بۇگىن قازاقستاننىڭ نازارى شقو، زايسان قالاسىنا اۋدى. قىتايداعى قىسىمنان قاشقان قوس قازاق قاستەر مۇساحانۇلى مەن مۇراگەر ءالىمۇلىنىڭ سوتىنىڭ ءدۇبىرى التاي مەن اتىراۋ اراسىن تەڭسەلتتى. باۋىرىمىزدى قىتايعا بەرمەيمىز، بەرگىزبەيمىز دەپ كەلگەن حالىق اۋداندىق سوت زالىنا سىيماي قالدى. وسى سوت باستالماي تۇرىپ، سوتقا كەلگەن بەلسەندىلەرمەن جەرگىلىكتى پوليتسيا اراسىندا سوزگە كەلىسپەۋشىلىك بولىپ قالىپ جاتتى. اياداي تار بولمەدەگى سوتقا حالىق ءبارى كىرگىسى كەلگەنمەن، تۋىستارى مەن قوعام بەلسەندىلەرى، جۋرناليستەر عانا كىرگىزىلدى. وسىعان بايلانىستى دالاداعى حالىق پەن پوليتسيا اراسىندا تۇسىنىسپرەۋشىلىك تە ورىن الدى. باس جارىپ، قول سىنعان ەشتەمەسى جوق. سوت شەشىمىنە ريزا بولعان حالىق سوتتان كەيىن سوت پەن پروكۋرورعا، پوليتسياعا ريزاشىلىعىن ءبىلدىرىپ، العىسىن ايتىپ تاراعان بولاتىن.
بىراق، ەرتە قۋانىپتى. قالادان شىعا بەرىستەگى جانار ماي قۇيۋ ستانساسىنىڭ قاسىندا "كەرەكتى ادامدارىن" كۇتىپ تۇرعان پوليتسيا، قارىنداشىنىڭ ۇشىنا ءتۇرتىپ العان بەلسەندىلەردى قاماۋعا الىپتى. زايساننان 170 شاقىرىم ۇزاپ كەتكەن سەمەيلىك بەلسەندىلەر مىنگەن كولىكتى دە جولدان توقتاتىپ، ەكى ادامدى قايتادان زايسانعا الىپ كەلە جاتىر دەيدى بىزگە زايساننان حابارلاسقان بەلسەندى. تولىق اقپاراتتاردى قوسىمشا حابارلايتىن بولامىز.
ەستەرىڭىزگە سالا كەتەيىك، بۇگىن شىعىس قازاقستان وبلىسى زايسان اۋداندىق سوتىندا "مەملەكەتتىك شەكارانى زاڭسىز كەسىپ ءوتتى" دەپ ايىپتالعان ەتنيكالىق ەكى قازاق قاستەر مۇساحانۇلى مەن مۇراگەر ءالىمۇلىنا ۇكىم وقىلدى. سۋديا وسپانوۆا قاستەر مۇساحانۇلى مەن مۇراگەر ءالىمۇلىن ارقايسىسىن ءبىر جىلعا باس بوستاندىعىنان ايىرىپ، جازاسىن قاۋىپسىزدىگى تومەن مەكەمەدە وتەيتىنىن ايتتى. بۇعان قوسا، ولاردىڭ ارقايسىسىنا 25 250 تەڭگە كولەمىندە ايىپپۇل سالدى.
بۇگىنگى سوتقا قاراعاندى، شىمكەنت، الماتى تاعى باسقا ايماقتاردان قاستەر مەن مۇراگەردى قولداپ، كوپ ادام كەلدى. سوت زالىنا سىيماعان حالىق ەكى ازاماتتى سىرتتا قولداپ تۇردى.
"ادىرنا" ۇلتتىق پورتالى
