraqat alǵan jábirlenýshi Elmıra Janybekova men marqumnyń (júrgizýshi -avt.) jesiri Leıla Jarylǵasova qatysqan joq..
Eske salaıyq, byltyr 15 qyrkúıekte Shamalǵan stanııasyndaǵy temir jol ótkelinde poıyz ben avtobýstyń soqtyǵysyp, saldarynan avtobýs júrgizýshisi oqıǵa ornynda qaıtys bolǵan edi.
Ámirbolat Qusaıynuly, Almaty
"Azattyq rýhy"
