Qazaqstan Respýblıkasy Ulttyq mýzeıinde «Tarıhı fotosýretter» baıqaýynyń jeńimpazdaryn marapattaý rásimi uıymdastyrylyp, atalmysh baıqaýda ár atalym boıynsha jeńimpaz atanǵan Qanat Nurtazın, Vadım Mýdarısov jáne Maqsat Shaǵyrbaev syndy fotograftardyń kórmesi ashyldy.
«Tarıhı fotosýretter» baıqaýynyń uıymdastyrýshysy – Qazaqstan Respýblıkasy Ulttyq mýzeıi. Fotograftar baıqaýy 2015 jylǵy aqpan aıy men 30 qazan aralyǵynda ótken bolatyn. Baıqaý «Qazaq handyǵynyń 550 jyldyǵy», «Jeńistiń 70 jyldyǵy», «QR Konstıtýııasynyń 20 jyldyǵy» jáne «Qazaqstan halyqtary Assambleıasynyń 20 jyldyǵy» degen atalymdar boıynsha ótti.
Baıqaý qazaq tarıhynyń asa mańyzdy oqıǵalaryna qoǵam nazaryn aýdartýdy jáne jas urpaqtyń týǵan eliniń bolashaǵy men tól tarıhyna degen qurmetin arttyrýdy kózdedi.
Baıqaýǵa barlyǵy 27 fotograf óz jumysyn usyndy. Munda kásibı jáne áýesqoı fotograftarǵa birdeı múmkindik berildi.
«Ótken jyl aıtýly datalarǵa toly jyl boldy. Osyǵan oraı biz respýblıkalyq fotobaıqaý jarııaladyq. Bul baıqaý belgili bir taqyryp aıasymen shektelip qalǵan joq, munda Qazaqstannyń tynys-tirshiligi jan-jaqty qamtylyp, qas-qaǵym sátterdiń barlyǵy fototarıhqa aınaldy», - dedi Ulttyq mýzeıdiń dırektory Darhan Myńbaı.
Cóz arasynda ol Ulttyq mýzeı elimizdiń rýhanı, mádenı ómirine belsendi atsalysýyn jalǵastyra beretinin baıandady.
«Ulttyq mýzeı aldaǵy ýaqytta da fotobaıqaý ótkizedi. Bir baıqaǵanymyz, bizge áli de bolsa fotoóner salasyn damytý jáne fotoónerge degen qyzyǵýshylyqty arttyrý qajet. Bizde kásibı fotograftar kóp. Olar Qazaqstandy shet memleketke jańa qyrynan tanytý áleýetine ıe. Biz tarıhy tereń, sıqyry mol óner ıelerine qoldaý kórsete berýimiz kerek. Óıtkeni olar tarıhty tańbalap, tarıhty jazyp jatyr», - dedi mýzeı basshysy.
Osydan soń D.Myńbaı qazylar alqasynyń sheshimimen «Qazaq handyǵynyń 550 jyldyǵy» atalymynda top jarǵan Nazarbaev ýnıversıtetiniń ákimshilik qyzmetkeri, áýesqoı fotograf Qanat Nurtazınge, «Jeńistiń 70 jyldyǵy» atalymynda «júzden júırik» dep tanylǵan Petropavl qalasyndaǵy «Soltústik Qazaqstan» baspahanasynyń fototilshisi, kásipqoı fotograf Vadım Mýdarısovqa sondaı-aq «Konstıtýııanyń 20 jyldyǵy» jáne «Qazaqstan halqy Assambleıasynyń 20 jyldyǵy» atalymynda eshkimge des bermegen «Ońtústikfılm» memlekettik mekemesi dırektorynyń orynbasary, kásipqoı fotograf Maqsat Shaǵyrbaevqa alǵys hat pen qomaqty qarjylaı syıaqy tabys etti.
