«اق جول» پارتياسى ۇلتتىق بانكتىڭ لاۋازىمدى تۇلعالارىن دەپۋتاتتىق ساۋالعا جاۋاپ بەرۋ مەرزىمدەرىن بۇزعانى ءۇشىن جاۋاپقا تارتۋدى تالاپ ەتەدى
«اق جول» پارتياسى ۇلتتىق بانكتىڭ لاۋازىمدى تۇلعالارىن دەپۋتاتتىق ساۋالعا جاۋاپ بەرۋ مەرزىمدەرىن بۇزعانى ءۇشىن جاۋاپكەرشىلىككە تارتۋدى تالاپ ەتەدى. بۇل تۋرالى بۇگىن «اق جول» پارلامەنتتىك پارتياسىنىڭ دەپۋتاتى ەرلان بارلىباەۆ ءماجىلىستىڭ جالپى وتىرىسىندا ايتتى.
قازاقستان رەسپۋبليكاسى
ۇلتتىق بانكىنىڭ توراعاسى
ە.ا.دوساەۆقا
2019 جىلعى 13 قاراشادا «اق جول» فراكتسياسى سىزگە ەكونوميكالىق داعدارىس جىلدارىندا مەملەكەت بولگەن قاراجاتتان ەكىنشى دەڭگەيلى بانكتەرگە ناقتى بيزنەستى نەسيەلەۋ ماسەلەسى بويىنشا دەپۋتاتتىق ساۋال جولداعان بولاتىن. سۇراۋدا ءبىز:
1) 2008 جىلدان باستاپ قازىرگى ۋاقىتقا دەيىن بانك سەكتورىن قولداۋعا ءتۇرلى كوزدەردەن، ونىڭ ىشىندە ۇلتتىق قوردان جانە بىرىڭعاي جيناقتاۋشى زەينەتاقى قورىنان قانشا قاراجات ءبولىندى؟
2) زاڭدى تۇلعالارعا، سونداي-اق شاعىن جانە ورتا بيزنەسكە سول كەزەڭگە ولار بويىنشا ەسەپتەلگەن سىياقىلاردى، ءوسىمپۇلدار مەن ايىپپۇلداردى ەسەپتەمەگەندە ەكىنشى دەڭگەيدەگى بانكتەردىڭ نەسيەلەرىنىڭ تازا مولشەرى قانشا؟
3) سول جىلدارى ەكىنشى دەڭگەيلى بانكتەر قازاقستان رەسپۋبليكاسى ۇلتتىق بانكىنىڭ نوتالارىن قانداي مولشەردە ساتىپ الدى؟
4) مەملەكەتتىك قولداۋ بانكتەردىڭ بيزنەستى نەسيەلەۋ جانە ۇلتتىق بانكتىڭ نوتالارىن ساتىپ الۋداعى ۇلەسى قانشا؟
5) قازاقستاننىڭ جالپى ىشكى ءونىمىنىڭ جىل سايىنعى وسۋىنە ەكىنشى دەڭگەيدەگى بانكتەرگە مەملەكەتتىك كومەكتىڭ اسەرى قالاي باعالانادى جانە بانك سەكتورىنىڭ بيۋدجەتتىڭ كىرىسىنە قوساتىن ۇلەسى قانداي؟ دەگەن ساۋالداردى كوتەردىك.
ءبىز بۇل سۇراقتاردى بانك جۇيەسىنىڭ مەملەكەتتەن العان ۇلكەن قاراجاتىنا قاراماستان، بانكتەردىڭ ەكونوميكانى نەسيەلەۋ شارتتارى مەن كوڭىل تولمايتىن جاعدايلارعا بايلانىستى كوتەرگەن ەدىك. «اق جول» فراكتسياسى ۇلتتىق قوردان جانە بيۋدجەتتەن ميللياردتاعان سومانى جىبەرۋدىڭ ماقساتى بانكتەردىڭ وزدەرىن بايىتۋ ەمەس، قارجى سەكتورىن جاقسارتۋ جانە قاراجاتتى ەكونوميكاعا باعىتتاۋ بولۋى كەرەك دەپ سانايدى.
پرەزيدەنت ق.توقاەۆ ءوزىنىڭ جولداۋىندا «ەكىنشى دەڭگەيلى بانكتەرگە قولايلى شارتتارمەن جانە ۇزاق مەرزىمگە نەسيە بەرۋ» مىندەتىن قويعانى كەزدەيسوق ەمەس.
سونىمەن بىرگە، كەيبىر مالىمەتتەرگە سايكەس، بانكتەردىڭ مەملەكەتتىك قورلاردان پايدا تابۋى، ولاردى ۇلتتىق بانك اتىنان مەملەكەتكە قولايلى مولشەرلەمەلەرمەن قامتاماسىز ەتۋى جانە بيزنەستىڭ قول جەتىمدى ۇزاق مەرزىمدى نەسيەلەرگە دەگەن شۇعىل قاجەتتىلىگىن ەسكەرمەۋى سىندى جاعدايلار ورىن العان.
بۇل جاعدايدى ناقتىلاۋ ءۇشىن ءبىز ۇلتتىق بانكتىڭ مالىمەتتەرىن سۇرادىق. الايدا، سۇراۋ جىبەرىلگەن كۇننەن باستاپ ەكى اي وتسە دە، جاۋاپ كەلگەن جوق.
ەسكە سالا كەتەيىك، «پارلامەنت جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسى كونستيتۋتسيالىق زاڭىنىڭ 27-بابىنىڭ 4-تارماعىنا سايكەس، دەپۋتاتتىڭ وتىنىشىنە جاۋاپ ءبىر ايدان كەشىكتىرىلمەي بەرىلەدى.
وسىعان بايلانىستى «اق جول» پارلامەنتتىك فراكتسياسى:
- ءبىز قويعان سۇراقتارعا ناقتى جاۋاپ بەرۋدى تاعى دا تالاپ ەتەدى;
2. ۇلتتىق بانكتىڭ لاۋازىمدى تۇلعالارىن دەپۋتاتتىق ساۋالعا جاۋاپ بەرۋ مەرزىمدەرىن بۇزعانى ءۇشىن جاۋاپكەرشىلىككە تارتۋ تۋرالى ماسەلە كوتەرەدى.
"ادىرنا" ۇلتتىق پورتالى
