27 jeltoqsan kúni Qytaı soty otandasymyz Aqjarqyn Turlybaıǵa qatysty sot sheshimin ózgerissiz qaldyrdy
Bas prokýratýra Qytaıda ómir boıy bas bostandyǵynan aıyrylǵan Aqjarqyn Turlybaıdy elge qaıtarý úshin ne isteý kerektigin túsindirdi, dep habarlaıdy Sputnik Qazaqstan tilshisi.
Bas prokýrordyń orynbasary Marat Ahmetjanovtyń aıtýynsha, prokýratýra organdary úkimniń zańdy kúshine engenin kútedi. Odan keıin Aqjarqyn Turlybaıdy jazany óz elinde óteý úshin qaıtarý sharalaryna kirisýge bolady. Alaıda oǵan Turlybaıdyń óz kelisimi kerek.
"Qazaqstan men Qytaıdyń arasynda tıisti kelisimshart bar. Sol shart boıynsha jumys isteımiz. Sot úkimi shyqqanymen zańdy kúshine enýi kerek. Sodan keıin ókiletti organ – prokýratýra, ıaǵnı biz qalǵan jazasyn Qazaqstanda óteýge múmkindik jasaımyz. Kelisimsharttyń negizinde suraý salamyz. Árıne, Aqjarqynnyń óz kelisimi bolýy kerek. Qazaqstanda qalǵan jazany óteýge kelisip, ótinish berse, jumys isteımiz", - dedi Ahmetjanov Sputnik Qazaqstan tilshisine bergen suhbatynda.
Sot úkimi ózgerissiz qaldy
27 jeltoqsanda Qytaı soty otandasymyz Aqjarqyn Turlybaıǵa qatysty sot sheshimin ózgerissiz qaldyrǵan bolatyn.
"Qytaı soty ómir boıy bas bostandyǵynan aıyrý týraly úkimdi ózgerissiz qaldyrdy", - delingen syrtqy ister mınıstrliginiń resmı habarlamasynda.
Sot úkimi 10 kúnnen soń kúshine enedi. Otyrysqa Aqjarqynnyń advokattary men Qazaqstannyń Qytaıdaǵy elshiliginiń konsýly qatysqan.
Aqjarqyn Turlybaıdyń taǵdyry
Qazaqstan azamaty Aqjarqyn Turlybaı 2014 jyly naýryzda Gýanchjoý áýejaıynda ustalǵan bolatyn. Oǵan shekaradan 4,5 keli esirtkini alyp ótpek boldy degen aıyp taǵyldy. Ol kezde otandasymyz 20 jasta bolǵan edi.
2015 jyldyń maýsymynda Qytaı soty ony ómir boıyna bas bostandyǵynan aıyrdy. Sotta Aqjarqyn sheteldik dosy aldap ketkenin aıtyp, kinásin moıyndaǵan joq.
2016 jyly sot sheshimi joıylyp, is qaıta qaraýǵa jiberildi.
Osy jyldyń qyrkúıeginde Turlybaıdyń anasy Zýhra Seıtimova Qazaqstan prezıdentine kómek surap hat jazdy. Artynsha Qasym-Jomart Toqaev Qytaıǵa sapary kezinde Aqjarqyn Turlybaıdyń máselesin kótergen bolatyn.
Aqjarqyn túrmede nemen aınalysady
Qazaqstannyń Qytaıdaǵy elshiliginiń málimetine súıensek, Turlybaı qasyndaǵy sottalǵandarǵa aǵylshyn tilin úıretip júr. Sonymen qatar, kórkem ádebıet oqıdy, dene shynyqtyrýmen de aınalysady. Qytaı tilin jaqsy meńgerip alǵan.
