كونە قازىنالارىمىز كورىنگەننىڭ ۋىسىندا كەتكەنى مە؟!

2409
Adyrna.kz Telegram

قالىڭ قاتپارلى تاريحتىڭ قىر-سىرىنا قانىق عالىمدار سىردىڭ بويىنداعى ءاربىر توبەنىڭ استىندا جاتقان ءبىر سىر بار ەكەنىن تىلگە تيەك ەتەدى. راسىندا، بۇل اڭگىمە بەكەردەن-بەكەر ايتىلعان جوق. كەزىندە داريا بويىندا مىڭعا تارتا شاھار بولعان دەسەدى.

سىر جەرىندە 555 ەسكەرتكىش مەملەكەت قورعاۋىنا الىنعان. ونىڭ ىشىندە 21-ءىنىڭ رەسپۋبليكالىق، 274-ءىنىڭ جەرگىلىكتى ماڭىزى بار. قالعان بولىگى الدىن الا ەسەپكە ەنگىزىلگەن. بۇل قۇندى قازىنانىڭ قورعالۋىن وبلىستىق تاريحي جانە مادەني ەسكەرتكىشتەردى قورعاۋ جونىندەگى مەملەكەتتىك مەكەمە قامتاماسىز ەتەدى. مەكەمە ماماندارى ولاردى ەسەپكە الادى، تۇراقتى تۇردە قورعايدى. سونداي-اق ساقتاۋ، انىقتاۋ، ناسيحاتتاۋ جانە قالپىنا كەلتىرۋ سەكىلدى اۋقىمدى جۇمىستاردى اتقارادى. الايدا وبلىستىق پروكۋراتۋرانىڭ الەۋمەتتىك-ەكونوميكالىق سالاسىنداعى زاڭدىلىقتى قاداعالاۋ باسقارماسى جۇرگىزگەن تەكسەرۋ بارىسىندا كوپتەگەن كەمشىلىك بەلگىلى بولدى. ماماندار اتالمىش مەكەمەنىڭ سوڭعى ەكى جىلداعى جانە بيىلعى جىلدىڭ العاشقى توقسانىندا اتقارعان تىرلىگىن تارازىعا تارتتى. پروكۋراتۋرا قىزمەتكەرلەرى وسى سالا بويىنشا بىرقاتار زاڭ تالاپتارىنىڭ ورەسكەل بۇزىلعاندىعىنا كوز جەتكىزدى.
ەلىمىزدىڭ «تاريحي-مادەني مۇرا نىساندارىن قورعاۋ جانە پايدالانۋ تۋرالى» زاڭى بار. وندا «جەرگىلىكتى اتقارۋشى ورگاندار تاريحي-مادەني مۇرا نىساندارىن انىقتاۋدى، ەسەپكە الۋدى، قورعاۋدى جانە پايدالانۋدى قامتاماسىز ەتەدى» دەلىنگەن. تاعى دا ايتا كەتەرلىگى، ۇكىمەت قاۋلىسىمەن وسى ماقساتتا ارنايى ەرەجە دە بەكىتىلگەن. ەرەجە نەگىزىندە كونە جادىگەرلەردى تاريحي جانە مادەنيەت ەسكەرتكىشتەرى دەپ تانۋ تۋرالى ارنايى تالاپتار بار. سوندىقتان ولاردىڭ  مىندەتتى تۇردە رەسمي جاريالانۋعا ءتيىستى حالىقارالىق، رەسپۋبليكالىق جانە جەرگىلىكتى ماڭىزى بار ەسكەرتكىشتەر مەملەكەتتىك تىزىمىنە بەكىتىلەتىنى ايتىلعان. دەگەنمەن داريا بويىنداعى 534 كونە قۇندىلىقتار كەڭەستىك كەزەڭدە ەسەپكە الىنعان. قازىرگى قولدانىستاعى زاڭناما نەگىزىندە مەملەكەتتىك تىزىمگە ەنبەگەن. بۇل ولقىلىقتىڭ ورنىن تولتىرۋعا بيىل عانا كوڭىل بولىنگەن ەكەن. وسىنىڭ ناتيجەسىندە، 274 ەسكەرتكىشكە جەرگىلىكتى ماڭىزدىلىق بەرۋ تۋرالى كەلىسىم الۋ ماقساتىندا قۇزىرلى ورىندارعا ۇسىنىس جولدانعان.

اسحات تاجەنوۆ، قىزىلوردا وبلىستىق پروكۋراتۋراسىنىڭ باسقارما پروكۋرورى:

– جوعارىداعى ەرەجەگە سايكەس ەسەپكە الۋ تاريحي-مادەني مۇرا نىسانىن ەسەپكە الۋ كارتوچكاسىن جاساۋ جولىمەن جۇزەگە اسىرىلادى. تاعى ءبىر تالاپ – ەسكەرتكىشتىڭ تولقۇجاتى جەكەلەگەن قوسىمشا بەتپەن راسىمدەلەدى. جاڭا دەرەك قوسىلعان جاعدايدا تولىقتىرىلىپ وتىرۋى ءتيىس. الايدا بارلىعى باياعى كۇيىندە قالعان. قوسىمشا بەتتە جاڭا دەرەكتەر جازىلماعان. اتاپ ايتقاندا، وبلىستا «كوتىبار» مۇناراسى دەگەن تاريحي ورىن بار. بۇل ەسكەرتكىش رەسپۋبليكالىق ماڭىزعا يە. ونى ەسەپكە الۋ كارتوچكاسى مەن تولقۇجاتى وسىدان وتىز جىل بۇرىن جاسالعان. وسىنداي زاڭبۇزۋشىلىق 400-گە جۋىق تاريحي-مادەني مۇرانىڭ قۇجاتتارىن زەردەلەۋ بارىسىندا دا ورىن العان. اتاپ ايتقاندا، 322 نىساننىڭ تولقۇجاتى باياعى كۇيىندە تۇر. ال 162 ەسكەرتكىشكە تولقۇجات جاساۋعا ەشكىم كوڭىل بولە قويماعان.


«الاش ايناسى».

 

پىكىرلەر