Iran Tegeran áýejaıy mańynda ýkraınalyq ushaqty áskerılerdiń "qatelesip" atyp túsirgenin moıyndap, "bul adam faktorynan bolǵan apat" dedi. Tegeran buǵan deıin ushaqty "zymyran atyp túsirdi" degen boljamdy joqqa shyǵarǵan.
11 qańtarda tańerteń memlekettik telearnadan málimdeme jasaǵan Iran qarýly kúshteriniń bas shtaby ushaq Islam revolıýııasy saqshylar korpýsynyń "qupııa áskerı ortalyǵyna" qaraı baǵyt alǵandyqtan áskerılerdiń ony "jaý nysany" dep oılap qalǵanyn aıtty.
AQSh-pen qarym-qatynastyń ýshyǵýyna baılanysty sarbazdar "soǵysqa daıyn" otyrdy delingen málimdemede. Tegeran kinálilerdiń jaýapqa tartylatynyn aıtty.
Iran prezıdenti Hasan Roýhanı Twitter jelisinde oqıǵany "uly tragedııa jáne keshirilmeıtin qatelik" dep atady. Irannyń syrtqy ister mınıstri Muhammed Djavad Zarıf ushaq apatynan qaza bolǵandardyń otbasynan keshirim surap, kóńil aıtty.
"Qaıǵyly kún. Qarýly kúshter júrgizgen ishki tergeýdiń aldyn ala qorytyndysy: AQSh avantıýrızminen týyndaǵan daǵdarys kezinde adamnan ketken qatelik" dep jazdy ol Twitter-de.
Iran úkimeti birneshe kún boıy batys jetekshileri men sarapshylarynyń "ushaqty ırandyq zymyran atyp túsirdi" degen málimdemesin joqqa shyǵaryp kelgen edi. AQSh Irannyń segiz sheneýnigine jáne eldiń metal óndirisine jańa sankııa salǵan.
Ýkraına prezıdenti Vladımır Zelenskıı 11 qańtarda Tegeran kinásin tolyq moıyndap, apatty muqııat zerttep, ótemaqy tóleýi tıis dedi.
"Iran apatty tolyq ári ashyq zertteıdi, kinálilerdi jaýapqa tartyp, máıitterdi qaıtarady, ótemaqy tólep, dıplomatııalyq arnalar arqyly resmı túrde keshirim suraıdy dep kútemiz" dep jazdy Zelenskıı Telegram-arnasynda.
Kanadanyń premer-mınıstri Djastın Trıýdo Ottava Tegerannan bolǵan oqıǵanyń tolyq ári muqııat zerttelýin talap etedi dep málimdedi. Ushaq apatynan Kanadanyń 57 azamaty qaza bolǵan (Basynda 63 kanadalyq bolǵan dep aıtylǵan).
Ushaq apatyna baılanysty batystyń Iranǵa qysymy údegen shaqta Tegeran osyndaı málimdeme jasady. Kanadanyń syrtqy ister mınıstri 10 qańtarda ushaq apatyn muqııat zertteý úshin halyqaralyq jumys toby qurylǵanyn málimdegen. Zelenskıı buǵan deıin Ýkraına men Kanada ushaq apatynyń tolyq ári muqııat zerttelýin talap etedi dep aıtqan.
Bastapqyda ushaq "tehnıkalyq aqaýǵa baılanysty" qulady dep aıtyldy, alaıda zymyran shabýyly bolǵany týraly vıdeojazbalar bolǵandyqtan bul boljamǵa kúmán keltirildi.
Ushaq apatynyń aldynda birneshe saǵat buryn Iran AQSh-tyń Iraktaǵy eki áskerı bazasyn zymyranmen atqylaǵan. Islam revolıýııasy korpýsy bul shabýyldy general Kasem Súleımanıdiń ólimine jaýap dep málimdedi.
Buǵan deıin ırandyq áýe shabýylyna qarsy júıe jolaýshylar ushaǵyn Iraktaǵy áskerı bazalardy atqylaǵany úshin Irannan "kek alýǵa kele jatqan" AQSh-tyń áskerı ushaǵy dep oılap qaldy dep te aıtylǵan.
Osy tárizdi boljamdar aıtyla bastaǵannan keıin Irannyń azamattyq avıaııa uıymynyń jetekshisi Álı Abedzade Iran "birde-bir zymyran ushaqqa tımedi dep senimdi túrde aıta alady" degen.
"Eger olar [batys jetekshileri] shyn solaı dep oılasa, halyqaralyq standartqa sáıkes álemge dálelderin kórsetsin" degen.
10 qańtarda AQSh memlekettik hatshysy Maık Pompeo ushaqty ırandyq zymyran atyp túsirdi boljam ras bolyp shyǵýy múmkin, oqıǵa ári qaraı da zerttele beredi dep málimdegen. Zertteý aıaqtalǵan soń "biz jáne búkil álem qajetinshe áreket etemiz" degen.
"Ýkraınanyń halyqaralyq áýe jelisi" kompanııasyna tıesili ushaq Tegerannan Kıevke ushqan. Ushaqta Kanadanyń - 57, Irannyń - 82, Aýǵanstannyń - 4, Germanııanyń - 3, Ulybrıtanııanyń - 3, Ýkraınanyń - 11 azamaty bolǵan. 176 adamnyń barlyǵy qaza boldy.
