قازاقستان رەسپۋبليكاسى ۇلتتىق مۋزەيىندە «تاريحي فوتوسۋرەتتەر» بايقاۋىنىڭ جەڭىمپازدارىن ماراپاتتاۋ ءراسىمى ۇيىمداستىرىلىپ، اتالمىش بايقاۋدا ءار اتالىم بويىنشا جەڭىمپاز اتانعان قانات نۇرتازين، ۆاديم مۋداريسوۆ جانە ماقسات شاعىرباەۆ سىندى فوتوگرافتاردىڭ كورمەسى اشىلدى.
«تاريحي فوتوسۋرەتتەر» بايقاۋىنىڭ ۇيىمداستىرۋشىسى – قازاقستان رەسپۋبليكاسى ۇلتتىق مۋزەيى. فوتوگرافتار بايقاۋى 2015 جىلعى اقپان ايى مەن 30 قازان ارالىعىندا وتكەن بولاتىن. بايقاۋ «قازاق حاندىعىنىڭ 550 جىلدىعى»، «جەڭىستىڭ 70 جىلدىعى»، «قر كونستيتۋتسياسىنىڭ 20 جىلدىعى» جانە «قازاقستان حالىقتارى اسسامبلەياسىنىڭ 20 جىلدىعى» دەگەن اتالىمدار بويىنشا ءوتتى.
بايقاۋ قازاق تاريحىنىڭ اسا ماڭىزدى وقيعالارىنا قوعام نازارىن اۋدارتۋدى جانە جاس ۇرپاقتىڭ تۋعان ەلىنىڭ بولاشاعى مەن ءتول تاريحىنا دەگەن قۇرمەتىن ارتتىرۋدى كوزدەدى.
بايقاۋعا بارلىعى 27 فوتوگراف ءوز جۇمىسىن ۇسىندى. مۇندا كاسىبي جانە اۋەسقوي فوتوگرافتارعا بىردەي مۇمكىندىك بەرىلدى.
«وتكەن جىل ايتۋلى داتالارعا تولى جىل بولدى. وسىعان وراي ءبىز رەسپۋبليكالىق فوتوبايقاۋ جاريالادىق. بۇل بايقاۋ بەلگىلى ءبىر تاقىرىپ اياسىمەن شەكتەلىپ قالعان جوق، مۇندا قازاقستاننىڭ تىنىس-تىرشىلىگى جان-جاقتى قامتىلىپ، قاس-قاعىم ساتتەردىڭ بارلىعى فوتوتاريحقا اينالدى»، - دەدى ۇلتتىق مۋزەيدىڭ ديرەكتورى دارحان مىڭباي.
ءCوز اراسىندا ول ۇلتتىق مۋزەي ەلىمىزدىڭ رۋحاني، مادەني ومىرىنە بەلسەندى اتسالىسۋىن جالعاستىرا بەرەتىنىن باياندادى.
«ۇلتتىق مۋزەي الداعى ۋاقىتتا دا فوتوبايقاۋ وتكىزەدى. ءبىر بايقاعانىمىز، بىزگە ءالى دە بولسا فوتوونەر سالاسىن دامىتۋ جانە فوتوونەرگە دەگەن قىزىعۋشىلىقتى ارتتىرۋ قاجەت. بىزدە كاسىبي فوتوگرافتار كوپ. ولار قازاقستاندى شەت مەملەكەتكە جاڭا قىرىنان تانىتۋ الەۋەتىنە يە. ءبىز تاريحى تەرەڭ، سيقىرى مول ونەر يەلەرىنە قولداۋ كورسەتە بەرۋىمىز كەرەك. ويتكەنى ولار تاريحتى تاڭبالاپ، تاريحتى جازىپ جاتىر»، - دەدى مۋزەي باسشىسى.
وسىدان سوڭ د.مىڭباي قازىلار القاسىنىڭ شەشىمىمەن «قازاق حاندىعىنىڭ 550 جىلدىعى» اتالىمىندا توپ جارعان نازارباەۆ ۋنيۆەرسيتەتىنىڭ اكىمشىلىك قىزمەتكەرى، اۋەسقوي فوتوگراف قانات نۇرتازينگە، «جەڭىستىڭ 70 جىلدىعى» اتالىمىندا «جۇزدەن جۇيرىك» دەپ تانىلعان پەتروپاۆل قالاسىنداعى «سولتۇستىك قازاقستان» باسپاحاناسىنىڭ ءفوتوتىلشىسى، كاسىپقوي فوتوگراف ۆاديم مۋداريسوۆقا سونداي-اق «كونستيتۋتسيانىڭ 20 جىلدىعى» جانە «قازاقستان حالقى اسسامبلەياسىنىڭ 20 جىلدىعى» اتالىمىندا ەشكىمگە دەس بەرمەگەن «وڭتۇستىكفيلم» مەملەكەتتىك مەكەمەسى ديرەكتورىنىڭ ورىنباسارى، كاسىپقوي فوتوگراف ماقسات شاعىرباەۆقا العىس حات پەن قوماقتى قارجىلاي سىياقى تابىس ەتتى.
