Qazaqstannyń premer-mınıstriniń orynbasary Roman Sklıar Bek Air avıakompanııasynyń Fokker-100 ushaǵy "tehnıkalyq aqaýdan" nemese ushqysh qateliginen qulaǵan bolýy múmkin dep málimdedi. Ol munyń aldyn ala boljam ekenin eskertti. Sklıardyń aıtýynsha, ushaqtyń artqy bóligi "ushyp-qoný jolaǵyna eki ret tıgen".
Oqıǵaǵa baılanysty qurylǵan úkimet komıssııasynyń múshesi Roman Sklıar 27 jeltoqsan kúngi brıfıng kezinde apattyń sebebin arnaıy tehnıkalyq saraptama anyqtaýy tıis ekenin aıtty. Jergilikti BAQ-tyń habarlaýynsha, úkimet komıssııasy apat ornyna barǵan.
Sklıardyń sózinshe, apat ornynda segiz adam qaza bolǵan, eki adam - aýrýhanada, eki adam áýejaıda kóz jumǵan. 49 adam aýrýhanaǵa jatqyzylǵan, 18 adamnyń jaǵdaıy aýyr.
Juma, 27 jeltoqsanda kúndiz Qazaqstannyń ishki ister mınıstrligi qutqarý jumystary jalǵasyp jatqanyn habarlady. IIM dereginshe, ushaq bortynda 93 jolaýshy, bes ekıpaj múshesi bolǵan. Olardyń arasynda shetel azamattary da bolǵan: Ýkraınanyń eki azamaty, Qyrǵyzstannyń bir azamaty, Qytaıdyń bir azamaty. Bastapqyda bortta 95 adam bolǵany habarlanǵan edi.
Jeltoqsannyń 27-i kúni tańerteń Almaty áýejaıy mańyna Bek Air áýe kompanııasynyń Fokker-100 ushaǵy qulady. Ushaqta 93 jolaýshy men bes ekıpaj múshesi bolǵan. Qaza bolǵandardyń sanyna baılanysty qarama-qaıshy resmı aqparat taraǵan. Resmı oryndar bastapqyda 15 adamnyń qaza tapqanyn habarlaǵan. Keıinirek Almaty qalalyq ákimdigi ushaq apatynan 12 adamnyń qaza bolǵanyn málimdep, olardyń tizimin jarııalady. Olardyń arasynda ekıpaj komandıri de bar.
Talǵar aýdandyq polıııa basqarmasyna "Gúldala eldi mekeniniń mańyna ushaq qulaǵany" týraly aqparat tańerteńgi saǵat 7:30-da túsken. Indýstrııa jáne ınfraqurylymdyq damý mınıstrliginiń baspasóz qyzmetiniń habarlaýynsha, Fokker-100 ushaǵy "ushý kezinde bıikke kóterile almaı" eki qabatty turǵyn úıge soǵylǵan.
"Azattyq" radıosy
Foto avtory Pavel Mıheev (Reıter)
