14 قاڭتاردا الماتىنىڭ لا-155/18 تەرگەۋ يزولياتورىندا 19 جاستاعى ەركەبۇلان نۇرمىحانوۆ ەسىمدى تۇتقىن جۇمباق جاعدايدا كوز جۇمدى دەپ حابارلادى Ratel.kz سايتى.
تەرگەۋ يزولياتورى دارىگەرلەرىنىڭ سوزىنە قاراعاندا، نۇرمىحانوۆتىڭ دەنە قىزۋى كوتەرىلىپ، وعان انالگين جانە ديمەدرولدان ۋكول سالىنعان. ۋكولدان كەيىن تۇتقىننىڭ جاعدايى ءتىپتى مۇشكىلدەنگەن، جەدەل جاردەم كەلگەنگە دەيىن ءولىپ كەتكەن.
سايتتىڭ جازۋىنشا، تۋىستارى تەرگەۋ يزولياتورى وكىلدەرىنىڭ سوزىنە كۇمان كەلتىرەدى. ولاردىڭ ايتۋىنشا، تۇتقىننىڭ دارىگە اللەرگياسى بولماعان. ءمايىتتى تانۋ ءۇشىن مايىتحاناعا بارعان كەزدە ولار نۇرمىحانوۆتىڭ دەنەسىنىڭ وڭ جاعى، بەتى مەن باسى دا كوكپەڭبەك داقتارعا تولىپ كەتكەنىن بايقاعان. يىعىنان جاراعا ۇقساس ءىز بىلىنگەن.
سايتتىڭ جازۋىنشا، سوت-مەديتسينالىق ساراپتاما جاسالعاننان كەيىن ساراپشىلار ءمايىتتىڭ دەنەسىندەگى داقتار سوققىنىڭ ناتيجەسى مە، جوق پا، سونى انىقتاۋى ءتيىس.
نۇرمىحانوۆ تەرگەۋشى قاۋلىسىمەن 14 قاراشادا ەكى ايعا قاماۋعا الىنعان. 14 قاڭتاردا تۇرمەدە وتىرۋ مەرزىمى ءبىتۋى ءتيىس بولعان. الايدا ءدال سول كۇنى تەرگەۋ يزولياتورىنىڭ وكىلدەرى نۇرمىحانوۆتىڭ تۋىستارىنا حابارلاسىپ، تۇتقىننىڭ ءمايىتىن الىپ كەتۋ قاجەتتىگىن ايتقان.
نۇرمىحانوۆ تۇرمىستىق سيپاتتاعى وقيعاعا بايلانىستى قاماۋعا الىنعان، بىراق پوليتسيا بۇزاقىلىق بويىنشا ءىس قوزعاعان.
لا-155/18 مەكەمەسىنىڭ باستىعى اسەت جۇماديەۆ 15 قاڭتاردا ازاتتىق ءتىلشىسىنىڭ سۇراقتارىنا جاۋاپ بەرۋدەن باس تارتىپ، "دەپارتامەنتكە حابارلاسىڭىز" دەپ قىسقا قايىردى. رەسپۋبليكالىق قىلمىستىق اتقارۋ جۇيەسى كوميتەتىنىڭ ءباسپاسوز حاتشىسى ازىرگە جاۋاپ بەرمەدى.
"ازاتتىق" راديوسى
فوتو اۆتورى قازيز توعىزباەۆ
