وقۋشىلار قازاق حاندىعى مەرەكەسىن تويلادى

3265
Adyrna.kz Telegram

الماتى قالاسى، الاتاۋ اۋدانىنا قاراستى العاباس-6 ىقشام اۋدانى №182 مەكتەبىندە قر پرەزيدەنتى كۇنىنە وراي قازاق حاندىعىنىڭ 550 جىلدىعىنا ارنالعان تەاترلاندىرىلعان قويىلىم قويدى. ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ كاسىبي ماماندارىنىڭ ساحنالاۋىمەن بولاتىن كورىنىسكە مەكتەپ وقۋشىلارى ءوز قابىلەتتەرىن كورسەتۋگە مۇمكىندىك الدى. قويىلىمعا 7-10 سىنىپ ارالىعىنداعى وقۋشىلار قاتىسادى. قويىلىم سوڭى ءان مەن كۇيدەن شاشۋ شاشقان كونتسەرتتىك باعدارلامامەن جالعاسىن تاپتى. ءتورتىنشى سىنىپ وقۋشىلارىنان تۇراتىن حور انشىلەرى كورەرمەن قاۋىمنىڭ جۇرەگىنە جىلىلىق سىيلاي ءبىلدى.  

الماتى قالاسىنىڭ №182 جالپى ءبىلىم بەرەتىن مەكتەبىنىڭ ديرەكتورى شىرىنگۇل زەينۋللاەۆانىڭ ايتۋىنشا، كەرەي مەن جانىبەك حانداردان باستاۋ العان قازاق حاندىعى كەزەڭىن ساحنالاۋ ارقىلى جاس تولقىننىڭ تاريحي تانىمىن ارتتىرا وتىرىپ، وتانشىلدىققا، ۇلتىن سۇيەر ۇلان رەتىندە قالىپتاستىرۋ كوزدەلگەن. «قازاقتىڭ بايلىعى مەن دارحان دالاسى، قازىرگى تاۋەلسىزدىگى ءۇشىن بابالاردىڭ قانشالىقتى قان مەن تەر توككەنىن جاستارعا ۇقتىرىپ، تولقىمالى تاريحى بار ەل مەن جەردىڭ قادىر-قاسيەتىن تۇسىندىرۋگە ۇمتىلىس جاسالدى» دەيدى مەكتەپ ديرەكتورى شىرىنگۇل زەينۋللاقىزى.     

شاراعا قاتىسقان بالالاردىڭ دايىندىق دەڭگەيىنىڭ جوعارى ەكەنى بىردەن كورىنىپ تۇردى. اسىرەسە، قازاقتىڭ حاندارى مەن بيلەرى، رۋ-تايپا كوسەمدەرى سومدالعان تاريحي قويىلىمدارى ەل ىقىلاسىنا بولەندى. قويىلىم رەجيسسەرى، جاس ءارتىس ازات مىڭباەۆتىڭ ايتۋىنشا، بالالار ءوز شەبەرلىكتەرىن كۇن ساناپ شىڭداپ كەلەدى. «ارينە، مەكتەپ ساحناسى تەاتر ساحناسىنداي ءتۇرلى كومبيناتسيالىق شەشىمدەر جاساۋعا اسا قولايلى ەمەس. دەگەنمەن، ءبىز بار مۇمكىندىكتى پايدالانىپ، كورىنىستى بارىنشا تارتىمدى ەتۋگە تىرىسىپ باقتىق. سوعان وراي، وقۋشىلار دا نانىمدى، بار زەيىنىمەن وينادى» دەيدى ازات مىڭباەۆ. ايتا كەتۋ كەرەك، مەكتەپ قابىرعاسىندا «اق جەلكەن» تەاترى «جەلكەن كوتەرگەنىنە» كوپ بولا قويماعان. وسى شارا بارىسىندا «اق جەلكەننىڭ» دە تۇساۋى كەسىلگەنىن كوپشىلىكتەن سۇيىنشىلەگىمىز كەلەدى. اتاۋلى شاراداعى قويىلىمدار بالالار تەاترىنىڭ تىراق الدى شىعارماشىلىق جەمىسى ەكەنى ءوز-وزىنەن تۇسىنىكتى.        

جاستاردىڭ ونەر-بىلىمگە ۇمتىلۋى قۋانتارلىق جايت. وسىناۋ ونەرگە قۇشتار جاس ورەندەرىمىزدىڭ ەل يگىلىگىنە قىزمەت ەتەر ازامات بولىپ وسەرىنە كامىل سەنىم ارتامىز.


ارمان سەرىكۇلى   

 

پىكىرلەر