وسى ايتقىشبەكتەر قاتىن وسەك سوزدەرىن قاشان قويادى دەيمىن دا. "پرەزيدەنت بوكال ۇستامادى، شىرشا جوق، ءان ۇران ايتىلدى، كەرەمەت" دەگەن بوس سوزدەردەن قۇلاق سارسىدى. ەندى قانشا كۇن سوزگە تيەك بولار ەكەن؟ ايتايىن دەگەنىم بۇل ەمەس، ايتايىن دەگەنىم مىناۋ.👇
ەلدە قىمباتشىلىق جايلادى، جۇمىسسىزدىق ارتۋدا، ۇرى-قارى كوبەيۋدە. القاشتار مەن بومجدار سانى ارتتى. تۇتاس قوعامدى كۇيىك شالدى.
قازىرگى تاڭدا قازاقستاننىڭ اۋىل-شارۋاشىلىق ونىمدەرىن شەتكە ەكسپورتتاۋدى جولعا قويدى. بيدايىمىزدى الىپ ايتپاعاندا ەتتى ەكسپورتتاۋ دەگەن بارىپ تۇرعان سوراقىلىق. ەلباسىمىز رەسەيگە 60 مىڭ.توننا ەت وتكىزۋگە ۋاعدالاستى. سوعان وراي ءار وبلىسقا 60 مىڭ.توننا ەتتى ءبولىپ مىندەتتەپ تاستادى. سونىڭ ىشىندە الماتى وبلىسىنا 6 مىڭ.توننا ەت وتكىزۋ مىندەتى جۇكتەلدى. ول مىندەتتى وتەپ رەسپۋليكانىڭ الدىنا شىققانى بەلگىلى. ەكسپورتتىڭ سالدارىنان ەلىمىزدە مال باسى كۇرت كەمىپ ەت باعاسى 1100 تگ- دەن 2200تگ-گە دەيىن شىقتى. ونىمەن قوسا جىل بويى وزبەكستانعا وتكىزىلدى.
ەندىگى قورقىنىش، قازاقستاننىڭ ەتىن الىپ كورشى قىتايعا وتكىزۋ بولىپ تۇر. قازىردەن مىندەتتەلىپ تە جاتىر. وزدەرىڭىز بىلەسىزدەر قىتايدا وڭىرلەرگە بايلانىستى ەت باعاسى 3700تگ- 5000 تگ-گە دەيىن بارادى. ولار ءبىزدىڭ ەتتى الاتىن بولسا قانشا مالىڭ بولسا دا قىمبات باعادا الا الادى، ءارى ولاردى ەتپەن قامتاماسىز ەتۋگە قازاقستاننىڭ مال-شارۋشىلىعىنىڭ قاۋقارى جەتپەيدى.
ەگەر وسى قارقىنمەن كەتەتىن بولسا جارتى جىلدا سويارعا تىشقاق لاق تاپپاي، ەتتىڭ باعاسى شارىقتاپ 2500 تگ-دەن اسىپ حالىق قۇرت-قۇمىرسقا تەرىپ كەتە مە دەگەن قاۋىپ بار.
ءدال قازىرگى كەزدە 1 جاسقا تولماعان سەمىز بۇزاۋدىڭ ءوزىن 200 مىڭ تەڭگەدەن كەم الا المايسىز. بۇل دەگەن ءسوز 90-100 مىڭ تەڭگەلىك جالاقىمەن وتىرعان باسىم كوپ مەم قىزمەتكەرلەر ەكى ايلىق جالاقىسىن جيناسا دا ءبىر بۇزاۋ سويىپ جەي المايتىندىعى حالىقتىڭ ارقاسىنا ايازداي باتىپ تۇر.
ال ەندى ەت باعاسى 2500 تەڭگەدەن اسسا ەتسىز ءومىر سۇرە المايتىن حالىق قالاي، نە جەپ ءومىر سۇرمەك؟ قارايعان ماكارونىڭنىڭ ءوزى مايسىز، ەتسىز قالايىن دەپ تۇر.
ول ازداي وكىمەت مالعا بەرىلەتىن سۋبسيديانى ازايتىپ، قىسقارتىپ جاتىر. بۇل ىشكى ءوندىرىسسىز وتىرعان قازاق قوعامىن مالدان ايىرسا ودان ارمەن تەنتىرەۋگە اپاراتىن تىكە جول بولاتىنى انىق.
ءبىز كىم ءۇشىن، نە ءۇشىن، قانداي جوسپاردا، قانداي ماقساتتا ءومىر ءسۇرىپ، كىم ءۇشىن جۇمىس جاساپ جاتقان ەلمىز؟ كەيدە تۇسىنبەي قالامىن!!!
سوندا اكىمدەر دە تەك مىندەت ورىنداۋعا عانا جۇمىس ىستەپ حالىقتىڭ جاعدايىمەن شىنىمەن ساناسپايتىنى ما؟ كورىپ تۇرىپ نەگە جوعارىعا ۇسىنىستار ايتىلمايدى؟
مەنىڭ ويىمشا، ەتتى ەكسپورتتاۋ دەگەندى مۇلدە توقتاتۋىمىز كەرەك. ول ءۇشىن قازاقستان بويىنشا مال باسى 25 ملن-نان اسپاي شەتكە شىعارۋعا شەكتەۋ قويۋعا ءتيىسپىز.
اماندىق باتالوۆ مىرزا، وسى ەكسپورت ماسەلەسىن قولعا الىپ، قايتا قاراستىرىپ كورسەڭىزدەر. جان-جاقتىلى زەرتتەلسە دەيمىز...
وسىنداي قىمباتشىلىقتى قولدان جاساپ وتىرىپ حالىققا ءمىن تاعۋ دا ساناعا سىيماسا كەرەك.
مۇحامەدقالي ۇلىقپانۇلى،
"ادىرنا" ۇلتتىق پورتالى
