جاس كاسىپكەرلەرگە جول اشقان جان

3113
Adyrna.kz Telegram

دەموكراتيالىق مەملەكەتتىڭ باستى كورسەتكىشتەرىنىڭ ءبىرى – ۇكىمەتتىك ەمەس ۇيىمدار بولىپ سانالادى. ولار قوعامدىڭ ءار سالاسىنىڭ دامۋىنا ىقپال جاساپ، ەل ازاماتتارىنىڭ قۇقىقتارىن قورعايدى. وسى تۇستا جامبىل وبلىسىندا ۇەۇ-نىڭ جۇمىسىن شيراتىپ، تىڭ سەرپىن الۋىنا وبلىستىق ۇەۇ قاۋىمداستىعىنىڭ ءتورايىمى اينۇر زاۋىربەكوۆانىڭ ەلەۋلى ەڭبەگىن اتاپ وتۋگە ابدەن بولادى.

اينۇر زاۋىربەكوۆانىڭ ايتۋىنشا، بۇگىندە جامبىل وبلىسىندا زاڭ جۇزىندە 600-گە جۋىق قوعامدىق ۇيىمدار تىركەلگەن. سان سالانى قامتىعان ۇكىمەتتىك ەمەس ۇيىمداردىڭ قاتارىندا، دەنساۋلىق ساقتاۋ، ازاماتتاردى تۇراقتى جۇمىسقا ورنالاستىرۋ، جاستار، ايەلدەر، قارتتار مەن بالالار، ەكولوگيا، كاسىپكەرلىك، سپورت ايتا بەرسەك، بۇل ءتىزىم جالعاسىپ كەتە بەرەدى.

- ءار سالاداعى قوردالانعان ماسەلەلەرگە بيلىكتىڭ نازارىن دەر كەزىندە اۋدارۋ جانە ول تۇيىتكىلدەردى بىرلەسە شەشۋ قوعامدىق ۇيىمداردىڭ نەگىزگى ماقساتى،- دەيدى ول.

سونىمەن قاتار، ايماقتاعى كاسىپكەرلىك پالاتاسى جاستار كاسىپكەرلىگى كەڭەسىنىڭ ءتورايىمى اينۇر زاۋىربەكوۆا ءوڭىردىڭ كاسىپكەرلىگىن دامىتۋعا ۇلەس قوسىپ، بىرنەشە جىلدان بەرى جامبىلدىق جاستاردى كاسىپكەرلىككە باۋلىپ، جەكە ىستەرىن اشۋعا ءارى تابىس تابۋلارىنا سەپ بولىپ ءجۇر.

بيىل ەلىمىزدەگى جوعارى جانە ارناۋلى وقۋ ورىندارى مەن مەكتەپ باعدارلامالارىنا «كاسىپكەرلىك نەگىزدەرى» ءپانى ەنگىزىلگەنى بەلگىلى.

بۇل باستامانى «اتامەكەن» ۇلتتىق كاسىپكەرلەر پالاتاسى مەن قر ءبىلىم جانە عىلىم مينيسترلىگى بىرلەسە جۇزەگە اسىرىپ وتىر. وقۋ ورىندارىنا بىلىكتى مامانداردى دايىنداۋ ىسىنە اينۇر زاۋىربەكوۆا دا بەلسەنە اتسالىسۋدا.

بۇگىندە «كاسىپكەرلىك نەگىزدەرى» ءپانى بويىنشا 10 اۋدان مەن تاراز قالاداسىنداعى كوللەدجدەردىڭ 22 وقىتۋشىسىنا ينتەراكتيۆتى تەحنولوگيا ادىسىمەن ءدارىس وقىلعان.

بۇعان قوسا، اينۇر زاۋىربەكوۆا باسقاراتىن ۇەۇ –نىڭ باستاماسىمەن جامبىل وبلىستىق ىشكى ساياسات باسقارماسىنىڭ تاپسىرماسىمەن الەۋمەتتىك-كاسىپكەرلىكتى دامىتۋدىڭ جاڭا باعىتى قولعا الىندى. يننوۆاتسيالىق جوبانىڭ باستى ەرەكشىلىگى – الەۋمەتتىك ماسەلەلەردى شەشۋدى جانە تابىس تابۋدى كوزدەيدى. قازىرگى تاڭدا الەۋمەتتىك كاسىپكەرلىك جوباسىن قوعامعا كەڭىنەن تانىستىرۋ ماقساتىندا ءتۇسىندىرۋ-اقپاراتتاندىرۋ جۇمىستارى جۇرگىزىلۋدە. بۇل تىڭ باستاما ءوزىنىڭ تىرناقالدى جەتىستىگىنە دە قول جەتكىزىپ ۇلگەردى. اتاپ ايتار بولساق، رەسپۋبليكالىق «ASAR» ۇشجاقتى سەرىكتەستىك فورۋمى اياسىندا وتكىزىلگەن بايقاۋعا وبلىستان 9 جوبا قاتىسسا، وبلىستا الەۋمەتتىك كاسىپكەرلىكتى دامىتۋ بويىنشا بايقاۋلار ۇيىمداستىرىلىپ،  ناتيجەسىندە «اقبۇلاق» ، «شىنايى كومەك»، «اقتوس»، «الەۋمەتتىك جۇلدىز» اتتى قوعامدىق ۇيىمدارعا شاعىن گرانتتار بەرىلگەن.

سوندا-اق ۇەۇ قاۋىمداستىعى مەن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى بىرلەسىپ بىرقاتار جۇمىستار اتقارىلعان. مىسالى، «لۋچشايا ينۆەستيتسيا» جەكە وقۋ ورتالىعىندا 150 جۇمىسسىز ادام مەنەدجەر، ساتۋشى، گرافيكالىق ديزاين ماماندىقتارى  بويىنشا جاڭا كاسىپ مەڭگەرىپ، ونىڭ 60 پايىزى تۇراقتى جۇمىسقا ورنالاسقان.

«ادىرنا»

ۇلتتىق پورتالى

پىكىرلەر