اۆستراليا عالىمدارى ءبىرىنشى بولىپ كوروناۆيرۋستىڭ ەمىن تاپتى. ولار مۇنى «ايتارلىقتاي جەتىستىك» دەپ اتادى، ول دياگنوز قويۋعا جانە تەز تارالا باستاعان ۆيرۋستى ەمدەۋگە كومەكتەسەدى دەپ حابارلايدى "ادىرنا" "بي-بي-ءسيدىڭ" ورىس قىزمەتىنە سىلتەمە جاساپ.
مەلبۋرندەگى مامانداندىرىلعان زەرتحانانىڭ زەرتتەۋشىلەرى وتكەن جۇمادا الىنعان قىتايلىق كوروناۆيرۋستىڭ كوشىرمەسىن قايتا جاساي الاتىندىقتارىن ايتتى.
«ءبىز كوپتەگەن جىلدار بويى وسىنداي نارسەگە دايىندالىپ كەلدىك، سوندىقتان ءبىز تەز ارادا اۋرۋدىڭ جاۋابىن الا الدىق»، - دەيدى پيتەر دوەرتي اتىنداعى ينفەكتسيا جانە يممۋنيتەت ينستيتۋتىنىڭ دوكتورى مايك كەتتون .
اۆستراليالىق عالىمدار ۆيرۋستىڭ قالپىنا كەلتىرىلگەن كوشىرمەسىن دۇنيەجۇزىلىك دەنساۋلىق ساقتاۋ ۇيىمىنا (ددسۇ) جىبەرمەكشى. ۆيرۋستى دياگنوستيكالاۋ مەن ەمدەۋگە وزدەرىنىڭ اشقان جاڭالىقتارى كومەكتەسەدى دەگەن ۇمىتتەرى دە زور.
سىناق ۆاكتسينالارىن دياگنوستيكالاۋ جانە باعالاۋ ءۇشىن
كوروناۆيرۋستىڭ كوشىرمەسىن تەستىلەۋ كەزىندە باقىلاۋ ماتەريالى رەتىندە قولدانۋعا بولادى، سونىمەن بىرگە دياگنوزدا «ويىن ەرەجەلەرىن وزگەرتۋگە» بولادى دەيدى اۆستراليالىق عالىمدار.
زەرتتەۋشىلەردىڭ پىكىرىنشە، ولار جاساعان كوشىرمەلەردىڭ ارقاسىندا كوروناۆيرۋس دياگنوزىنىڭ العاشقى ساتىسىندا-اق ۆيرۋس بەلگىلەرىن كورسەتپەگەن ادامداردى دا انىقتاۋعا بولادى.
قىتاي بيلىگى كوروناۆيرۋس، ادەتتەگى تۇماۋ سياقتى، ءتىپتى ينكۋباتسيا كەزەڭىندە دە تارالۋى مۇمكىن دەيدى. الايدا، ددۇ بەلگىلەردىڭ باستالۋىنا دەيىن ونىڭ جۇقپالى ما، جوق پا ءالى بەلگىسىز ەكەنىن اتاپ ءوتتى. ۇيىمنىڭ ايتۋىنشا، كوروناۆيرۋستىڭ ينكۋباتسيالىق كەزەڭى ەكى كۇننەن باستاپ 10 كۇنگە دەيىن بولۋى مۇمكىن.
«انتي-دەنە سىناعى بىزگە قانشالىقتى كەڭ تارالعاندىعى تۋرالى جاقسى ءبىلۋ ءۇشىن كوروناۆيرۋسقا كۇدىك بار ناۋقاستاردى رەتروسپەكتيۆتى تۇردە تەكسەرۋگە مۇمكىندىك بەرەدى»، - دەدى دوكتور كەتتون.
سونىمەن قاتار، ول كوروناۆيرۋس كوشىرمەسىن قولدانا وتىرىپ، سىناق ۆاكتسينالارىنىڭ تيىمدىلىگىن باعالاۋعا بولاتىندىعىن ايتتى.
ەلەس قالادا كارانتين
قازىرگى ۋاقىتتا كوروناۆيرۋس جۇقتىرعان ادامداردىڭ سانى التى مىڭعا جەتتى، قىتايدان تىس 16 ەلدە ينفەكتسيانىڭ 47 جاعدايى تىركەلگەن. قىتايدا كوروناۆيرۋستان 132 ادام قايتىس بولدى، ال باسقا ەلدەردە ءولىم تىركەلمەگەن.
كوروناۆيرۋستى جۇقتىرۋدىڭ التى جاعدايىن راستاعان اۆستراليا قىتايدان ورالعان 600 ازاماتىن ماتەريكتەن 2 مىڭ شاقىرىم قاشىقتىقتا ورنالاسقان ءۇندى مۇحيتىنداعى روجدەستۆو ارالىنا ورنالاستىرىپ، ارالدى ەكى اپتاعا كارانتينگە جابۋدى جوسپارلاپ وتىر.
British Airways بريتاندىق اۆياكومپانياسى 29 قاڭتاردا تاڭەرتەڭ كوروناۆيرۋستىڭ ورشۋىنە بايلانىستى قىتايدان قۇرلىققا جانە ودان تىكەلەي رەيستەردىڭ توقتاتىلاتىندىعىن رەسمي مالىمدەدى. ءوز كەزەگىندە ۇلىبريتانيا سىرتقى ىستەر مينيسترلىگى ازاماتتارعا قىتايعا بارۋدان باس تارتۋعا كەڭەس بەردى.
