باس پروكۋراتۋرا اقجارقىن تۇرلىبايدى ەلگە قالاي قايتارۋعا بولاتىنىن ايتتى

 باس پروكۋراتۋرا قىتايدا ءومىر بويى باس بوستاندىعىنان ايىرىلعان اقجارقىن تۇرلىبايدى ەلگە قايتارۋ ءۇشىن نە ىستەۋ كەرەكتىگىن ءتۇسىندىردى، دەپ حابارلايدى Sputnik قازاقستان تىلشىسى.

باس پروكۋروردىڭ ورىنباسارى مارات احمەتجانوۆتىڭ ايتۋىنشا، پروكۋراتۋرا ورگاندارى ۇكىمنىڭ زاڭدى كۇشىنە ەنگەنىن كۇتەدى. ودان كەيىن اقجارقىن تۇرلىبايدى جازانى ءوز ەلىندە وتەۋ ءۇشىن قايتارۋ شارالارىنا كىرىسۋگە بولادى. الايدا وعان تۇرلىبايدىڭ ءوز كەلىسىمى كەرەك.

"قازاقستان مەن قىتايدىڭ اراسىندا ءتيىستى كەلىسىمشارت بار. سول شارت بويىنشا جۇمىس ىستەيمىز. سوت ۇكىمى شىققانىمەن زاڭدى كۇشىنە ەنۋى كەرەك. سودان كەيىن وكىلەتتى ورگان – پروكۋراتۋرا، ياعني ءبىز قالعان جازاسىن قازاقستاندا وتەۋگە مۇمكىندىك جاسايمىز. كەلىسىمشارتتىڭ نەگىزىندە سۇراۋ سالامىز. ارينە، اقجارقىننىڭ ءوز كەلىسىمى بولۋى كەرەك. قازاقستاندا قالعان جازانى وتەۋگە كەلىسىپ، ءوتىنىش بەرسە، جۇمىس ىستەيمىز", - دەدى احمەتجانوۆ Sputnik قازاقستان تىلشىسىنە بەرگەن سۇحباتىندا.

سوت ۇكىمى وزگەرىسسىز قالدى

27 جەلتوقساندا قىتاي سوتى وتانداسىمىز اقجارقىن تۇرلىبايعا قاتىستى سوت شەشىمىن وزگەرىسسىز قالدىرعان بولاتىن.

"قىتاي سوتى ءومىر بويى باس بوستاندىعىنان ايىرۋ تۋرالى ۇكىمدى وزگەرىسسىز قالدىردى", - دەلىنگەن سىرتقى ىستەر مينيسترلىگىنىڭ رەسمي حابارلاماسىندا.

سوت ۇكىمى 10 كۇننەن سوڭ كۇشىنە ەنەدى. وتىرىسقا اقجارقىننىڭ ادۆوكاتتارى مەن قازاقستاننىڭ قىتايداعى ەلشىلىگىنىڭ كونسۋلى قاتىسقان.

اقجارقىن تۇرلىبايدىڭ تاعدىرى

قازاقستان ازاماتى اقجارقىن تۇرلىباي 2014 جىلى ناۋرىزدا گۋانچجوۋ اۋەجايىندا ۇستالعان بولاتىن. وعان شەكارادان 4,5 كەلى ەسىرتكىنى الىپ وتپەك بولدى دەگەن ايىپ تاعىلدى. ول كەزدە وتانداسىمىز 20 جاستا بولعان ەدى.

2015 جىلدىڭ ماۋسىمىندا قىتاي سوتى ونى ءومىر بويىنا باس بوستاندىعىنان ايىردى. سوتتا اقجارقىن شەتەلدىك دوسى الداپ كەتكەنىن ايتىپ، كىناسىن مويىنداعان جوق.

2016 جىلى سوت شەشىمى جويىلىپ، ءىس قايتا قاراۋعا جىبەرىلدى.

وسى جىلدىڭ قىركۇيەگىندە تۇرلىبايدىڭ اناسى زۋحرا سەيتىموۆا قازاقستان پرەزيدەنتىنە كومەك سۇراپ حات جازدى. ارتىنشا قاسىم-جومارت توقاەۆ قىتايعا ساپارى كەزىندە اقجارقىن تۇرلىبايدىڭ ماسەلەسىن كوتەرگەن بولاتىن.

اقجارقىن تۇرمەدە نەمەن اينالىسادى

قازاقستاننىڭ قىتايداعى ەلشىلىگىنىڭ مالىمەتىنە سۇيەنسەك، تۇرلىباي قاسىنداعى سوتتالعاندارعا اعىلشىن ءتىلىن ۇيرەتىپ ءجۇر. سونىمەن قاتار، كوركەم ادەبيەت وقيدى، دەنە شىنىقتىرۋمەن دە اينالىسادى. قىتاي ءتىلىن جاقسى مەڭگەرىپ العان.