قىتايدا ءتاجۆيرۋسى شىققالى، قىتاي يۋانى قاتتى تومەندەپ كەتتى. ال بۇل رەتتە حالىقارالىق ساراپشىلار اراسىندا «بۇل دەرتتىڭ سوڭى قارجىلىق داعدارىسقا اپارادى» دەيتىندەر دە بار.
جالپى، قىتاي يۋاننىڭ ارزانداۋى الىس-بەرىس ساۋداعى كەرى ىقپالىن تيگىزەتىنى داۋسىز. يۋان قازىر حالىقارالىق رەزەرۆتەگى ۆاليۋتا رەتىندە ءۇشىنشى ورىندا تۇر. ال مۇندايدا راسىمەن دە يۋاننىڭ بەدەلىنىڭ تومەندەۋى الەمدىك ەكونوميكاعا قالاي ىقپال ەتەدى. مامانداردىڭ پايىمداۋىنشا، ەندىگى كەزەكتە الىس-بەرىس ساۋدادا بىرقاتار ەلدەردىڭ تابىسى دا تومەندەي باستايدى.
«حالىقارالىق ۆاليۋتا رەزەرۆىندە دوللاردىڭ كولەمى 41,73 پايىز بولسا، ەۆرونىڭ كولەمى 30,93 پايىز. ال ءيۋاننىڭ كولەمى 10,92 پايىز. قازىر دوللارمەن تولەم جاساۋ تەك قانا اقش ءۇشىن پايدالى بولىپ وتىر. كەيبىر دەرەكتەر دوللارمەن بەرىلگەن نەسيە سىياقىسىنىڭ وزىنەن عانا امەريكانىڭ التى اي سايىن 200 ملرد دوللار پايدا كورەتىنىن راستايدى. قازىر الەم ەلدەرىنىڭ ۆاليۋتالىق قورىنىڭ 40 پايىزى دوللارمەن ساقتالعان. سوندىقتان بۇل ارادا وزگە ەلدەردىڭ ۇلتتىق ۆاليۋتاسى قۇلاپ جاتقانىمەن امەريكانىڭ قىلى قيسايمايدى. وسىنى ۇققاندىقتان 2014 جىلدان بەرى كوپتەگەن ەلدەر ۆاليۋتا قورلارىنا يۋان جيناي باستادى. قىتايمەن ساۋدا قارىم-قاتىناسىندا دوللارمەن ەمەس، يۋانمەن تولەم جاساۋ ءۇردىسى ارتتى. سوندىقتان بۇل ارادا قىتاي يۋاننىڭ تومەندەگەنى ءبىراز ەلدەردىڭ قالتاسىن قاعادى. قازىردىڭ وزىندە ءبىراز ەلدەردىڭ الىس بەرىس ساۋداداعى تابىسى تومەندەپ كەتكەن»،- دەيدى ەكونوميست-عالىم ءجۇمادىلدا باياحمەتوۆ.
«كەلەشەكتە ەكونوميكادا ۇلكەن وزگەرىستەر بولادى. قىتاي قازىر وڭتۇستىك شىعىس ازيا قاۋىمداستىعىنا مۇشە ەلدەرمەن يۋانمەن ساۋدا-ساتتىق جاساۋدى تەرەڭدەتىپ جاتىر. ءتىپتى قور بيرجاسىندا يۋانمەن ەسەپ ايىرىسۋ قولعا الىنا باستادى. بولجام بويىنشا الداعى بەس جىلدا يۋاننىڭ تولىق كونۆەرتاتسياسى قالىپتاسۋى كەرەك. ويتكەنى قازىر يۋان-رۋبل جۇبى دا جاقسى قالىپتاسىپ ۇلگەردى. رەسەي مەن قىتاي ءوزارا ساۋدا ساتتىقتا يۋانمەن جانە رۋبلمەن تولەم جاساي باستادى. تەڭگە-يۋان جۇبى دا قالىپتاسىپ كەلەدى. قازاقستان مەن قىتاي ۇلتتىق ۆاليۋتادا ەسەپ ايرىسۋدى جولعا قويا باستادى. سول ءتارىزدى كوپتەگەن ەلدەردىڭ يۋانعا دەگەن سۇرانىسى ارتتى. ال بۇل ارادا يۋاننىڭ قۇنىن جوعالتۋى الەمدىك ەكونوميكا ءۇشىن اسا قۋانتارلىق جاعداي ەمەس. ءتىپتى مۇنىڭ سوڭىتس تاعى ءبىر قارجىلىق داعدارىسمقا اكەلۋى دە مۇمكىن»،-دەيدى جۇمادىلدا باياحمەتوۆ.
قارلىعاش زارىققانقىزى
«ادىرنا» ۇلتتىق پورتالى
