قازاق قىزىنىڭ جۇرەگىن جاۋلاعان قازاق جىگىتى

182

2017 جىلى جارىق كورگەن «قازاق جىگىتىن سۇيمەۋگە 5 سەبەپ» ءفيلمى كوپشىلىكتىڭ كوڭىلىنەن شىقتى. فيلم رەجيسسەرى اسقار ۇزاباەۆتىڭ كاسىبي دەڭگەيدە شىنايى ىزدەنىسكە تۇسكەنىن بايقادىق. اسقار ۇزاباەۆ –  «تراكتورشىنىڭ ماحابباتى» كومەدياسىنىڭ (2013ج.), «اكە» دراماسىنىڭ (2016ج.), «ابايلاڭىز، سيىر!» (2014ج.), «كەلىن دە ادام بالاسى» (2017ج.), «ءسىز بوكستا ەڭ باستىسى نە ەكەنىن بىلەسىز بە؟» (2013ج.) فيلمدەرىنىڭ رەجيسسەرى. قازىرگى تاڭدا كەيبىر قازاق قىزدارىنىڭ شەتەل ازاماتتارىنا تۇرمىسقا شىعىپ جاتقانىن نەسىنە جاسىرايىق. كومەديانىڭ استارلى ماعىناسىن ءتۇسىنىپ كورسەڭىز، ءوز ۇلتىڭنىڭ ادامىنا تۇرمىسقا شىققانعا نە جەتسىن! فيلم دينارا ەسىمدى بىربەتكەي قىزدىڭ جيۋل ەسىمدى فرانتسۋز جىگىتىنە كۇيەۋگە شىعۋ ءۇشىن وتباسىنان رۇقسات الۋعا، الماتىعا جولعا شىعۋىنان باستالادى. وتباسى مۇنى، ارينە، قۇپتاي قويمايدى. دينارا دارحان ەسىمدى تاكسيست جىگىتپەن كەزدەيسوق تانىسىپ قالعاننان سوڭ وقيعا شيەلەنىسە تۇسەدى. دينارانىڭ فرانتسۋز جىگىتىنە تۇرمىسقا شىعۋى ءۇشىن جاساعان امال-تاسىلدەرىن، قۋلىق-سۇمدىعى مەن جاعىمسىز ارەكەتتەرىن كورگەندە ىشەك-سىلەڭىز قاتىپ كۇلىپ الاسىز دا، ءاپ-ساتتە، ىشىڭىزدە ءبىرتۇرلى كۇي كەشىپ، ويلانىپ قالاسىز.  فيلم كەيىپكەرى دينارانىڭ پايىمداۋىنشا قازاق جىگىتتەرىن سۇيمەۋدەگى 5 سەبەپ – ولاردىڭ بويىنداعى جالقاۋلىق، ماقتانشاقتىق، الاڭعاسارلىق، سوزىندە تۇرماۋ – ايتقان ۋاقىتىنان كەشىگىپ كەلۋ جانە الدىنا قويعان ماقساتىنا جەتۋ جولىندا اياعىنا دەيىن كۇرەسۋدەن باس تارتىپ، قول سەرمەي سالۋ. دەگەنمەن دە، دينارا اقىرعى ساتتە اقىلعا كەلىپ، ءوز تاڭداۋىن دۇرىس جاساي ءبىلدى. دارحان ەكەۋىن تابىستىرعان ەرەكشە كۇشتىڭ بارىن سەزگەندەيمىز، ياعني، كەز-كەلگەن جان  ومىردە دە ماحابباتىن وسىلايشا كەزدەيسوق كەزدەستىرۋى مۇمكىن. اسەل سادۋاقاسوۆا ءوز كەيىپكەرىن ومىردەگىدەي سومداپ، جاقسى الىپ شىقتى، ال دارحاننىڭ ءرولىن ورىنداۋعا العاشىندا اكتەر تابىلماي، قينالعانىن رەجيسسەر جاسىرمادى. بارلىق تالانتتى اكتەرلەردىڭ شەبەرلىگىن سىناپ كورگەنمەن، دارحاننىڭ رولىنە ساي كەلەتىن ەشكىم  بولمادى. كاستينگتىڭ ەڭ سوڭعى كۇنى نۇرجان سادىبەكوۆ كەلگەندە، نۇرجاننىڭ ءرولدى جاقسى سومداي الاتىنىنا رەجيسسەر كامىل سەندى، جانە سونى ءفيلمدى ءتۇسىرۋ بارىسىندا وزگەلەرگە دە دالەلدەدى. قازىرگى كەزدە ءتۇسىرىلىپ جاتقان فيلمدەردىڭ باسىم كوپشىلىگى ورىس تىلىندە پروكاتقا شىعادى، ورىس تىلىندە تۇسىرىلەدى، وسىنى كورگەندە كادىمگىدەي ىشكى دۇنيەڭدى ىزا كەرنەپ، كوڭىل كوكجيەگىڭ ناليدى. كينوتەاترعا باراتىن جاستاردىڭ قاتارى كۇن ساناپ ارتىپ كەلەدى، ەگەر فيلم تولىق قازاق تىلىندە كورسەتىلسە، قازاق ءتىلىنىڭ قولدانىس اياسى دا كەڭەيەر ەدى. فيلم جايلى اقپارات قۇرالدارى مەن الەۋمەتتىك جەلىلەردە دە ورىسشا مالىمەت سامالاداي سامساپ تۇر. «يۋتۋب» جەلىسىندە ءفيلمنىڭ ورىسشا نۇسقاسى سالىنعان، ءفيلمنىڭ كەيىپكەرلەرى كەيبىر  تۇستارىندا عانا ءىشىنارا قازاقشا ءتىل قاتادى. فيلم ستسەناريىندەگى مۇنداي قازاقشا-ورىسشا بايانداۋ ءماتىنى جاستاردى شالا قازاققا اينالدىرۋدىڭ جولى دەپ سانايمىن. كينو ءتۇسىرۋشى كومپانيالار ءوز پايداسىن عانا ويلاماي، ۇلت قامىنا كوڭىل بولگەنىن قالايمىن. سول ءۇشىن دە، كەلەشەكتە كەز-كەلگەن قازاق كينوسى تولىعىمەن قازاق تىلىندە ءتۇسىرىلۋى كەرەك دەپ ەسەپتەيمىن. فيلم قاي جاعىنان بولسىن، سىن كوتەرەدى، ءارى زاماناۋي، ءارى ءداستۇرلى ۇعىم-تۇسىنىكەتى قامتىعان كەرەمەت تۋىندى ەكەنىنە كۇمانىم جوق. ەڭ باستىسى، قازاق جىگىتىنىڭ تۋا بىتكەن شىنايى بولمىسى، ۇشقان ۇيادان العان ونەگەسى وركەنيەت ورىسىنە ۇمتىلعان قىزدىڭ جاندۇنيەسىمەن استاسىپ، ۇلى سەزىمگە ۇلاسۋى كەز-كەلگەن قازاق قىزىنا قۋانىش سىيلاپ، ءاربىر قازاق جىگىتىنىڭ جىگەرىن تاسىتىپ، رۋحىن اسقاقتاتاتىنى – ءفيلمنىڭ جەتكەن جەتىستىگى، ءىلىپ الار ىزگىلىگى. ءدال وسى ءفيلمدى كورىپ شىققان قازاق قىزى مەن جىگىتىنىڭ جۇرەگىندە ءوز ۇلتى ءۇشىن كۇرەسۋگە دەگەن نامىس ۇشقىنى وياناتىنى – داۋسىز.  ەندەشە، ۇلتتىق يميدج پوزيتسياسىندا تۇسىرىلەتىن فيلمدەرگە ەرەكشە ءمان بەرگەن ابزال.

ايسۇلۋ سەزحان

اباي اتىنداعى ورتا 

مەكتەپ-گيمنگازياسىنىڭ

11-سىنىپ وقۋشىسى

عىلىمي جەتەكشىسى: جيدەگۇل ابدىجادىلقىزى

پىكىرلەر