«نۇر وتان» حالىقتىق دەموكراتيالىق پارتياسىنىڭ شىلدە ايىندا جاريالاعان «تىلگە قۇرمەت — ەلگە قۇرمەت» بايقاۋىنىڭ جەڭىمپازدارى انىقتالدى. ەستەرىڭىزدە بولسا، بۇل بايقاۋ بەس نوميناتسيا بويىنشا ۇزدىك جۋرناليستەر مەن ينتەرنەت پورتالداردى انىقتاعان بولاتىن. «ادىرنا» ۇلتتىق-ەتنوگرافيالىق پورتالى «مەملەكەتتىك تىلدەگى ەڭ ۇزدىك ينتەرنەت جوبا» اتالىمى بويىنشا توپ جاردى. جەڭىمپازداردى «نۇر وتان» حدپ-سىنىڭ حاتشىسى، ساياساتتانۋشى ەرلان قارين ءوز قولىمەن ماراپاتتاپ، ارنايى سىيلىقتارىن تابىس ەتتى.
بيىل بۇل دودا ءتىل مەرەكەسى قارساڭىندا ءتورتىنشى رەت ۇيىمداستىرىلۋدا. ۇيىمداستىرۋشىلاردىڭ ايتۋىنشا، جاريالانعان كونكۋرسقا قاتىسامىن دەۋشىلەر رەسپۋبليكانىڭ بارلىق اۋماعىنان تابىلعان. ءسويتىپ، بايقاۋ كوميسسياسىنىڭ قاراۋىنا 300-گە جۋىق ماتەريال ۇسىنىلىپتى. «ولاردىڭ ىشىندە ەڭ كوبى باسپا شىعارىلىمدارىنىڭ باسىلىمدارى، سونىمەن قاتار تەلە جانە راديو باعدارلامالارى»، دەيدى «نۇر وتان» حدپ-نىڭ قىزمەتكەرلەرى. سونداي-اق وتىنىشتەردىڭ سانى بويىنشا ەكىنشى ورىندا 50-گە جۋىق ءوتىنىش بىلدىرگەن «مەملەكەتتىك ءتىلدى دامىتۋ جونىندەگى ۇزدىك جوبا» اتالىمى تۇر. ال «مەملەكەتتىك تىلگە قولداۋ كورسەتۋگە جانە ناسيحاتتاۋ ىسىنە ۇلەس قوسقان ۇزدىك ۇيىم» اتالىمى بويىنشا 20-دان استام مەملەكەتتىك جانە ۇكىمەتتىك ەمەس ۇيىمدار ءوتىنىش ءبىلدىرىپتى. ەسەسىنە «مەملەكەتتىك تىلدەگى ۇزدىك ينتەرنەت جوبا» اتالىمى بويىنشا ەڭ از ءوتىنىش تۇسكەن. دەگەنمەن، بايقاۋدى ۇيىمداستىرۋشىلار بۇل اتالىم بويىنشا قاتىسۋشىلاردىڭ سانى وتكەن جىلعا قاراعاندا كوبىرەك ەكەنىن ايتىپ وتىر. دەمەك، قازاق ءتىلى ءوز شەكاراسىن ينتەرنەت-كەڭىستىكتە دە بەلسەندى كەڭەيىپ جاتقاندىعىن دالەلدەيدى.
سىياقىلار مەن ديپلومداردى پارتيا حاتشىسى ەرلان قارين تابىستاپ، «نۇر وتان» پارتياسى ءوزىنىڭ باعدارلامالىق قۇجاتتارىندا مەملەكەتتىك ءتىلدىڭ ورنىن ەرەكشە ايقىنداپ، ەلدى جانە حالىقتى بىرىكتىرۋشى باستى فاكتورلارىنىڭ ءبىرى رەتىندە قاراستىراتىنىن ايتا كەتتى.
بايقاۋدىڭ جەڭىمپازدارى: «جاس قازاق ءۇنى»، تەمىرتاۋ قالالىق «قۇرىش قالا» گازەتتەرىنىڭ، «قازاقستان» تەلەارناسىنىڭ كوكشەتاۋ، وسكەمەن قالالىق بولىمدەرىنىڭ، «استانا» راديوسىنىڭ جۋرناليستەرى، سونىمەن قاتار «ادىرنا»، «قاسىم.كز» ينتەرنەت پورتالدارى، «ايگولەك» جۋرنالى رەداكتسياسى جانە باسقالار.
ساندۋعاش سۇلتانقىزى
