يران تەگەران اۋەجايى ماڭىندا ۋكراينالىق ۇشاقتى اسكەريلەردىڭ "قاتەلەسىپ" اتىپ تۇسىرگەنىن مويىنداپ، "بۇل ادام فاكتورىنان بولعان اپات" دەدى. تەگەران بۇعان دەيىن ۇشاقتى "زىمىران اتىپ ءتۇسىردى" دەگەن بولجامدى جوققا شىعارعان.
11 قاڭتاردا تاڭەرتەڭ مەملەكەتتىك تەلەارنادان مالىمدەمە جاساعان يران قارۋلى كۇشتەرىنىڭ باس شتابى ۇشاق يسلام رەۆوليۋتسياسى ساقشىلار كورپۋسىنىڭ "قۇپيا اسكەري ورتالىعىنا" قاراي باعىت العاندىقتان اسكەريلەردىڭ ونى "جاۋ نىسانى" دەپ ويلاپ قالعانىن ايتتى.
اقش-پەن قارىم-قاتىناستىڭ ۋشىعۋىنا بايلانىستى ساربازدار "سوعىسقا دايىن" وتىردى دەلىنگەن مالىمدەمەدە. تەگەران كىنالىلەردىڭ جاۋاپقا تارتىلاتىنىن ايتتى.
يران پرەزيدەنتى حاسان روۋحاني Twitter جەلىسىندە وقيعانى "ۇلى تراگەديا جانە كەشىرىلمەيتىن قاتەلىك" دەپ اتادى. يراننىڭ سىرتقى ىستەر ءمينيسترى مۇحاممەد دجاۆاد زاريف ۇشاق اپاتىنان قازا بولعانداردىڭ وتباسىنان كەشىرىم سۇراپ، كوڭىل ايتتى.
"قايعىلى كۇن. قارۋلى كۇشتەر جۇرگىزگەن ىشكى تەرگەۋدىڭ الدىن الا قورىتىندىسى: اقش اۆانتيۋريزمىنەن تۋىنداعان داعدارىس كەزىندە ادامنان كەتكەن قاتەلىك" دەپ جازدى ول Twitter-دە.
يران ۇكىمەتى بىرنەشە كۇن بويى باتىس جەتەكشىلەرى مەن ساراپشىلارىنىڭ "ۇشاقتى يراندىق زىمىران اتىپ ءتۇسىردى" دەگەن مالىمدەمەسىن جوققا شىعارىپ كەلگەن ەدى. اقش يراننىڭ سەگىز شەنەۋنىگىنە جانە ەلدىڭ مەتال وندىرىسىنە جاڭا سانكتسيا سالعان.
ۋكراينا پرەزيدەنتى ۆلاديمير زەلەنسكي 11 قاڭتاردا تەگەران كىناسىن تولىق مويىنداپ، اپاتتى مۇقيات زەرتتەپ، وتەماقى تولەۋى ءتيىس دەدى.
"يران اپاتتى تولىق ءارى اشىق زەرتتەيدى، كىنالىلەردى جاۋاپقا تارتىپ، مايىتتەردى قايتارادى، وتەماقى تولەپ، ديپلوماتيالىق ارنالار ارقىلى رەسمي تۇردە كەشىرىم سۇرايدى دەپ كۇتەمىز" دەپ جازدى زەلەنسكي تەلەگرام-ارناسىندا.
كانادانىڭ پرەمەر-ءمينيسترى دجاستين تريۋدو وتتاۆا تەگەراننان بولعان وقيعانىڭ تولىق ءارى مۇقيات زەرتتەلۋىن تالاپ ەتەدى دەپ مالىمدەدى. ۇشاق اپاتىنان كانادانىڭ 57 ازاماتى قازا بولعان (باسىندا 63 كانادالىق بولعان دەپ ايتىلعان).
ۇشاق اپاتىنا بايلانىستى باتىستىڭ يرانعا قىسىمى ۇدەگەن شاقتا تەگەران وسىنداي مالىمدەمە جاسادى. كانادانىڭ سىرتقى ىستەر ءمينيسترى 10 قاڭتاردا ۇشاق اپاتىن مۇقيات زەرتتەۋ ءۇشىن حالىقارالىق جۇمىس توبى قۇرىلعانىن مالىمدەگەن. زەلەنسكي بۇعان دەيىن ۋكراينا مەن كانادا ۇشاق اپاتىنىڭ تولىق ءارى مۇقيات زەرتتەلۋىن تالاپ ەتەدى دەپ ايتقان.
باستاپقىدا ۇشاق "تەحنيكالىق اقاۋعا بايلانىستى" قۇلادى دەپ ايتىلدى, الايدا زىمىران شابۋىلى بولعانى تۋرالى ۆيدەوجازبالار بولعاندىقتان بۇل بولجامعا كۇمان كەلتىرىلدى.
ۇشاق اپاتىنىڭ الدىندا بىرنەشە ساعات بۇرىن يران اقش-تىڭ يراكتاعى ەكى اسكەري بازاسىن زىمىرانمەن اتقىلاعان. يسلام رەۆوليۋتسياسى كورپۋسى بۇل شابۋىلدى گەنەرال كاسەم سۇلەيمانيدىڭ ولىمىنە جاۋاپ دەپ مالىمدەدى.
بۇعان دەيىن يراندىق اۋە شابۋىلىنا قارسى جۇيە جولاۋشىلار ۇشاعىن يراكتاعى اسكەري بازالاردى اتقىلاعانى ءۇشىن يراننان "كەك الۋعا كەلە جاتقان" اقش-تىڭ اسكەري ۇشاعى دەپ ويلاپ قالدى دەپ تە ايتىلعان.
وسى ءتارىزدى بولجامدار ايتىلا باستاعاننان كەيىن يراننىڭ ازاماتتىق اۆياتسيا ۇيىمىنىڭ جەتەكشىسى ءالي ابەدزادە يران "بىردە-ءبىر زىمىران ۇشاققا تيمەدى دەپ سەنىمدى تۇردە ايتا الادى" دەگەن.
"ەگەر ولار [باتىس جەتەكشىلەرى] شىن سولاي دەپ ويلاسا، حالىقارالىق ستاندارتقا سايكەس الەمگە دالەلدەرىن كورسەتسىن" دەگەن.
10 قاڭتاردا اقش مەملەكەتتىك حاتشىسى مايك پومپەو ۇشاقتى يراندىق زىمىران اتىپ ءتۇسىردى بولجام راس بولىپ شىعۋى مۇمكىن، وقيعا ءارى قاراي دا زەرتتەلە بەرەدى دەپ مالىمدەگەن. زەرتتەۋ اياقتالعان سوڭ ء"بىز جانە بۇكىل الەم قاجەتىنشە ارەكەت ەتەمىز" دەگەن.
"ۋكراينانىڭ حالىقارالىق اۋە جەلىسى" كومپانياسىنا تيەسىلى ۇشاق تەگەراننان كيەۆكە ۇشقان. ۇشاقتا كانادانىڭ - 57, يراننىڭ - 82, اۋعانستاننىڭ - 4, گەرمانيانىڭ - 3, ۇلىبريتانيانىڭ - 3, ۋكراينانىڭ - 11 ازاماتى بولعان. 176 ادامنىڭ بارلىعى قازا بولدى.
