ءبىزدىڭ قوعامدا «ەرىكتىلەر» تۋرالى اڭگىمە قوزعالسا، بوس ۋاقىتىن قالاي وتكىزەرىن بىلمەي جۇرەتىن ستۋدەنتتىڭ بەينەسى كوز الدىمىزعا كەلەدى. الايدا «ۆولونتەرلار» وسكەلەڭ جاستاردى ەڭبەكسۇيگىشتىك پەن جاقسىلىققا يتەرمەلەپ، ءوزىنىڭ تۋىپ-وسكەن جەرىنىڭ دامۋى مەن گۇلدەنۋىنە سەپتىگىن تيگىزىپ جۇرگەن كەڭ جۇرەكتى جومارت جاندار. مىنە، ەرىكتىلەردىڭ ەڭبەگىن ەرلىككە بالاعان مەملەكەت باسشىسى قاسىم-جومارت توقاەۆ 2020 جىلدى – ەرىكتىلەر جىلى دەپ جاريالاپ وتىر.
مەملەكەت باسشىسى ەرىكتىلەرگە دەگەن كوزقاراستى وزگەرتۋ ءۇشىن دامىعان ەلدەردەگىدەي ۆولونتەرلىككە ءبۇتىن ءبىر سالا رەتىندە قاراۋ قاجەتتىگىن جانە ەرىكتى بولىپ جۇرگەن ستۋدەنتتەردىڭ شاكىرتاقىسىن كوتەرۋ ماسەلەسىن العا تارتقان-دى. البەتتە مۇنداي اقجولتاي حابار ەرىكتىلەردىڭ قاتارىن ارتتىرارى كۇمانسىز. دەسە دە، ەل قازىناسىنان قىرۋار قارجى بولىنەتىن ەرىكتىلەر جىلى ءوز مىندەتىن تيسىنشە اتقارا الا ما؟ ءبىزدىڭ جاستاردىڭ ۆولونتەرلىك قىزمەت تۋرالى تانىم-تۇسىنىكتەرى، ءبىلىم-تاجىربيەسى كوڭىل كونشىتەدى مە؟ جالپى، «ەرىكتىلەر جىلىنان» نە كۇتەمىز؟ كوكەيدەگى وسىنداي سۇراقتاردى وبلىستاعى ۇكىمەتتىك ەمەس ۇيىمداردىڭ وكىلدەرىنە قويعان بولاتىنبىز.
سونىمەن، ساۋلنامامىزعا قاتىسقان جامبىل وبلىستىق ۇەۇ قاۋىمداستىعىنىڭ ءتورايىمى اينۇر زاۋىربەكوۆا «ەرىكتىلەر جىلى» جاستارعا مول مۇمكىندىك بەرەدى دەپ سانايدى.
«ەرىكتى بولۋ – ماڭىزدى ءارى جاۋاپتى ءىس. قازاقستان ءۇشىن عانا ەمەس، بۇكىل الەم ءۇشىن سولاي. ەرىكتىلەردىڭ كومەگىنە ءزارۋ ادامدار كوپ. سەبەبى ولار الەۋمەتتىك ماسەلەلەردى شەشۋگە اتسالىسادى. سوعان قاراماستان، تەگىن ءارى ايانباي ەڭبەك ەتەدى. زامان اعىمىنا بايلانىستى ەرىكتى بولۋدىڭ دا ءتۇرى وزگەردى. بۇرىن ەرىكتىلەر قورشاعان ورتانى تازا ۇستاپ، اتا-اجەنىڭ ۇيىنە بارىپ قولعابىس ەتسە، ال قازىر مەملەكەتتىك قولداۋدىڭ ارقاسىندا بارلىق سالا قامتىلۋدا. قىركۇيەكتەن باستاپ، قر اقپارات جانە قوعامدىق دامۋ ۆيتسە-مينيسترىگى قوعامدىق جۇمىسقا ارالاسقىسى كەلەتىن ەرىكتىلەرگە ارنايى سايتتى ىسكە قوستى، وندا ءاربىر بىلىمگەر ءوزىنىڭ بەلسەندى ەرىكتىلىك قىزمەتىن ۇسىنىپ، ناتيجەسىندە وقۋ اقىسىن تولەۋگە مۇمكىندىك الماق. وسىلايشا ەرىكتىلەردىڭ ەڭبەگى ەلەنبەك، – دەيدى ول.
ال "ەلىم-اي دوستىق" قوعامدىق بىرلەستىگىنىڭ جەتەكشىسى پولينا كيم ەرىكتىلەر جىلى جاستاردى پاتريوتىلىققا باۋلىپ، ولاردى جاپپاي جاقسىلىق جاساۋعا جۇمىلدىرادى دەپ سانايدى.
«ازاماتتىق قوعامنىڭ العا دامۋىنا اسەر ەتەتىن بىرەگەي كۇشتىڭ ءبىرى – ەرىكتىلەر. قازاقستاندا ناتيجەلى جۇمىستار اتقارىپ كەلە جاتقان ەرىكتىلەردىڭ بەلسەندىلىگىن ءتۇرلى وقيعالار ورىن العاندا ءجىتى اڭعارامىز. ماسەلەن، ارىس قالاسىندا ورىن العان قايعىلى جاعدايدا ەرىكتىلەر جۇدىرىقتاي جۇمىلىپ، اسارلاتتى. ەل ريزا بولدى. ەرىكتەلەر جىلىندا قالامەن قاتار اۋىل جاستارىن دا قامتىپ، ولاردىڭ وزدەرىن جان-جاقتى جەتىلدىرگەنىن قالايمىن، – دەيدى ول.
«ادىرنا»
ۇلتتىق پورتالى
