قازاقستاننىڭ پرەمەر-ءمينيسترىنىڭ ورىنباسارى رومان سكليار Bek Air اۆياكومپانياسىنىڭ Fokker-100 ۇشاعى "تەحنيكالىق اقاۋدان" نەمەسە ۇشقىش قاتەلىگىنەن قۇلاعان بولۋى مۇمكىن دەپ مالىمدەدى. ول مۇنىڭ الدىن الا بولجام ەكەنىن ەسكەرتتى. سكلياردىڭ ايتۋىنشا، ۇشاقتىڭ ارتقى بولىگى "ۇشىپ-قونۋ جولاعىنا ەكى رەت تيگەن".
وقيعاعا بايلانىستى قۇرىلعان ۇكىمەت كوميسسياسىنىڭ مۇشەسى رومان سكليار 27 جەلتوقسان كۇنگى بريفينگ كەزىندە اپاتتىڭ سەبەبىن ارنايى تەحنيكالىق ساراپتاما انىقتاۋى ءتيىس ەكەنىن ايتتى. جەرگىلىكتى باق-تىڭ حابارلاۋىنشا، ۇكىمەت كوميسسياسى اپات ورنىنا بارعان.
سكلياردىڭ سوزىنشە، اپات ورنىندا سەگىز ادام قازا بولعان، ەكى ادام - اۋرۋحانادا، ەكى ادام اۋەجايدا كوز جۇمعان. 49 ادام اۋرۋحاناعا جاتقىزىلعان، 18 ادامنىڭ جاعدايى اۋىر.
جۇما، 27 جەلتوقساندا كۇندىز قازاقستاننىڭ ىشكى ىستەر مينيسترلىگى قۇتقارۋ جۇمىستارى جالعاسىپ جاتقانىن حابارلادى. ءىىم دەرەگىنشە، ۇشاق بورتىندا 93 جولاۋشى، بەس ەكيپاج مۇشەسى بولعان. ولاردىڭ اراسىندا شەتەل ازاماتتارى دا بولعان: ۋكراينانىڭ ەكى ازاماتى، قىرعىزستاننىڭ ءبىر ازاماتى، قىتايدىڭ ءبىر ازاماتى. باستاپقىدا بورتتا 95 ادام بولعانى حابارلانعان ەدى.
جەلتوقساننىڭ 27-ءى كۇنى تاڭەرتەڭ الماتى اۋەجايى ماڭىنا Bek Air اۋە كومپانياسىنىڭ Fokker-100 ۇشاعى قۇلادى. ۇشاقتا 93 جولاۋشى مەن بەس ەكيپاج مۇشەسى بولعان. قازا بولعانداردىڭ سانىنا بايلانىستى قاراما-قايشى رەسمي اقپارات تاراعان. رەسمي ورىندار باستاپقىدا 15 ادامنىڭ قازا تاپقانىن حابارلاعان. كەيىنىرەك الماتى قالالىق اكىمدىگى ۇشاق اپاتىنان 12 ادامنىڭ قازا بولعانىن مالىمدەپ، ولاردىڭ ءتىزىمىن جاريالادى. ولاردىڭ اراسىندا ەكيپاج كومانديرى دە بار.
تالعار اۋداندىق پوليتسيا باسقارماسىنا "گۇلدالا ەلدى مەكەنىنىڭ ماڭىنا ۇشاق قۇلاعانى" تۋرالى اقپارات تاڭەرتەڭگى ساعات 7:30-دا تۇسكەن. يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتىنىڭ حابارلاۋىنشا، Fokker-100 ۇشاعى "ۇشۋ كەزىندە بيىككە كوتەرىلە الماي" ەكى قاباتتى تۇرعىن ۇيگە سوعىلعان.
"ازاتتىق" راديوسى
فوتو اۆتورى پاۆەل ميحەەۆ (رەيتەر)
